Editorial – 14.02.2021

Kan chanvo, kan dikna hailanna turin ni 16.02.2021-ah fiahna rem-chang a awm leh dawn ta. I inpeih em?

Inthlang ram kan ni a, mipui zalenna ram, mipui te ta, mipuite siam sawrkar inrelbawlna hnuaia awm ram kan ni. Kan duhthlanna ah a innghat sang hle a, duhthlanna dik leh tlo nei tur erawh chuan duhthlanna thiang kan hman ve a ngai.

Kan ram hi inrelbawlna tha leh kalphung tha nei tura kan duh a nih chuan rilru fim tak pu a, mi dik leh tha ngei thlang chhuak tura rilru kan sen a tul a, inthlan dawnin hamthatna dawnglo mahila mi tha leh dik kan thlang chhuak a nih phawt chuan nakinah keimahni leh kan ramin hamthatna tam tak a la chang dawn tho tih hi kan hriat pawh a tul hle a ni.

Mahni hma sial vang ngawt te, an ni chu kan chungah an tha a tih vang ngawt emaw, chu chuan chumi zat pawisa chu kan in tun nun nan min pe tih vang ngawt te in mi tha hnawl i ching lo ang u khai!

Mi diklo sawisêl thei turin ka mawhphurhna hlen ngei ka duh: Vote ka thlak chuan khua leh tui ka nihnaa ka mawhphurhna ka hlen tihna a ni dawn a, ka thlan te tling emaw, ka thlan loh zawk te pawh tling ta se, ka mawhphurhna tha taka ka hlen miau avangin kan aiawh tura kan thlan tlinten an mawhphurhna an hlen lo a nih chuan nasa taka sawiseltu nih pawh ka ngam ngei ang.

Vote ka thlak lo a nih erawh chuan ka mawhphurhna ka hlen loh miau avangin midang pawh an mawhphurhna hlen turin ka phût ngam dawn bik lova, chuvangin midang pawh an mawhphurhna hlen tura phût ngam ngei turin ka mawhphurhna hlen nan Vote ka thlak ang.

Leave a Reply