Editorial – 10.10.2021

Faina hian thianghlimna a keng tel fova, thianghlimna chu Pathian kan anna ber anih avangin keimahni kan fai ringawt a kan awmna leh a chhehvel a fai chuan si loh chuan faina tih hian a huapzo thei lo. Faina hian kan zahawmna a keng tel a, hriselna hnar ani bawk.

Faina hi hmasawnna chikhat anih mai bakah hnam fing zia a ni a, faina ngaithah ram hmasawn an awm ngai hek lo. Faina pawimawh zia chu inhrilh nawn kan ngai kher in a lang lova, faina lama hmalak dan kawng hrang hranga inzirtir lam ah pawh hma kan sawn chho zelin a lang bawk. Amaherawh chu faina lama zirtirna kan dawn tam ang hian faina lam ah hma kan sawn phah em tih erawh inzawh nawn kan ngai fova, hemi kawngah hian mitin hian mawhphurhna kan la la huam lo ni te pawhin a lang a ni.

Kan inchhung leh a chhevel bawl-hlawh kan tihfai hian em ni faina lamah hmasawn kan intih?A bawlhlawh lai thenfai ringawt hian faina a lan tir lem lova, kha bawlhlawh a kha a paihna hmun dik a paih anih leh nih loh kan chhut ngun a ngai fo bawk. Bawlhlawh hi a hnawk avang mai a thianfai emaw paih kan nih chuan faina kan tehdan hi kan thlak a hun tawh takzet. A paihna hmun tur dik taka paih anih loh chuan a nghawng chhuah chuan chhiatna bak min thlen leh chuang lova, a tuar tur bawk kan ni.Tin, faina lama hmalak nan hian in zirtirna nge kan mamawh a, pawn lam thil kan thlir dan hi kan thlak a ngai zawk?

Mipui tute pawh hian faina leh thianghlimna lama kan rilru put hmang leh ngaihdan kan thlak hmasak loh chuan eng anga hmalakna leh inzirtirna hian hmasawnna ke min pen thei tir chuang hian a rinawm loh. A bik takin kan ram ah hian invawn thianghlim dan kan la thiamlo hle a, kuhva eina a remchanna a pianga chhah mai te, kawmkar remchang laia zun mai te hi kan chin than thalo tak ani a, hriselna hi kan ngai pawimawh tak tak lo nge kan thatchhiatna hian min hneh zawk? Khawi hmun pawh nise a fai chuan hmuh a nuam mai bakah rilru a ti thawveng a, rilru lam hriselna atan pawh thil tha tak a ni. Ram hmasawn tur chuan thianghlimna leh faina kan uar a ngai a, leilung hausa ram emaw lehkha thiam tamna ram nih mah ila faina kan ngaithah chhung chuan mi zah kan hlawh ngai lovang.

Leave a Reply