Editorial 28.11.2021

Kum 2022 chhunga Nursery Veng Branch YMA hruaitu thlan a lo hun leh ta. A thlang thei chin i nih chuan ngaihtuahna fim tak hmang turin ka duh tak zet che a, vote i thlak hma in heng te hi ngaihtuahna ah han nei teh ang u.

Zofate hi Sorkar hrang hrang awpna hnuaiah awm darhin kan tawng leh nunphung te lo danglam viau tawh mah se Pathianin hnam khat anga min dinchhuahtir a tum a ni ngei ang; unau hmelhai kal pelin inunauna leh insuihkhawmna lam kan hawi mek a. Pawl hrang hrang te hmalak tawhna te’n rah tha chhuahin a thiltithei ber CYMA pawhin helam hawi hian ke a pen ve ta ruau ruau a nih hi.

Hetiang lam veitu leh ngaipawimawhtu ngei Branch YMA hruaitu atan neih a chakawm hle ami. Kan thlan chhuah tur a te pawh in helam hi i vei thar ang u. YMA Motto pathum te hrechiang leh ngaipawimawh mi nilo chu i hnawl ngam ang u.

YMA Kumpuan Thupui-a kan hman ngun ber chu, “Ram leh Hnam Humhalh” tih a ni. Ram leh hnam chuan Zofate ram luah chin zawng zawng leh Zohnahthlak hnam peng hrang hrangte a huam a ni. YMA hi Zofate zawng zawng khaikhawmtu, ‘fa u ber’ chan chang kan ti thin. Mizoram mai ni lo, Zohnahthlak hnam hrang hrang te luah chin, ram dang leh state danga mi ram te leh anmahni Zohnahthlakte dikna chanvo YMA chuan a humhalh pui tur a nih hmel. Chutiang ngaihpawimawh nachang hre pha chu branch YMA hruaitu atan neih ava chakawm em!

YMA Dan Bu, Bung I, Chang 10-na “Kaihhruaina”-a kan hmuh, (Sub No. 3) “Thudik ngaina leh tan tlat mi” YMA hruaitu chu a ni tur a ni.

YMA hruaitu nihna denchhena mirethei leh thiltithei lo, chhantu nei ve lote chunga inlek ching, milian leh thiltithei deuh te chu hmachhawn ahneka be tha leh huam huam ang chi kha i paih ngam ang u. I chanvo hria a hruaitu tha tak thlang turin duhsakna ka hlan a che.

Leave a Reply