Editorial – 21.03.2021

Eng ang mi nge ka la nih ve ang a, eng kawng nge kan la zawh ve ang ti a inngaihtuah buai ru neuh neuh hian nun hi kan hmang ve fo hian ka ring thin. Chutiang a inngaihtuah neuh neuh chung leh nun hmakhua thlir a suangtuahna ram a chen veng veng chang hian rilruah ‘Nun hi a van lo ho’ tih sam êt hi awl ve tak chu a ni.

Naupang zawk, hmakhua nei tha leh hmakhaw thlir thui tak nei te tan chuan kan tun Mizo te khawvel hman mek awmzia leh awmdan te hi hriatthiam a, vei a, hmangaih a ngaih zia hi kan hmuh hmaih lo hian a rinawm takzet. Chutiang thlir thiam lo leh ngaihven nachang hre lo khawp hian nun kan hmang ang tih erawh ka ringhlel lo ve.

Engtiangin nge kan ram chu kan vei ang a, eng ang in nge kan hma-ngaihna kan lantir theih ang tih erawh thui sawi tur hrelo khawp in ka bang bo thung.

Amaherawhchu, hei erawh thai lan tel hram hi tha in ka hria. Mizo te hian zirna kawngah a hma aia nasa in, tun aia thahnemngaiin tan kan lak a ngai viau hian a lang. Kan thalai lehkhathiam tak tak te hian State Service aiin Central Service ah hian tan kan lak nasat hi a pawimawh in a hun chho viau tawh zawk in ka hria.

Hma hun thlirin eng emaw harsatna thlen thulh ah thuneitu sang zawk te hnam dang an nih thin avangin leh Mizo rilru pu tak an awm loh avang hian buaina nasa zawk la hmachhawn thei reng kan ni tih hi kan hriat thar deuh deuh a tul chho viau tawh. A ching fel tu tur Mizo officer an awm ve dawn loh avangin Mizo te ril rem loh zawng takin thuthlukna an rawn siam fo lo ang maw?

Chumi ti bo thei tur chuan tuna kan zirlai tha tak tak te hi in pawimawh ta. Kan ram chimral a kan awm loh nan zirlai ten tan ila sauh sauh ang u.

Leave a Reply