Editorial 19.09.2021

He khawvela kan awm chhung hian mi tu pawn ngaihsak nih kan duh veka, ngaihsak kan hlawh theih nan engemaw ti taka awm dân pawh kan thiam thin. Kan mihringpuite ngaihsak na dawn hi a nuama, an tan hlutna kan nei tih a chianga, chu chuan kan rilru ah hlimna min pe a ni. Tin, nun a ti phûrawma, beiseina neiin hmalam pan turin min nawr kal bawk thin. Chutihrualin, ngaihsaktu neilo nih chu a hrehawmin, khawvela mi vanduai ber nihna a tling si.

Mite ngaihsakna chauh hi phût leh beisei tur kan ni lo, mi dangte ngaihsaktu nih kawngah tan kan la thar zawk tur a ni.

Khawvela kan awm chhung hi chuan chêngho tur kan nia, mahse, thenkhat hi chuan an duh dân têa khawsa zel turin kan inngai a ni mahna, thenawm khawvengte bân phâk tur leh tih buai ngam khawpin kan awm meuh ta lo.
Chutihlaiin, inchênchilha, nun ho tur kan nih zia hre chiang apiang chu, mi dangte tanpui turin, miten an tihbuai ngam leh an mamawh hun apianga an beisei ngam khawpin an awm thung a. Chung mite chu, an hausa emaw rethei emaw vang lam a ni lo, Pathianin ang khat vekin min siam ziate, in mamawh tawn vek kan nih ziate, mihringin kan hmalam hun kan hriat lawk miah loh thu te an hriat chian vang a ni thei ang. A tawi zawngin, Pathian thu an awih vang a ni ber awm e.

Mite tanpuina mamawh em em hun kan la nei thei, kan lusun khawhar na hnem kan ngaih hun alo la thleng ve thei, sum leh paiah tanpui kan mamawh hun pawh alo thleng thei, chuvangin, tun hunah hian min mamawhtu apiangte ban phâk leh tih buai ngam khawpin awm i tum ang u. Min mamawhtu apiangte ti thlâwn lo turin keini YMA member te hian tan i la sauh sauh bawk ang u.

Leave a Reply