Editorial – 21.02.2021

Vengin hma a sawn a, lirthei nei pawh kan lo pung ve ta viau mai. Kan kawngte a chep a, chuvang chuan motor khalhtu leh mipuite kan fimkhur tlan a tul hle. Tunlai motor chhuak thar ho hi a thawm a zawi a, ke a kal te tan pawh a thawm hriat a har thin avangin horn hman hi uar deuh ila, tin horn kan hmeh hian inhnaih chilh lutuk tawh a hmet lovin kawngpuia lo awmte inthiarfihlim hman ngei tur a horn pek hi chin a tha hle.

Tin, khawlaia chak lutuka tlan te hi chin loh a tha (a bik takin two wheeler), mipui tan leh motor a chuangte tan pawha him tura fimkhur nachang kan hre ngei tur a ni. Chutihlaiin mipui pawh kan fimkhur ve na tur tam tak a awm. Intihpalh a awm loh nan lirthei tlan vel hi tha takin kawng kian thin ila, tunlai hian kan veng chhung chauh pawh nilo, khawpui chhungah pawh mipui hian motor kan pel fimkhur lo thin hle. I fimkhur tlang ang u.

Kan lirtheite kan park danah hian fimkhur leh midang tana harsatna siam lova remchanna siam sak thiam hi a pawimawh viau awm e. Kan lirthei kan chhuk san a, midang tana hel buai ngai tak maia kalsante, mi In luhna dal tak mai a dah te, kawng tha laia motor hung tlat a, a chhe laia midang tlan ngai a siam te hi chin loh a tan a mawi. Tin, ruah a sur a, tuihawk a lo tam a, ke a kalte chil per chuai chuai te hi mimawl tih dan a ni a, i ching velo ang u.

Vengchhunga lirthei neite an fakawm, harsatna tawk leh rikrum thil a thlen a an lirtheite ui hauh lova an thawhchhuahpui thin hi veng mipuite tan a thlamuan thlak a, veng an chawimawi bawk a ni. Hei hi mi chhia leh tha thliar miah lova chhawm-nun zel nise a va han duhawm em.

Leave a Reply