Editorial 15.08.2021

Kan veng hi Aizawl-ah hian veng lian lo pawlah kan tel ve in a rinawm, chutiang a ni chungin chi-tin chi-tang kan cheng hova, Kohhran pawh a hrang hrang kan awm, veng a len loh vei nen hian Kohhran hrang biakin pawh a kim hle.

Pathianin he lei hi mihringte luah lum tura min pek, cheng za-a, khawsa ho turin min siamin min din a, mahni mai a khawsa thei tumah kan awm lo. Chutiang anih avang chuan cheng ho a, inlungrual taka kan awm ho hi a tul viau reng a ni. Kan nundan leh nunzia te hian innghirnghona te thlen lo se la, midang tana mal-sawmna thlen tu, mite tana hlimna thlen tu nih theuh hi k an khawsak hona ah hian a pawimawh takzet bawk.

Kan pi leh pu te hunlai ah pawh khan, mahni chan ai midang chan tir pawh hreh lo, mi harsa leh chanhai zawk te khaichhuah chungchungah te, tlawmngaihna leh aia upa zah kawngah te, an nun ho kawngah rĂȘng khan nun nuam tak an hmang thin a ni tih chu kan hriat fo tawh a ni ang, kan tunlai nunah hian han ngaihtuah ta chhin ila, kawng tam takah chuan kalsan tawh, an nundan leh an khawsak dan pawh kalsan kan ngah ta mai, chutih laiin kan kalsan ngai reng reng loh tur erawh chu: tlawmngaihna kawng te, aia upa zah te, an nun ho dan kawng hrang hrang te kha i chhawm nun reng teh ang u. Veng tana mi hnawksak leh kawhmawh bawl zawng a khawsa lovin, midang tana malsawmna nih tum zawk ang u.

Veng ti thangmawitu, ti hmingthatu kan nih theuh theih avangin midang tana hnawksak lova kan awm theih hi a tul hle. Kan nundanah hian YMA hmalakna leh inkaihhruaina anih vang ngawt a awm nilovin, Mizo kan nih avang zawkin kan nundan leh chetzia ah te hian zo-nun-mawi hi lang zawk se la a va hlu dawn em.

Leave a Reply