Editorial – 17.01.2021

‘A bul tan that chu a zahve zo ang a ni’ anlo tih kha maw, YMA member te kum bul tan tha turin kan rilru leh ngaihtuahna i han seng sang sang teh ang u. YMA kumpuan Zirna Uar a nih kha hre thar zelin, kawng engkimah bung thar kai turin inbuat-saih ila ava duhawm em.

Kan hruaitu ten Membership Fee, Chhiatni Fund leh a dangte an rawn khawn leh sang sang hlawm ang a, chumi piah lam ah budget tlak turin sum tuak te a ngai leh ang, hnatlang hrang hrang an rawn ko leh ang a, member ten kan tih ve theih tawk theuh ah tlanchhe lovin tan lo la thar zel ang u.

Mizo tlawmngaihna a hniam tawh anga ngaih theih turin thu sawi leh chhiar tur a awm ta zeuh zeuh mai. Chu tlawmngaihna leh Zonun Ze-mawi chawinung leh tur chu tu dang an awm chuanglo, ram dang mi leh hnam dangin an rawn thar thawh dawn lo. Nang leh kei, YMA member te lo hi chu, kan pi leh pu atanga kan chhawm Mizo tlawmngaihna leh Zonun Ze-mawi chhawm nung a, ti par vul leh tur hi an awm chuanglo.

Chuvangin pawnlam mi ten kan zinga tel an rawn chak ve a, kan tih dan an zir duh ve theihna turin i inzir thar leh teh ang u.

Hripui leng avanga chhuan-chham mai tur anga langte tanpui a, kan thil neih leh kan theih ang tawk a kan thawk chhuak sang sang te kha a ri ava mawi in hmuh ava nuam em. Mizo tlawmngaihna leh Zonun Ze-mawi tak hi ala thi lo a, kan nun ah hian ala bet tlat a, mite hmuh tur in kan chhuah tam lo mai chauh a ni.

Midangte tan a malsawmna ni chung zelin YMA member-te kan hma zawna tih tur awm te ti a tan ila thar deuh deuh ang u.

Leave a Reply