Editorial 31.10.2021

Khawvelah ah hian thil lem leh tak kan buaipui nasa em em a, thenkhat chuan thil tak tak zawn hmuh tum aiin mahni ban phak leh hmuh phak chin ah lungawina kan zawng mai thin.

A tak hmu lovin a ngheh theih loh a, nghet lovin a dik theih loha, a rinawm theih hek loh. Dik lo leh rinawm lo chungin hlutna leh zahawmna a neih theih loh a, hmasawnna dik leh tlo a awm thei lo. Thiamna lama khawvel hmasawnna leh changkanna hian hringnun hi a chhe zawng leh a tha zawngin a nghawng mek a. Mi tam takin ngaihsan tur dik leh uar tur dik ngaihtuah lovin, a hniak tam lam apiang kan zui a, a chhuak thar apiang kan zuan a, a awlsam leh a nuam apiang kan um mek. A tak aiin a sira a bawlhlo vel kan lawmin kan buaipui nasa tual tual.

Engkim mai hian chhan leh vang a nei a, chu chu a takna dik tak chu a ni. Mi fingte chuan engkimah a chhan leh a vang an zawng a, an ngaihtuah a, a chhungrila a tak an hmu pha thin. Hollywood nunphung ngaisanga kan uar vut vut lai hian, anni chuan Hollywood tilartu finna leh thiamna thuruk an zu bih a, an zirna run sang (university) tha pui puite leh chu zirna run in a neih lehkhabu buk (library) ropui tak takte chu an zu hmu pha daih thin a ni.

Khawvel hi engtiang khawp pawhin danglam sela, thangthar lo chhuak thar zelte ngaihsan zawng leh uar zawng chu danglam zel mah se, a bawlhlo aia a tak a ngaihsanawmna leh uar tur dik a nihna hi a reh ngai lo ang a, a tak tluka hlu leh zahawm a awm ngai lo ang.

Hring nun kawng chhuk-chho zawha kan kal meknaah hian, a tak ram hi ngai pawimawh hmasa ber ila, a tak chu ngaisang ila, a tak kan hmuh chhuah theihna tur chu uarin buaipui ila, hmasawnna dik leh tlo chu a lo chhuak ngei ang. Hring nun tihlimtu leh tihmasawntu pawimawh tak pakhat, lehkha chhiar kawngah pawh hian, a tak lama min hnuk hnai thei, uluk leh mumal taka chhui leh ziah lehkhabu leh thuziakte i ngaisangin i uar nasa deuh deuh ang u.

Leave a Reply