Editorial 22.08.2021

Rin lawk lem loh hun harsa kan tawk thut thut mai a, hnam intodelh lo nih a fuh lohzia a chiang viau nghal zel mai, kan kawmthlang khaw te tak te, Lailapur tih velin kawng an block a, a state pumpuiin kan mangang ruai zel mai chu a nih hi!!

Ram inrelbawlna kawnga ke chheh fuh lo awmzia kan chiang ta viau mai. Kawng pakhat chauh atanga chak la kan nih hi engtikah nge tihtawp a nih ang a, engtikah nge kawng hrang hranga hmansawnna rahbi kan rah ve tak ang? Mizo nihnaah hian kan lawm viau ang a, kan hlim del del reng ang a, mahse Assam rama khaw kilkhawr te pakhat hian awlsam deuhin min timangang reng mai dawn em ni?

Kan ramah mi ram leilung ang tho a awm a, mi ei ang tho ei ve kan nih chuan tih tur pawimawh tak kan nei a, harh chhuah a hun e. Mizote hi i harh mawlh ang u. Intodeulh turin miin eng nge an tih? Hna an thawk a ni. Mizo thalaite kan harh a hun. Sawrkar hna beiseia then suau suau, kut hmanga hah taka hna thawk peih lo kan ni em?

Mizoram hi thlir teh! Kilometer sawm chauh pawh tlan la, i hmuh phakah hman tangkai loh ram hring dup a awm diai duai mai, hmang tangkai ang hmiang. Aizawl khawpuiah emaw, thingtlang khua khawiah pawh zin vel la, i hmuh mai theih ram khawilaiah pawh khan ei leh bar thawhchhuahna tham ram a awm a ni. Kan nu leh pa te tan khua a tlai tawh, a ti theih tur awmchhun chu thangthar te kan ni, thangthar te kan harhchhuah a hun ta tak zet e. Mizo thalaite harh ila, hna i thawk ang u. Kan ei leh bar tam ber hi leia china, a rah seng sa vek an ni. Intodelhna turin hun a la tlai lo ve.

Leave a Reply