Editorial 19.12.2021

Aizawl veng hrang hrang zingah hian keini veng tluka tui dawng/haw hnianghnar hi an tam lo ang ti ila kan sawi sual lo maithei. Amaherawhchu, veng te a lo thang a, vengchhungah mipui kan pung a, power supply duhkhawp hmuh theih loh vanga tui pump theih loh leh khawl hlui tawh vanga harsatna neuh neuh te a awm avangin tunhma ang chuan tui-ah kan hnianghnar thei ta lova, tui hnianghnar taka kan dawn thin avangin tui dahkhawlna tha kan lo insiam si lova, tun hma anga duhtawk tawka tui dawn tur kan neih tak loh avangin harsatna kan tawk chho tan ta a, harsatna kan tawh tak tak hma hian tui dahkhawlna tha kan insiam a tul ta hle mai. Chutihrualin chhungtinten mahni tui pipe theuh te a that leh that loh te ngaihsak that a tul a , a tel lo a kan khawsak theih loh tui hi a thlawn a luan ral tir mai mai te hi kan tih loh tawp tur a ni. Aizawl mipuiten tui kan tlan ber chu Tlawng lui tui, PHE Department-in khawl hmanga a pump chhuah a ni a, PHE Department tui pump khawl te hi engemaw vangin chhe rup thei a ni a, khawl mai bakah pipe line te pawh nasa taka chhe rup thei a ni tih kan hriat a tul. Chhiatna alo thlen thulh pawha kan buai lohna tura keimahni lam kan lo inbuatsaih sa hi thil tul tak ava ni em.

Mizoram chu kan vannei a, kumtin ruahtui kan hmu tha a, tui dahkhawlna tha insiam thiam ila chuan PHE Department tui sem ring lo pawh hian kumtluanin kan khawsak theih a rinawm a ni.

Amaherawhchu tuna kan dinhmunah chuan mipuite hi PHE tui semah kan innghat lutuk a, fur lai pawhin chawlhkar khat tui sem theilo ta se tui avanga harsatna nasa tak tawk nghal tur kan awm nual niin a lang. Chuvangin heng chhiatna lo thlen palh pawha nasa taka kan buai nghal lohna turin mipui tam zawk hi chuan tun aia tui kan renchem thiam a, dahkhawlna tha zawk kan neih a tul hle niin a lang a, tan ila thar theuh ang u.

Leave a Reply