Editorial 12.12.2021

Mizo zia tih hi tawite a hrilh fiah a har hle. Hmanlai kan pi leh pute nundan tha leh an huaisenna kha Mizo zia ti a kan sawi thin chu a ni ber awm e. Tunhma a indo a inrun thin hnam kan ni a, tlangvalten khaw mipuite him nan an nunna hial pawh an thap thin a ni.Hun a kal zel a indo leh inrun thin hun chu a tawp ta, khua a ralmuang a, chutichung chuan nula leh tlangvalte hlutna a tla hniam chuang lo, mirethei leh chhumchhiate hmachhuan, an kulhpui an la ni fan a ni.

Khawvel a changkang zel a, thalai hlutna a sang tawlh tawlh emaw tih mai tur a ni, tun thlengin khawtlangah chhiatni thatni ah nula tlangval tello chuan engmah a tih hleihtheih loh. Amaherawhchu thalaite hian kan nihna kan hai mek a, kan tih tur leh tihloh tur pawh kan tliar hrang thiam ta lo.

Mizo nula tlangval khua in a hmachhuan, mipuite tana kulhbing sang chu tunah chuan a chim ta mek a nih hi. Zo zia ‘thian chhan thih ngam’ nun nei thin khan mahni khawtual mi ngei kan sawisa duh ta, kan khawlai te chu zanah phei chuan hmeichhia leh naupang zawkte tan ral ram a chang mek a ni.

Khawtlang tana inhumhimna, chhiat tawk te tan thlamuantu, tanpui ngaite tanpuitu tur thalaite hian kan tih tur diktak ti leh tur hian kan in san mar a hun ta a ni. Khawtlang ti nuam a ti nuamlo theitu chu thalaite kan ni a, kan hawilam apiang hi a kaw duak duak zel thin.

Vengdang ten khawhar inriah bansan a, khawhar in zan pawh an tih tawi mek lai hian Mizo nula leh tlangvalte hian kan ze dik tak ‘Mizo zia’ hi kan khawtlang ah lan tir ila, Sa a tlak a tlan nghal thin, ral leh sakawlh hma a tawlh ngailo te thisen keimahni a awm tlat hi i ti nung leh ang u. Nula tlangval te hian kan khawtlangah hian Mizo ze dik tak lanchhuah tir hi kan mawhphurhna a ni tih i hre nawn ang u.

Leave a Reply