Editorial 20.06.2021

HSSLC result a lo chhuak leh ta der mai, hmanni lawkah HSLC result chhuak ah result duhawm tak kan vengin kan lo nei tawh bawk anih kha. Hri-len lai e ti lo chuan result a tha in kum dang zawng ai pawn result a tha zawk emaw tih mai tur a ni.

Career Guidance lam pawh ni lem lo in, kan pass thar te kan zirlai duhawm tak tak te hian kan hmalam hun kan ngaihtuah lawk hlawm em le?

‘Lehkha ka zir chho ve nawk nawk ang a, a tawpah hna awm ang ang ka thawk ve mai ang’ kan ti nge? Thiante zir ang zir mawl ve tawp kan tum zawk? Chhungte’n zir rawh an tih apiang zir tum te pawh kan lo awm thei e.

A chung a kan sawi tak te khi a tha lo e kan ti pawh a ni chuang lo. Amaherawhchu, kan upat hun a chhungkaw chawm zo thei tura hna kan hmuh theihna turin kan zir zawm em tih te, kohhran leh khawtlang, kan ramin kan tangkaipui turin kan zir em tih te leh, a pawimawh ber – nakin hunah min tihlim ang em tihte hi ngaihtuah hmasakah neih a tha khawp mai.

Lehkha kan zir chho mawp mawp a, sang tak thlengin kan zir chho a, hna te pawh tha tak tak sang tak thlengin kan thawk zui mai thin. Mahse, kan tuina pawh ni lo, hlawh a tam avang leh kan degree in a phak avanga thawk ta mai hi kan tam chho ta khawp mai. Tui lo taka thawh chuan kan hna in a tuar a kan ramin a tuar bawk thin, chumai bakah keimahni kan hlim lo in keimahni bawk hian kan tuar ta thin a ni.

Kan nih tumah chiang ila, nakin huna hlimna min thlen tu tur leh kan ram than chhohna turin kan lehkhathiam rual te hian a tir atanga bul tan tha turin kan han inchah thar leh a ni e.

Hlawhtlingna chang zawng zawngte kan lawmpui tak zet che u a, la hlawhtlinglo te pawh beidawng mai lova, a aia nasa a tan la turin kan infuih a ni.

Leave a Reply