Editorial 26.12.2021

Hri leng mek karah Mizo Kristiante hunpui pawimawh tak Krismas kan hmang chho mek a, Kumthar lam pawh kan phak ang tawk leh nuam thei ang bera hmang turin kan inbuatsaih chho leh mek a, heng hunpui hi Mizoram mipuiten chawlh hahdamna leh intihthawvenna atana kan hman hun a ni thin a, heng hunah hian thianho inhmuh-khawm, pawl hrang hrangina programme an buatsaih hun a nih piah lamah Kohhran lam pawhin hun bika a hman thin niin, Kohhran programme pawh a tam thin hle a, tunah pawh advance christmas atangin hun kan hmang chho leh tan mek a ni. Chutihlai chuan Covid-19 hri leng mek chuan ziaawm lam a pan hlei thei lo a, tun hnaiah Covid-19 hri thar, inkaichhawn awlsam zawk nia sawi, Omicron hmuh-chhuah thar a ni a, chuvangin sawrkar pawhin he hunpui hi mipuiten hri inkai darhna hun atan an hman a hlau hle a, chutihrualin, hri leng avangin hunrei tak mipuite khauh taka khuahkhirhna hnuaia a dah tawh avangin tun dinhmunah chuan sawrkar lam pawhin mipuite khuahkhirhna khauh tak hnuaia dah leh a hreh deuh tawh nge ni? Heng hunpui kan hman thin dan lian tak tak – zaikhawm leh ruai theh chu la neih rih loh chu duh a nih thu sawi mahse, khuahkhirhna thupek erawh a chhuah rih lo a, hei vang hian kohhran hrang hrangten he hunpui hman an tumdan pawh a inang lo zung a, hmun thenkhatah chuan zaikhawmte pawh an awm tawh niin sawi a ni.

He hunpui lo thleng mek hi tumahin hri inkai darhna hun atan hman kan duh lo theuh dawn tih a chiang a, chutihlai chuan heng hunpui lo thleng mek hi kan hman dan leh kan fimkhur dan a zir leh ruahmanna that dan a zirin hri lakah kan himin kan him lo thei dawn niin a lang.

Kumthar pawh hlim takin chhungtinten lo hmang ila, Kumthar hlim taka hmang tur hian sawrkar leh khawtlang phalloh – halmawi, halpuah, sky lantern te hi hal lo ila , silai lem mu nei te pawh hi tuman I hmang lo ang u. Sawrkar dan zawm mai hi khua leh tui tha nihna a ni.

Dan zawm nih hi a changkang a, midang tan mai ni lovin, I tan, kan tan boruak nuam I siam dawn a sin.

Leave a Reply