Editorial 13.12.2020

Pawltlak thla laihawl kan lo chuang kai leh ta, kan nghahhlelh em em Krismas lo thleng turin leh kum thar 2021 thleng turin ni tlemte chiah in min dang ta.

Hripui leng hian kan kal dan thin pangngai a ti khawlo zo vek mai a, tuna kan chanchinbu chhiar dan ni lova, a lehkha ngei a sem chhuah a chakawm hle mai. Mahse, hri lakah kan him zawkna tur ngaihtuah chunga chet lak a ngai miau si a, kan inhrethiam tlang zel a niang chu.

Chutih lai chuan kan ram hruaitu lu, kan Chief Minister chuan tawngkam thar mak tak a duang chhuak leh ta a, a ni lo lam zawnga ngaihtuah duhte tan chuan Eng nge a awmzia ni a, Eng nge sawi a tum tiin a ngaihtuah theih viau awm e.

A dem zawnga ngaihtuah chuan fiamthu nuihzatthlak tak a ni thei ang a, nuih pawh kan nuih hlawm ngei ang. Mahse heti zawng hian i han herpui daih teh ang.

Mizoramah hian a ngaihtuah peih leh rilru seng peih tan chuan sum leh pai lama hmasawnpui tur thil tam tak a dap chhuah theih reng a, mi taima tan chuan ei hmuhna tur hi chu a awm reng a ni tih hi thil chiangsa a ni.

A ngaihna hria leh hre lo kar hi a inthlau khawp mai a, zirlai ni chung pawha nitin mamawh thawk chhuak reng an awm a, chutih laiin lehkhathiam pui pui nia inhria hna hmu lo kan kuh tul lawi bawk si. Chief Minister sawi tum a nih leh nih lo chu hre lo mah ila mi taima tak chuan hna thawh tur hi a awm reng a, peih leh peih loh a thu niin a lang zawk.

Tun dinhmunah phei chuan in sa mekte hian labour/inhlawhfa hi an duh ang an hmu zo meuh lo zawk niin a lang. Mi taima tan hna a awm a, thawh peih loh ngah tan hna a awm lo.

Leave a Reply