Editorial 24.10.2021

Khawvel a changkang zel a, kan ram pawh in kawng tam takah hma a sawn a, chutih rual chuan kan khawtlang pawh hian Bungkawn atanga kan indan tan tirh te ai chuan nasa takin hma a sawn tak zet mai, a lawmawm takzet a ni.

Kan thalaite atangin hna sang tak tak thawk te, zirna lama hlawhtling tak tak te pawh kan awm ta nuk mai, ava lawmawm em. Mihring kan nih chhung chuan, kan Pathian thu a kan hmuh angin, thlen chin apianga hmasawn tur kan ni tih erawh theihnghilh lo ila, kan nunphungah hian hmasawnna hi hmuh tur a awm em?, tih hi mahni inzawt reng ila, nu leh pa te pawh in kan fate rilru ah hmasawn duhna rilru an put theih na turin theih tawp in tan la zel ang u.
Chutianga kan tih a, hma kan sawn zel chuan mi vengte entawn hi kan ni ve thei ngei ang.

YMA chuan kumpuan a tan ‘Zirna Uar’ a puang kan tih tawh kha, zirna atang lo chuan hmasawnna tam zawk hi chu a hmuh theih loh a ni, he kumpuan tihlawhtling tur hian Nursery Veng chhunga thalai lehkha thiam thei tak tak te, tun aia nasa a tan la leh zual turin kan in fuih thar leh a ni. Engtin nge kan veng tan hian malsawmna ka nih ve theih ang, kan veng hmasawnna tur hian engtin nge ke ka pen ve ang tih rilru ah i tuh thar leh theuh ang u.

Veng nuam leh hmasawn siam tur hian tute mah hi thawk bik tur leh mawhphur bik an awm lova. Kan vaia kan tanrual chuan Aizawl Veng a veng nuam leh hmasawn, veng dangte entawn tlak kan nih theih ngei hi a rinawm tlat a ni. Mizo thufing ah pawh tanrual hi chakna a ni tih a nih kha, kan tanrual chuan Nursery veng hi Veng hmasawn ber ah kan siam thei a ni tih hi i hre thar leh theuh ang u.

Leave a Reply