Editorial – 31.01.2021

Khawvel changkanna leh thiamna sang zelin a hawisan tan leh a hlamchhiah mek, aia upa zah chungchang hi vei a hun khawp mai. “Mizo nun timawitu leh khawsakhona nun tinuamtu ber thin pakhat chu ‘aia upa zah’ hi a ni awm e.

“Aia upate zah thiamin, an thute awihin zawm fo rawh” an lo ti thin a ni ngai a, tunlaiah chuan inzirtirna a tlem ta lutuk nge, aia upa zahna hi a tlahniam tawh khawp mai. “Khawvel changkang zelah, kum naupang zawkte’n thiamna sang zawk an neih avangin aia upa zahna chang an hre lo ta fo. Kan eizawnna leh kan nitin hnathawhna hmun a zirin a zawng aza chuan a zawm theih kher lo ang. Aia upa zawk pawh nise intirh dawt dawt a tul hun chu a awm ve fo. Chutih hunah pawh chuan upa zawk an nihna hre chunga tawngkam mawi tak a kan biak a mawi zawk zel ang.

Kum upa zawkte hian mihring nunah tawnhriat an ngah zawk fo a, hei vang hian kum naupang zawkte aiin hringnun an thlir dan a dik zawk fo. Thiamna lamah kan aia hniam zawk an nih vang maia aia upate aia finga kan inngai emaw, kan zahloh phah a nih chuan hringnunah zirtur kan la ngah hle tihna a ni. Kum upa zawkte zahna chang kan hrelo a nih chuan kan upat hunah min zah biklo ang.

Tunhma deuh zawk chuan Zirna inah Mizo nunmawi zirtirna tha tak dawn tur a awm thin a, tunah erawh chuan thiamna kan um nasat tak em avangin he lam hawi zirtirna hi a tlem tawh hle. Chuvangin chhungkuaa kan inzirtirna hi a pawimawh khawp mai. Chhungkuaa kan inzirtir loh chuan khawi hmunah mah heng zirtirna hi kan fate hian an dawng dawn lo tih hriaiin nu leh pate’n tan kan lak a ngai khawp mai.

Leave a Reply