Editorial 21.11.2021

Mizote hi thih hnu a inphum thin kan ni a, he kan chindan hi engtik hun atanga kan tih thin nge tih chu hre pha chiah lo mah ila, vawinni thleng hian kan la kalpui zel a, kan la kalpui zel turah pawh ngai ila, tin, kan hnam nuna bet leh tel tlat a ni. Thlanlaih hi Tlangvalte mawhphurhna leh nula te inrawlhna chi nilo, tun hnai kum hnih khat kalta atang khan thlan laina hmun ah thlan lai te ei leh in siam sak turin nula te an tel ve thin, a lawmawm tak zet, mahse a thlan laih erawh chu mipa te mawh liau liau a ni. Mizo hnam hi kan awm reng anih chuan Thlanlaih hi kan hransan thei dawn lo niin alang.

Kan hnam nunin a ken tel tlat anih avang hian Thlanlaih kawngah tan lak thar atul ta hle mai. Hmanlai hun angin chhiattawk an awma hmun hla tak taka zualko kal ngaihnate chu biakhlatna hmangin thlak ani ta deuh vek a, kan changkanna hian kawng tam takah awlsamna min thlen nasa hle a ni. Hetihlai hian Thlanlaih ah kher hi chuan kan inbihchian a, changkanna avanga Thlanlaih loh changkang ni a ngai kan tam ta deuh em aw a tih theih awm e.

Zanlamah lumenna huna hmel hmuh tur awm silo, thlanlaihna lama hmuhtur pawh awm chuanglo tlangval kan nih chuan inbihchian a tul hle ang. Tihtur em em pawh neilo in zan lamah reitak tak zan khaw tairek thleng thlengin kan meng a, zingkar thlanlaih kan mutbo san thin hi chu kan inenfiah a tul ta hle.

Kan tunlai boruak hripui leng avangin Branch Executive Committee chuan a huhova thlan laih leh Mitthi lumen chu kan tih thin loh dan in a han kalpui a, thlan te pawh hlawhfa ruai a laih tir a han ni ve ta a, amaherawh chu kan boruak a rawn zia ang a, kan kal thin dan pangai ah kan let leh thuai tur ah beisei ila, chutih hun ah chuan mi tihtur bik leh midang kuta dah mai lovin, thawkchhuak hmasa nih tum in i han in el leh suau suau teh ang u.

Leave a Reply