Editorial 16.05.2021

Khawvel pum bawhtu hripui tihbaiawm tak mai chuan min kiansan zai reng rel lovin, a pung zual zel emaw tih mai tur hian kan ram leh kan hnam, kan chhungkua min luhchhuah mek a, kan rum a, keini hnam tlem leh rethei tak pawh min kal kan lovin kan bu zawl ah min luhkhung ta chu a ni e.

Hripui leng mek, chhiatna leh harsatna thlentu, vanduaina ni a kan ngaih hian min chenchilh mek lai hian a thim zawng a thil thlir lovin kawla ni chhuak lo eng zam leh chiai tur beiseina a thlir angin he hun harsa leh thim kan hmachhawn lai hian a eng lam in thil thlir tum ila. He hri laka invenna pakhat pawimawh tak chu midang nena intlawhpawh loa mahni ina awm a ni kan tih fo hunah hian thuawih takin hmun danga chhuak lovin lehkhabu chhiar na hun atan te hmang ila, Bible te hi chhiar chhuah hunlai tak a ni.

Khawvel buai taka ei leh bar zawnna avanga chhungkua a hun kan hman hleihtheihloh te kha he hri vang hian hun liamta kohkir theihloh te kha hlep tumin chhungkua a hun hmanna remchangah chantir ta daih mai ila, nakin zel a kan chhungkaw inkawmngeihna leh kan hmalam hun atan a tha anga, khawtlang ralmuanna chen in a thlen thei hial ang!

Thenawm te enge an an tih leh he hun harsa kan hmachhawn mekah hian mahnia hmachhawn mai lovin kan tang tlanga kan tuar tlang a ni tih inhrilh te hi a tha a, kan thenawmah he hri leng mek avanga harsatna tawk, mahnia lo se zawl tuar tawp mai sawichhuahna remchang neilo leh sawichhuak hreh si te an lo awm mial em tih kan ngaihven a tul hunlai tak a ni. Mi te tan a malsawmna kawng khat tala kan nih theihna hun tha a va ni em!

Leave a Reply