Editorial 27.06.2021

Kum chanve kan lo chuangkai leh ta reng mai, kan hmalak tawh dan te han thlir kir ila, tih fuh loh tam tak kan nei mai thei a, tih that pawh tam tak kan nei ngei ang. Kan lo tih fuh loh a awm chuan kan insiam that ngam angai a, ‘tih sual hi mihring zia’ a ni an lo tih tawh avangin, insiamthat hi kan hreh tur a ni lo. Kal sual palh emaw rel sual palh emaw a awm lo thei lova, chuvang chuan hmasawn tur kan nih avangin insiam that hreh lova, a dik leh hmasawn zawnga kal kan tum tur a ni ang.

Kan kal tawh dan han thlir let ila, kan lo tihthat tam tak a awm bawk ang, chu chu chhunzawmin, kan hruaitu te kaizatha veng chungin kawng dik chu zawh hram hram kan tum tur a ni.

Fur kan thleng ta tak taka, leimin leh chhiatna dang tam tak kan hmachhawn thei a, heng hun lo thleng palh thei lakah hian kan fimkhur a, kan thawhho thiam a, hotute thu kan ngaih thiam a ngai hle. Mahni thua kal mai lovin an zai kan ngaih a, hotute pawhin ruahmanna fel tak kan neih zung zung theih a ngai a ni. Chhiatna dang thleng thei lakah pawh hian kan inven fimkhur a ngai a, kan thununna hnuaia awm a nih loh avnga hian kan theih ang tawk a kan lo fimkhur hi kan lo tih ve ngei tur a ni ang.

Kan zavaia tanrualna hi malsawmna kan dawnna tur kawng a ni tih hre thar leh ila, inphatsana ral khat atanga insawisel mai lovin i infinchhuah zel ang u. A tawp berah chuan tunlai hrileng karah mitin i fimkhur zel ila , he hri hi kan la hneh ngei ang. Malsawmna tam tak kan dawn hre reng chungin midangte tana malsawmna nihna kawngah pawh hmasawn zel i tum ang u.

Leave a Reply