Editorial – 28.02.2021

Mizo ten Kutpui kan neih zinga kan hriat hlawh ber leh tun hnu a kan hman nasat ber Chapchar Kut chu kan lo thleng leh dawn ta reng mai. Chapchar Kut hi hlimna nia hman a ni thin a. Lo vah zawh awllen lai hunah hman thin a ni.

Mizo Kut zingah chuan an uar ber leh hman hun chhung rei ber a ni a. Vahchap(lo atan thing leh mau sah thluk) phoro (char) lai huna hman thin a nih avangin Chapchar Kut tih hming hi a pu hlen ta a ni.

Kan pi leh pu te khan he Kut ni vang-thla lo thleng tur hi nasa taka ur lawk in anlo inbuatsaih thin a, zai leh lam in, hlim tak leh in lungrual takin hun an hmang thin a ni.

Hun alo kal zel a, Aizawl ah chuan Sawrkar ruahmanna in Lam-mual ah hman thin a ni ta a, chungah te chuan hnam lam chi hrang hrang te, mizo incheina te leh mizo infiamna chi hrang hrang te lantir in hun hlimawm tak hman thin a ni.

Kumin erawh a dan a dang dawn ta ni in a lang. Hri leng avangin kum danga kan hman dan thin angin hman a rem ta lo, kan hriat angin Vanapa Hall ah hman tum a ni a, mipui nawlpui in a chhim theih dawn loh a ni. Amaherawh chu TV lamah en theih a ni thung ang.

Engpawh nise kum dang angin Lammual ah Chapchar Kut hi hman theih nilo mahse he hun kan pi leh pu ten a hlim taka anlo hman thin hun hlimawm leh Zonun Zemawi an lantirna hun pawimawh tak hi theihnghilh mai lovin, kan nun zia ah lantir chhunzawm zel ila, mizo tlawmngaihna kan thinlungah rawn tuh thar leh tu ni sela, hlim tak leh lungrual taka chai za thin mizo thinlung kha boral tir i phal lovang u.

Leave a Reply