Editorial

2018

28 October 2018

Mizoram Rorel Khawl member turte thlan a lo hun leh dawn ta a, Political Party hrang hrangte leh Pawl dang engemawzat in he inthlanah hian chuh tumin an in buatsaih mek a, hetiang karah hian in puhmawh tawnna leh thu belhchian dawllo leng vak tam tak kan hre leh ngei ang a, hetiang karah hian mahni awmna pawl tan luat vanga chhia leh tha thiang hmang theilo lekin kan buai ang tih a hlauhawm hle.

Hetiang hunah hian mi thenkhat chuan sum leh pai hmangin lamtang siam an tum thin a, mahni hlutna pawh hre zo lo khawpa dinhmun khirh a dingte tan chuan hnar har tak a ni thin. Amaherawh chu sum leh paia in lei tlin tumte hi ram hruaitu atan an tha angem tih hi kan ngaihtuah fo a tha hle mai.

Ram hruaitu tur thlan kawngah hian kan hlutna a inchen vek a, tumah midang aia hlu bik leh hlu lo bik an awm chuanglo. Mipuite kan intluk tlan lai ber a ni awm e. Hetih laia mahni hlutna leh zahawmna leh sum thleng duhna rilru kan lo pu a nih chuan kan rilru chu a pachhe hle tihna a ni ngei ang. Chutiang bawkin sum hmanga mi dangte hlutna lei tumtu chu a pachhe lehzual a ni.

Bible a kan hmuh angin Juda Iskariot-a chuan tangka 30 in a zirtirtu Lal Isua a man tir a, Juda Iskariota chu misual ber chhuahin kan chhuah a, kan ngaidam theilo a ni. Hetiang a nih laia mahni meuh sum duh avanga kan lo inhralh a nih chuan sualna nasa tak a ni dawn lo’m ni?

Kan ram hruaitu tur kan thlan turah hian mahni hlutna hre rengin, kan hlutna lei theiha ngaitu chu hnar ngam ila, chhia leh tha hriatna kan neih hmangin vote i thlak ang u. Chu chu kan ram leh hnam tana kan tih theih lian ber pakhat a ni.


21 October 2018

Zirtawpni khan YMA rorel inkhawm neih a ni a, he rorel inkhawm hian ‘Ram leh Hnam Humhalh’ kum atan nakkum hi a thlang leh ta a, YMA rilru ah hian Ram leh Hnam Hmangaihna a lian hle tih a chiang hle mai.

Ram leh Hnam humhalh tur chuan kan ramri chin kan chian a, huai taka kan hauh ngam a ngai ang. Tin, hnamah kan chian a, kan hnam tan kawng hrang hrang a thapui kan thawh a tul takzet dawn a ni.

Kan Ram leh Hnam tan hian tih theih kan nei vek a, kan tih theih chin erawh a in ang kher lo ang. A pawimawh hmasa ber chu ram leh hnam hmangaihna rilru kan put a, kan vei tlan a tul takzet a ni.

Ram leh Hnam humhalh tur hian kan tanrual a ngai em em a ni. sawrkar, tlawmngai pawl hrang hrang leh kohhran thlengin kan tan rual a tul a, mimal pawhin mahni hma chauh sial lo a kan thlah lo la awmzel turte dinhmun tur kan thlir tel a tul hle a ni.

Ram leh Hnam Humhalh hi YMA tihtur chauh a dah chi a ni lo a, YMA hmalakna hi Sawrkar, Kohhran leh Pawl dangten an thawhpui loh chuan a hlawhtling thei dawnlo a ni. Chuvang chuan kan ram leh hnam hmasawnna atan leh hnam dangte laka a him a, kan nunze mawi chawi nuna a awm reng theihna turin kan zavaia thawhhona hi a pawimawh em em a ni.

Sawrkarin ram leh hnam hmasawnna leh himna atana a tihtur dik takin ti se la, YMA leh Pawl dangte pawhin ram leh hnam humhalhna atan an tihturte huai takin kalpui se la, Kohhran pawhin ram leh hnam hmalam thlir chungin rawngbawl chhunzawm zel thei se kan hnam chuan hma a sawn in a ding chhuak ngei ang.

Ram leh hnam tana Sawrkar, Tlawmngai Pawl leh Kohhran hmalaknate hi zai khata kan luantir thiam a pawimawh hle.


14 October 2018

Chakma Autonomous District Council thiah a nih theihnana Central YMA in langsar taka a hmalakna pakhat – ‘Kawngzawh’ a huaihawt chuan boruak a nei lian hle a, Mizo zingah tul tilo engemawzat awm mahse Mizo mipuiten he kawngzawh hi kan thlawpin CYMA hmalakna hi hlawhtling ngei turin kan duh tih a lang chiang hle a ni.

CYMA in hma a laknaah hian mipuite hriat atana puanzar remlo leh tullo tamtak a awm ngei ang. Langlo lama a hmalakna hrelo a, a langsar chin chauh kan thlir a nih chuan ‘haw haw chunga nawr’ te pawh a ang viau mai. Amaherawh chu mipuite rilru chawh thawh a, ram leh hnam hmangaihna rilru tuh thar lehna atan hetiang zawnga hmalak hi a tul thin.

Ram leh hnam tana tha nia a hriat chu YMA hian a ti zel dawn a, CADC thiah pawh hi harsa viau tur angin lang mahse a harsatna lam thlirlo in, thiah a nih theih dan tur zawk thlirin CYMA chuan hma a la ta a ni.

Hetiang boruak karah hian Politics a hamthatna lak tuma inpuh-mawh tawn leh, tute emaw dem zawnga thu thehdarh a hun tawh lo a, thil kal tawh a lo buai chiam khan he thilah hian sawtna a nei lemlo. Mipuite leh YMA memberte rilru tihnual thei zawnga thu lo sawi tlat ching kan la awm thinte hi a pawi hle. Hei hian thil tha aiin thil thalo a thlen thin.

Tun kar tawpah hian CYMA rorel Inkhawm a awm leh dawn a, hetah pawh hian Ram leh Hnam tana tha tur thil engemawzat ngaihtuah a ni leh ang a, hmalakna tur thil thar a lo piang leh ngei ang. YMA rorelte hi hruaitute chauhin an tihhlawhtlin theih a ni lo a, memberte leh mipuiten kan tuipui a, kan thawhpui loh chuan a hlawhtlinna kan hmulo ang. Ram leh Hnam tan beiseina nen hmalam thlir a kan tanrual thap hi a pawimawh takzet e.


07 October 2018

CYMA chuan Mizoram leilung fa nilo Chakmaten Mizoram chhung ngeia ro an inrel bingna, dan ang thlapa din ni lo – Autonomous District Council an neih hi dan hmanga thiah a nih theihnan hma a la chho tan a, hemi atan hian Chakma chungchang zir chiang tur din in, mithiamte a rawn mek reng bawk a, langsar taka a hmalakna pakhat atan October ni 5, 2018 hian kawngzawh a buatsaih dawn a ni.

Chakmate hi hmun nghet neilo a vak kual chi an ni a, Mizorama an in benbel tirh chuan in 15 lek niin 1933-ah khaw din phalna pek ani a, heta tang hian an lo pung ta hluai a, tunah chuan Mizoram hial sahthlak an lo tum ngam ta a ni.

India Independence bawr lai vel (1941 – 1951) chhung phei kha chuan 200.64% zet in an pung hman a ni. Kan thenawm state ten ‘ral tlan’ anga an cheibawl laiin ram leh khua leh tui nihna kan lo pe a, ram nghet leh dinhmun sang zawk neih tumin ram leilung fate min kher ta ngar ngar mai a nih hi.

Hei vang hian CYMA chuan Chakmate lak atnaga Mizoram sah hek a nih loh nan a kungpui ber Chakma Autonomous District Council thiah a nih leh theihnan hma a la ta reng a nih hi. CYMA hmalakna hi hlawhtling theilo leh thil tullo anga ngaih chi a nilo a, huphurh ena kan lo en a nih chuan kan hlawhtling ngailo ang.

He hmalakna hi hlawhtling tura kan duh a nih chuan Mizo hnam hi kan tanrual thap a ngai dawn a, thil kal tawha puhmawh tur zawn in awmzia a nei tawhlo a, In puhtawn lo a hrui khat kan vawn a tul takzet a ni.

CADC thiah a nih theihnan hian YMA member zawng zawng hian tih theih kan nei tamlo. Amaherawh chu he ‘kawngzawh’ erawh hi chu mi zawng zawng tih theih a ni a, kan tih ve theih reng tih hi kan zavaia bat a ni.


30 September 2018

Tunlai khawvelah mi kan buai tlang ta hle mai a, mahni hna, eizawnna leh thil chi hrang hrangah buaina tur kan nei tam ta hle mai. |halaite zingah pawh awm awl mai mai leh hnathawklo a teihawi mai mai te, hman reng mai nih zahthlak ziate kan hre thar zel a, kan phak tawk theuhah hna thawkin kan buai ta chur chur mai a nih hi. Hei hi thil lawmawm tak a ni e.

Hetihrual hian buai kan intihna hi chhuanlamah a lo hman theih viau mai. Kan buai em avanga YMA thiltihna a kan tel hman lo a, thlan kan lai hmanlo a, lumenna leh khawhar ina kan kal hmanlo fo a nih chuan in ngaihtuah chian kan ngai hle tihna a ni. Tumahin hman avangin hengte hi an ti ngailo a, hetiang ti thinte hi mi buai tak leh indaihlo tak ve tho an ni.

‘Ka buai em mai’ tiin YMA leh khawtlang tan tumah pen chhuak duh awmlo se la YMA hi a awm tawhlo anga, khawtlang inrelbawlna felfai kan nei heklo ang. Buai chung chunga in pe-te zarah kan hnam nunzia chu chawi nun a la ni a, khawtlang pawh felfai takin kan la inenkawl thei zel a nih hi.

A huho a khawsa kan nih angin rawng kan in bawl sak tawn a tul a, mahni chauh inngaihtuah thei kan nilo. Mahni pawipang kalsan a midang tana kan inpek ve fo hi a ngai thin. Buai chung chunga YMA thiltihna leh chetvelna a kan tel ve hian midangte a ti phur a, Pawl a ti chak thin. Chu mi chhawrtu chu keimahni tho kan ni. Midangte tana kan inpekna hi keimahni vek hian kan lo hlawk pui fo mai.

Buai kan in ti a, kan in daihloh fo na chhan hi hun kan hman thiamloh vang hi a ni pakhat a, kan hun hman dan tur fel taka duan lawk te hi ching ila, kan buaina tamtak hi kan pumpelh ngei ang. Mahni tan chauh kan hun neihte pe lo a, midang tan pawh a pek hi Mizo leh Kristian tih dan tur a ni e.


23 September 2018

Tun laiin Mizoramah Zu leh Ruihhlo avangin kan buai hle a, Dan phalloha zu zuar leh Ruihhlo zuar man chhuah tumin sawrkar pawhin theih tawp chhuah thin mahsela a tawk zo lo fo. Sawrkar hmalaknate hi mipuiten kan thiam ang tawk tawka kan thawhpui a, kan tanpui loh chuan a hlawhtling thei thin lo.

Khawtlang leh ram tana thil thalo hi mimal emaw, pawl pakhat emaw, sawrkar chauhin emaw a do hneh chi a ni lo a, kan zavaia tang ruala do hneh theih chauh a ni.

Heng thil thalo do na kawngah hian Sawrkar in tihtur a nei a, mimal leh pawl hrang hrang pawhin tihtur kan nei. Sawrkar chuan a tihtur a ti mai a, dan ang thlap zelin thil a kal pui thin. Amaherawh chu hei hi a tawk kan ti em?

Dan chu kan zah in kan pawisa tur a ni teh meuh mai. Amaherawh chu sual dona kawnga kan hmalaknate hi dan ang diak diaka kalpui theihloh chin a awm fo. Vantlang tana thil thalo kan dona kawngah hian Dan a inziak si lo, kan Mizo khawtlang nun leh hnam zia in a ken thil tamtak a awm ve a ni tih hi kan hriat tel a tul hle mai.

Dan bawhchhetu tamtak hian Dan hi in phen nan an hmang a, Dan hmanga hrem tur tamtakin Dan vek chu in humhim tum nan an hmang fo thin. Dan hi misualte hremna tur ngawr ngawr leh misualte dikna chanvo humhimna tur nilo in ‘khua leh tui tha-te venhimna, zalen taka kan khawsakho theihna atana siam’ a ni tih kan hriat a tha. Dan hian misualte aiin mi thate a ngai pawimawh zawk a ni.

Kan khawtlanga sual kan dona kawngah hian Dan kan pawisak a kan zah a tul teh meuh mai, amaherawh chu hemi avanga kan tha a tim a nih erawh chuan sual chu a ngampa zel ngei ang. Sual dona kawngah tha thlah lo a mitinte kan tanrual a hun ta hle mai.


16 September 2018

Kan thenawm State Assam in India khua leh tui dik tak chhinchhiah hna a kal pui avangin Dan lo a ram dang atanga lo lut tam takin State dang an pan a, Mizoramah pawh engemaw zat rawn luh ruk tum man chhuah an ni a, tamtak man chhuah lohin an awm dawn a ni tih hi a hriat reng mai.

Dan lo a Mizorama hnamdang rawn lut ru dap chhuah hi YMA hmalakna pawimawh tak pakhat a ni a, hman zan lawka Branch hrang hrangin Permit neilo an dapna ah zan khat thilthu lekah mi 800 chuang zet man chhuah an ni a, man chhuah loh pawh tamtak an awm ngei ang. Hei hian hnam dang phalna neilo a Mizorama cheng hi an tam hle a ni tih a ti lang chiang hle.

In kalpawhna leh inbiak pawhna lamah hma kan sawn zel a, hei vang hian hnamdangte nen kan in chiah piah tulh tulh dawn. Chutih rualin a ruka Mizorama chen tum tam tak an awm reng dawn a ni tih hi kan hriat nawn fo a tha hle mai.

Heng phalna neiloa lo lutte hian kan eitur tamtak min ei pui a, kan thawhtur min thawh khalh a, kan sum tamtak min ei sak thin a ni tih hi hre nawn fo ila, kan tu leh fate tan a kan hnutchhiah tur tamtak min ei sakin min laksak thin a ni.

Hnamdang kan la lut a nih pawhin an ILP ringawt lo, an lehkha pawimawh dang kan en sak fo hi a pawimawh hle mai. Bangladesh atangin Assam kal tlang hian Mizoramah tamtak an rawn lut fo a, India khua leh tui ni lo, ILP nei si hi tamtak kan khawi angem? tih hi ngaihtuah tham a ni.

Tuna Central YMA in hma a lakna hian nghawng thatak a neih beisei ila, bansan mai lo a chhun zawm zel hi Branch leh YMA memberten kan tihtur a ni e. Tha thlahlo in aw!!


09 September 2018

Kum danga kan lo tih thin ang bawkin ‘Faina Hapta’ chu zoram pumah kan hmang leh dawn a, veng chhung ti faiin kan hnatlang leh suau suau anga, Hapta khat bak kan failo ang tih erawh a hlauhawm viau mai.

Faina Hapta kan hman thin hian kar khat chhung lek fai a kawklo a, fai reng tura kan tan a ngaihzia leh fai pawimawhna in zirtirna hapta a ni.

Kan khawlai leh vantlang hmunhmate a tawp a, a hnawk fona chhan hi kan inthlahdah vang a ni ber. Mahni inchhunga bawlhhlawh bawm pan hram hram thin khan khawlaiah chuan kan pan peihlo a, kan kawtkaia kan paih duhloh kha vantlang hmunah leh mi kawta paih kan hrehlo fo mai. Inchhung faina kan ngaih pawimawh ang bawkin khawlaiah pawh nung ila, kan veng chu a fai sawt ngei ang.

Ram changkang leh keini aia hnam changkang zawkte fai zia kan sawi fo a, in zirtirna atan pawh kan hmang nasa thin hle. Amaherawh chu heng hian awmzia a nei tlem hle niin a lang. Mi fai zia hriat ringawt avangin kan fai ve dawnlo a, fai tura an beih nasat zia leh an in thunun that zia kan hriat tel a, an tih ang kan tih ve a ngai.

Veng fai ni tur chuan dan kan zawm tlan a tul a, khawtlang inkaihhruaina leh in thununna kan ngaih pawimawh a tul. Tin, mahni awlsamna chauh ngaihtuahlo a, vantlang leh midangte kan ngaihtuah tel fo hi a tul hle bawk.

Incheina nalh tak, inchhung tawp hle si te, inchhung fai tak leh tui luankawr tawp tak a in hmeh hek lo, motor fai nalh tak leh kawngpui tawp takte hi a inhmehlo a, mahni kan in uluk a, kan fai ang bawk hian kan inchhung leh khawlaite hi fai ve se la, kan nalh sawt ngei ang.

Kar tin hi Faina Hapta atan chhungtinin i hmang ang u.


02 September 2018

Mizo khawtlang nunah hian hmanlai hun atanga tun thleng hian ‘Val Upa’ an pawimawh hle a, Val Upa nihna hi kum upat avang maia mahni in vuah ngawt chi a ni lo a, vantlangin tling nia an hriatte chauhin ‘Val Upa’ nihna hi an chang thei thin.

Val Upate thu hi Lalte pawhin an ngai chang hle a, tlangval leh tleirawlte entawn leh zah, an thu an hnial ngailoh an ni a. Hetiang nihna nei thei tur hian mihuaisen leh tlawmngai, rorel thiam leh midangte ti phur a hruai thiam tak nih a ngai thin.

Val Upate hi a hranpa taka ruat leh thlan nilo in, an nungchang leh mizia avangin vantlangin Val Upa en in an en mai thin. Ram chhuah leh hnatlan nikhua ah leh, rikrum thilah Val Upa thu hi an ngai chang em em a, khawtlang inkaihhruaina kawngah an pawimawh hle a ni.

Khawvel a lo changkang zel a, thiamna lo pung in khawtlang inrelbawlna tam tak a lo danglam ta a, Val Upa pawimawhna leh kan ngaihsanna a lo tlahniam telh telh a, amaherawh chu chhiat ni/that ni leh hnatlanga han chhuahkhawm nikhua ah hian Val Upa te bawk hi an lo pawimawh thin.

Khawtlang rorelna leh inkaihhruaina tha nei tur chuan thalaite hian kaihruaitu leh hruaitu, entawn tur tha an mamawh a, chutiang Val Upa mize nei chu kan vengah hian tam tak kan nei a ni. Heng mite hlutna hi kan vawnhim a, kan chawi nun zel hi khawtlang tan leh YMA kal zelna atan hian a pawimawh takzet a, mizo nun mawi vawnhimna leh kan hnam lung phum a nghinlohna tur pakhat a ni.

Val Upate hi khawtlang tan an in pe zo a, a tulna apiangah midang tan an ding chhuak thin. An ni hi vantlang tan ‘Makpa’ tha tak leh hlu tak an ni e.


26 August 2018

Kan fanu/fapa-te an lo pianni hi nu leh pa tan chuan kan hlim ber ni a ni awm e. An lo piang a, kan mal chungah kan chawi a, an han nuih theih chinah phei chuan min tihlim zual em em thin. An hmasawnna kan hmuh apiangin kan thinlung a hlim a, kan ta hi an ni hliah hliah thin.

An lo thang lian zel a, an tih theih chin apiangah kan lawm a, thian an han kawm te, sikul an han kal thei te leh inkhawm nuam an han ti em em mai te chu nu leh pa thinlung ti lawmtu an ni. Kan ta, kan fa, min tihlimtu leh kan beiseina an ni thin.

Amaherawh chu kan fa duat lai chu min chuhpuitu an lo awm reng tih kan ngaihtual pha ngailo. Hriatloh karin tleirawl nun chuan a rawn nang a, he khawvel sualna chuan kan fa duh lai ngawih ngawihte chu min rawn chuh pui tan ta.

Kan fate min chuhpuitu langsar ber pakhat chu Ruihhlo hi a ni. Kan fa duhlai min chuh puitu tha hi a lo chak kher mai. Kan hriatloh kar in ruihhlo chuan a phuar bet a, nu leh pa, u leh naute nena inkawm hlim ai chuan ruihhlo a in awm tlei an lo thlang ta a, chu ruihhlo chuan rukru tur te, dawt sawi tur leh tual hial pawh that duh khawp in a lo bawih hman reng tawh mai..! Nu leh pa kan rum a, fanu/fapa nei reng si in kan chang phak tawh si lo. Kan lawmna kan fa kha chhungkua leh khawtlang tan mi hnawksak a lo chang ta..!

Kan fate lak phet tumtu ruihhlo hi a huatthlala a, mi zawng zawng hmelma a ni. Tunah hian kan fate la him mahse engchen nge an him dawn kan hrelo. Tin, kan fate lo him pawh nise kan tuchhuante an him zo angem? He ruihhlo avang hian chhungkua an rum a, khawtlang a buai a, ram a chhe zo dawn. Ruihhlo awm lohna khawtlang leh ram siam hi mitin mawhphurhna a ni..Chu chu kan tu leh fa, kan thlahte tana kan duty a ni.


19 August 2018

Mihring hi mawhphurhna nei tura lo piang chhuak kan ni a, chu mawhphurhna hlen chhuak thei mi chu chhungkua, khawtlang leh ram tan mi tangkai an ni thin a, mahni mawhphurhna hrelo leh tih tumlo mihring chu mi hnawksak nih hun an nei mai thin.

Naupang a tanga upa ber thleng hian midangte lakah mawhphurhna kan nei a, rawng inbawlsak tawn a,in tanpui tawn hi kan mawhphurhna a ni. Tihtur chanpual nei vek kan ni a, kan tihtur, kan ko a tla kan tih theuh hian kan lo in tanpui tawn a lo ni. Chu chuan tanrualna min pe a, chhungkua,khawtlang, pawl leh ram in a rah a seng thin.

Chhungkaw tan tih tur kan nei a, kan telna pawl leh kohhran tan tihtur kan nei bawk. Heng kan tihtur hrang hrangte hi kan kal kawp pui thiam hi a tul hle mai, kohhran leh pawl tana kan tihtur kan mawhphur hna avanga chhungkaw tana kan mawhphurhna kalsan mai a diklo a, chutiang bawkin chhungkuaa kan mawhphurhn angaihthah siloa kohh ran leh khawtlang tana kan mawhphurhna hlen chhuah hi kan tih tur a ni.

Chutiang bawkin Kohhrana kan mawhphurhna avanga khawtlang thil ngaihthah mai a dik lo a, khawtlang thila kan mawhphurhna avang a Kohhran ngaihthah mai pawh a dik chuang lo. Kan nun hrualhrui pathum – chhungkua, khawtlang leh kohhran a kan mawhphurhna theuh hi ngaihthah bik neih hi a rem lo a ni. Ngaihthah bik kan nei a nih chuan kan nun chu a ke a bai ngei ngei ang.

Mahni chauh inngaihtuah hi thil dik a nilo a, midang lakah mawhphurhna kan nei a ni tih hi kan hriat fo a tha. Kan mawhphurhna kan hlen loh hian mahni chauhin kan tuarlo a, midang tamtakin an tuar thin a ni.


12 August 2018

Mitin hian ze bik hi kan nei roh a, chhungkhat pawh hi kan mizia hi a inanglo hlawm thin khawp mai. Mize hrang nei theuh si hi kan khawsak ho a ngai tlat lawi a, kan mizia theuh kan in hriatsak a, kan inzah tawn sak loh chuan anngeih taka khawsakho hi a harsa thin.

Mihring hi mahni tawk theuh a fing leh hria, chapo tak kan ni vek mai. Mi nuna inrawlh kan chak viau lai hian kan nuna midang rawn inrawlh ve chu kan remti lo fo a, midangte thurawn kan pek peih viau lai hian mi thurawn erawh kan lawm teh chiam lo fo. Hei hi midangte thlirna kan tawmpui thiamloh vang a ni thin.

Mahni ngaihdan chauh dah lian lo a, midang ngaihdan leh thlirna tawmpui thiam hi kan khawsak hona atan hian thil pawimawh tak a ni. Thil tha tih kan duh a, midang tanpui pawh kan duh thin. Amaherawh chu tanpui kan duh mihring kha a dinhmun leh rilru tak kan hriat chian a, kan zuk tawmpui phak si loh chuan an rilru kan ti na hlauh thei bawk. Thil tha nia kan hriatte kan tih dawn pawh hian mahni ngaihdan ngawta kal ngut mai hi a fuh lo fo thin.

Tu pawh mai hian buk lung khai hi kan awlsam khawp mai a, misual leh thalo ni a kan hriatte pawh hi an harsatna tak hre si lo hian kan buk tla zung zung mai a, lo diriam a, lo chek sawlh mai kan ching thin. Hetiang hi a tangkai lemlo thin.

Mihring sual avanga thi tur chhandam nan Pathian chu mihringte dinhmunah a rawn ding a, an hrehawmna zawng zawng a tawmpui a, Chhandamna a pe thei chauh a ni. Mi tan thil tha tih kan duh a nih chuan an mahni hre chiang tura an dinhmuna kan in dintir chhin fo hi a tul khawp mai.

Thil tha tih erawh i bansan lo ang u.


05 August 2018

Mihring hi a huho a cheng, inmamawh tawn leh thil neih intawm vek kan ni a, midang mamawhlo nia inhria kan awm a nih pawhin engtikah emaw chuan kan la mamawh tho tho dawn a ni.

Mimalin bungrua leh thil kan neih theuh ang tho hian thil tamtak intawm kan nei a, heng kan thil neih intawm leh kan inhman tawmte hi mahni ta bil kan en ang chiah a kan en thiam hi a tul takzet a ni.

Kan tuichhia leh thli kan luan khawm tirna luikawrte, nitina kan veivahna kawngpuite, kan mamawh kan lamna dawr leh bazar te, Pawisa lak chhuahna khawlte leh thil dang tamtakte hi a hmangtu vek kan ni a, a tawpa mualpho tur leh a chhiat a tuar tur chu a hmangtu mipuite kan ni a, chuvang chuan a enkawl leh a vawn fai hi khawtlang hruaitute leh tlawmngai pawlte tih tur a ni bik lo a, a hmangtu mipuite tihtur a ni.

Kan mimal thil kan tlo viau thin laia vantlang thil tlo theilo riau mai te hi thil mak tak a ni a, kan inchhung kan tih fai hliau laia vantlang hmunhma hnawk nuaih thinte hi thil inhmehlo tak a ni. Heng hi vantlang thil hi keimahni ta tho a ni tih kan pawm thin loh vang niin a lang.

Khua leh tui tha nih hi Kristian zirtirna leh mizo nun in a ken tel tlat a ni a, thil tha tihtur kan hriat rengte hi midang tih atana khek mai lo a, mahni ngeiin kan tih nghal mai hian kan khawsak hona leh thawhhona kawngah hlawkna tamtak a thlen ngei ang.

Khua leh tui tha nih hi thil harsa a ni lo a, mahni chauh inngaihtuah lo a midang ngaih pawimawh thiam kan zir hian khua leh tui tha kan ni mai dawn a ni. Mi tan thil tha leh tangkai kan ti theilo a nih pawhin mi dang tana hnawksak leh harsatna siamtu nihloh hi tum ila, chu chuan a tha lamin khawtlang nun a nghawng ngei ang.


29 July 2018

Kan ram inrelbawlna hian mimal zalenna min pe nasa em em a, he zalenna hian mawhphurhna a keng tel tih hrelo hi kan tam viau lawi si. Kan zalenna humhim tur hian Dan kan nei a, he dan hi kan zawm that chauhin kan zalenna hi kan humhim thei a ni.

Min hmutu leh min man tu tur an awmloh vanga dan bawh chhiat pawisa hauh lo, mi hmuh lai chauha dan zawm thinte avang hian mi tamtak dikna leh zalenna chu nek chep a ni thin. Khawtlang leh ram dan hi tha takin zawm ila, zalenna nawmzia hi a takin kan tem theuh thei ang.

Zalenna pek kan nih rual hian dikna chanvo pawh pek kan ni. Hemi rual chiah hian midang leh khawtlang, ram tan tih tur kan nei ve tih i hria ang u. Kan zalenna leh dikna chauh hria a, kan tih tur kan tih leh si loh hian midangte zalenna leh dikna chu nek chep in a lo awm leh thin.

Khua leh tui tha ni turin dan kan zawm a, midangte kan ngaih pawimawh hi khawtlang, ram leh hnam tan kan tih ngei ngei tur a ni. Mahni thil dim hle si hian vantlang thil chu dimna chang kan hrelo fo a, vantlang thil hi kan ta vek a ni tih hi hre fo ila, kan khawtlang leh ram chu a nuam sawt ngei ang.

Kan vengah hian vantlang in kan intawm, vantlang ta thil tamtak kan nei. Kawngpui, sikul, bazar, ATM Booth leh thil dang tam tak. Hengte hi mi pakhat fimkhur loh leh dawngdah avangin ho te ah a hmelhem thei a ni. A lo chhia emaw, a lo hmelhem a nih chuan a tuartu chu mipui, a neitute kan ni.

Dan pawisa lo tute avangin mi tam takin an tuar fo a, midang ngai pawimawh hauhlo tute avangin mi tamtakin an tuar thin. Khawtlang leh ram dan hi zawm ila, vantlang thil hi kan ta vek a nih tih hre bawk ila, dan in zalenna min pek hian awm zia a nei thei chauh ang.


22 July 2018

Tun hnaia NEET Exam result tih chhuahah khan Mizoram atanga exam zingah Chakma naupang chu pakhatna a ni a, kan mizo naupangten an tluk lo tlat mai. Hei hian mizo tamtak rilru a ti na a, mi tamtak a barakhaih a ni.

Keini mizote aia hnufual leh changkanglo zawk a kan ngaih hetia an rawn lawr ta zawk mai hi kan thalaite leh zirlaite tan ‘chona’ ni se la, kan hnam tan ‘warning’ a ni tih hria in tan lak lehzual nan hmang hlauh se la a duhawm hle mai.

Mizo khawtlang nun han thlir hian hmasawnna lama ke pen ai chuan ‘khawvel lem’ a cheng hi kan tam hle in a lang. Social Media lo thang zel hian min ti buai takzet niin a lang ta.

Social Media hmangin a lem in kan nung a, nuam leh nawm hmel ah kan buai a, kan nihna lem kan tar chhuak a, kan in ‘copy/paste’ kual vel mai mai chu a nih ber hi. Tuna kan zirlai leh thalai tamtak te hian an kawng zawh hi an hrelo a, an lehkha zir chhan an hrelo.

Ruahmanna leh hma thlir fel tak neia lehkha zir kan awm mang ta lo. An zir lai an zawh huna an eizawnna tur hrelo zirlai hi a tam zawk an ni ang. Chuvang chuan lehkhathiam hna hmulo kan in chhuah nghek nghuk mai a nih hi.

Tuna kan fate leh lo la piang turte tana kan rochun tur ram hi tuna kan nun dan hian a hril a ni. A lema nun kan bansan a, ngaih hlut tur dik kan ngaihhlut a, zirtirna dik kan in pek loh chuan kan thlahte hnena ram kan rochun tur hi chhe tak a ni ang.

Ram leh hnam tluk chhiatna atan thatchhiatna leh dawngdahna hi a tawk em em a ni. Hemi pumpelh tur hian a lema nunna khawvel atanga khawvel taka kan zuan chhuah a tul hle a ni.


15 July 2018

World Cup Football boruakin min chiah a, zan lama harh tak, chhun lama meng hlei theilo nih a awl hle mai. Mi faten lawmman lak tuma ram tana theih tawp an chhuah lai en chu a hmuhnawm a, lawmman pakhat in chuh an nih miau avangin theihtawp chhuah a bei theuh nimahse team pakhat chiah tan rangkachak no mawi chan theih a ni.

Lawmman pakhat inchuh maha theihtawp chhuah a ngaih chuan kan thawh dan theuh a zira kan seng tur lawmman hmu tur hian theihtawp chhuah a kan beih hi a va ngai nasa lehzual dawn em!

Mi tamtak in ‘hlawhchham’ nia kan inhriat fo na chhan pakhat chu theihtawp kan chhuah loh vang hi a ni fo! Kan hna leh zirlaia theihtawp chhuah si lo hian kan duh ang hlawhtlinna kan hmuh lohin rilru tih nat mai kan ching thin. Hlawhtlinna hi pakhatna emaw, pahnihna nih emaw atanga teh lo a, kan theihtawp kan chhuah hnu a kan thlen chin hi hlawhtlinna a kan pawm thiam a ngai takzet.

Theihtawp chhuah nia kan inhriatna pawh hi in bih nawn fo a ngai. A nuam kan tih chin leh peih tawk chin atang ringawt a beih hi a tawk lo fo a, chu mi piah lam, hrehawm pawh tawrh ngaihna hmun thlenga kan kal ngam loh chuan theih tawp kan la chhuah tak tak lo tihna a ni ang. Mi zawng zawng hi kan theihna a inanglo a, kan theihna zawn theuh ah erawh theihtawp kan chhuah chuan ‘a tha ber’ nih theihna kan nei vek a ni. Hotu kan ni vek theilo a, hna sang kan thawk vek thei heklo, hna sang thawk an awm laiin hna hniam zawk thawk an awm a ngai. Heng kan nihna theuhah hian a tha ber ni tura theihtawp chhuah hi kan tih tur a ni.

Tlang chhip a thing lian ber kan ni theilo a nih pawhin hlobet zinga a chawrno ber erawh kan ni thei ang.


08 July 2018

Upa in ‘Tawngkam tha in sial a man,’ an lo ti thin a, tawngkam tha dawn chu a nuam a, a lawmawm thin. Tawngkam tha hmang tura kan infuih fo lai hian tawngkam thalo hmanglo tura kan in fuih nawn fo hi a pawimawh ve tho mai.Tawngkam thalo in nghawng a neih pawi theih zia hi hria ila, tawngkam tha leh hawih hawm hmang tura in fuih fo hi a ngailo ang.

Mi chanchin kan sawi duh dan te, fiamthu kan thawh dante hi mi rilru tina thei a ni em tih hi ngaihtuah fo a tha hle mai. Tawngkam tha in Sial a man lai hian, tawngkam thalo in a nghawng hi man to tak a ni thei ve tho.

Kan fiamthu tawngkam te, mi chungchang kan sawi dan te, mi kan biak dante avang hian midangte zak takin kan siam thei a, rilru na, rilru hah leh hrehawm ti takin kan siam thei a ni. Mi chhungkua thlengin kan ti buai thei a, tawngkam tlemte hian nghawng nasa tak a nei thei.

Kan pi leh pute khan aia upa zah an ti na em em thin a, an in zirtir nasat ber pakhat a ni. Tun laiah erawh chuan aia upa zah dan tawk kan thiam ta lo viau mai. Kan pa rual zet pawh kan thian kawm a, na tak takin kan fiam bawrh bawrh ngam ta mai. Eng mi pawh ni se upa zawkte hian tawngkam mawi leh hawihhawm taka biak hi an phu em em a ni.

In kawm ho a, han titi ho hi chu a nuam a, amaherawh chu kan thusawi in a nghawng theih tur hriatthiam a tha hle mai. Mizo zinga tawngkam lar tak pakhat chu ‘in rel’ hi a ni awm e. Naupan lai phei chuan kan in sual phah fo thin! Kan han in kawm khawm tawh hi chuan tu emaw hi kan rel thuai mai zel. Puitlin hnu pawh in ‘in rel’ hi mi tamtak buai phahna a ni fo. Midang laka kan tawngkam hman hi fimkhur ila, kan buaina tamtak hi chu kan pumpelh ngei a rinawm.


01 July 2018

Pu Ruma chu a tlangval lai atanga khaw khat sual huai a sawi a ni a, ‘mihring hlauh ka neilo’ a ti pung pung thin. Mahse uite pangang a hmuh tawh chuan a tlanchhe duai duai thin. U Nunga pawh hi tlangval chawr che tak, tumah cho neilo a ni a, mahse an khua ah chuan zawngtah lawh huai ber a ni tho! An ni pahnih ah hian tu zawk nge huaisen zawk chu ni ta le?

Mi huaisen nia kan hriat hi a inanglo nuaih maithei a ni. Mi huaisen ber nia kan hriatte pawh hian hlauhna hi an lo pianpui ve tho mai. Hlauh zawng kan nei a, ngam zawng pawh kan nei vek mai.

Hmanlaia mihuaisen an tehna ber chu sa leh ral hmaa tlanchhe ngailo, khawtlang tana ding tlat ngamte kha a n ni . Hetiang tehna hi tunlai khawvelah hman vek a rem tawh chiahlo a, mihuaisen chu engtin nge kan hriat tak ang?

Mi huaisen hi hlauhneilo mihring tihna a nilo a, hlauhna pawh hneh a, thil tha ti tura inhlan ngamte hi mihuaisen chu an ni. Hetiang mite hian midang sawisel leh huat nih pawh hlau hle mahse khawtlang, ram leh hnam tan an pen chhuak ngam thin. Mahni in lum atanga huai ringawt hi huaisenna a ni lo a, mihuai chu a penchhuak thin.

Hmanlai kan pi leh pute khan mi huaisen an ngaisang a, chawimawina Nopui an hlan thin. Khatiang inchawimawina khan mi tamtak khawtlang tana pen chhuak turin a cho chhuak a, mizote chu hnam huaisen tiin kan insawi theih phah a nih hi.

Kan khawtlang tana sualna do a pen chhuak thinte hi mihuaisen, chawimawi phu an ni a, an mahni avangin khawtlang a muang a, hetiang mite hi kan chawimawi thiam a, an hnung kan dawl zel hi a tul takzet a ni.


24 June 2018

Kan hnam zia leh nunphung khai ding a, lan tirtu ber chu ‘chhiat ni’ a kan in buaipui dan hi a ni. Chhiat tawk an awm in nula leh tlangval, nu leh pa tih tur fel takin kan nei thlip thlep a, hei hi mizo hnam mawina leh danglamna a ni.

Hmanlai angin chhiat ni a kan tih thin tamtak tih a rem tawhlo a, amaherawh chu lumen, thlanlaih, khawhar lenpui leh chhiat tawkte puala buhfai khawnte hi kan la kal pui thei zel a, hengah hian kan tihtur theuh kan hriat a, kan tih hian mizo nunzia kan chawi nung a, tlawmngaihna pawh lantir a ni thin.

Lumen zana tlaivar an tlem viau chuan thalaite mualphona a ni a, thlanlai an tlem viau chuan tlangvalte mualphona a ni. Ruang awm ni leh khawhar lenpuina a thingpui sem tur nula an indaihlo a nih chuan nulate mualphona a ni. Chutiang bawkin chhiat tawkte pual a buhfai kan khawn thinte a lut tlem hle a nih chuan nulate tan mualphona a ni.

Chhiat tawk an awm in tlangval in tihtur bik an nei a, nula in tihtur an nei bawk. Tin, a huho a tih tur tamtak a awm bawk. Heng ah hian YMA hruaitute tihtur chauh a kan dah emaw, midang tihtur a kan dah vek chuan tih loh in a awm chang a awm mai dawn a, chu chu thalai zawng zawngte tan leh, veng tan mualphona a ni.

Mizo kan nih avangin kan tihtur theuh hi kan hriat atul a, midang tih atana dah mai lo a, mahni ngei chet kan tum chuan midangte a cho chhuak anga, naupang zawkte tan zirlai ropui tak kan hnutchhiah dawn a ni. Naupang zawkte’n ti tura kan duh chu chetzia in a tih dan kan entir hmasak a pawimawh hle a ni. ‘Ti rawh u’ tih ringawt hian an rilru kan hneh chuanglo a ni.

Kan hnam nun innghahna chu thalaite kan ni e.


17 June 2018

YMA Day chu khawchhe hnuai ah tluang takin kan hmang zo leh ta a, ruah surin a dan zawhloh YMA Member leh naupang thahnem tak mai YMA avanga kan han pungkhawm kha a hmuhnawm a, YMA ropui zia a ti lang chiang hle a ni.

YMA hi kum 80 chuanga upa a lo ni ta reng mai. A dintute leh hruaitu hmasa tamtakin mual liam tawh mahse YMA chuan a nihphung leh thiltumte hloh lo in tun thlengin a la kal thei a, mihringte chu danglamin, rilru hrang hrang pu thin mah ila, YMA chu nghet takin zofate tan a ding reng a ni.

Tuna YMA hruaitute leh memberte ngei pawh hian chuai hun leh liam hun kan nei anga, chutih hunah pawh chuan YMA chuan a ze ngai nen hmalam panin a kal zel ang. Kan nunhlui, kan la ngaih em em tur chu YMA thiltihna a kan tel thin lai hi a la ni dawn. Mihring an ral zel anga, YMA erawh hi chu zofate awm chhung chu a ral tawhlo ang.

Engemaw changin YMA hian kil hrang hrang atangin beih leh sawisel tawk thin mahse, chu’ng sawiselna chu a haw ngailo a, a khing let ur ur ngai hek lo, a nihna ah a chiang a, a tawpah chuan ‘YMA nge nge’ kan ti leh tho thin.

YMA hi ‘Tlawmngai Pawl’ tiin kan sawi thin. Hei hi mawi viau mahse YMA hi ‘Pawl’ ringawt a ni lo a, inzirna hmun a ni. YMA ah chuan nun dan mawi, tlawmngaihna, taimakna leh hnam nunzia tamtak mi in a zir chhuak a, midangte nena khawsak ho dan te, ram leh hnam hmangaihna rilru thlengin mi in an zir chhuak thin.

He pawl hi mizote tan chuan rohlu, tih bawlhhlawh thianglo leh kan ven him tlat tur a ni. Zofate min phuar khawm a, nghet taka zofate leh Mizoram tana ding thin, tanpui ngaite tanpuitu, kristiante awm khawmna pawl ropui a ni. A nghing ngailo ang.


10 June 2018

Ziaktu lar Mark Twain-a chuan ‘ngilneihna hi bengngawngte tawng hriat theih chhun leh mitdelte hmuh theih awm chhun a ni,’ a lo ti a, mi chunga khawngaihna leh lainatna nena thil tha kan tih hian thu a sawi ring em em a lo ni.

Tun hnaiah Tawngtai Bethel Camping Centre ah an harsa hle tih hria in Branch YMA chuan sum faia tanpui a rel a, hei bakah hian mi inphalten sum engemaw zat an thawh belh bawk a, hetiang rilru kan pu hi a mawi a, a mizo a, a YMA a, a kristian em em bawk a ni.

Mihringin hriatreng kan hlawhna chu kan tawngkam nilo in kan damlaia kan thiltihte hi an ni. Mihring aiin a thil tih chu a dam rei zawk a, a thih hnu ah pawh lungphun ropui tak angin mi thinlungah a cham reng thin. Mi chunga thiltha kan tih hi dam lai lungphun ang a ni a, amaherawh chu hmuh theih lung atanga siam nilo in, mite min hriatrengna ah a awm zawk dawn a ni.

Mihringte hi khawvelah kan awm reng dawn lo. Kan thil tih that pawhin hriat a hlawh kher lo thei. Amaherawh chu thil tha kan tih hian khawvel hi a siam tha sawt a ni tih hria ila, thil tha tih i ban san lo ang u.

Thil tha ti thintute avangin khawvel a nuam a, chutiang bawkin thil thalo titute avangin kan hrehawm thin. Kan thil tih azirin kan chhungkua, khawtlang leh ram a nuam in a nuamlo thei a, chhungkua leh khawtlang tinuamtu zinga chhiar tel nih hi thil ropui ber a ni.

Thil tha kan tihte hi a thi ve dawnlo a, kan thih hnu thlengin thu a la sawi dawn a ni. Midang chunga ngilneihna leh hmangaihna lan tir a, tanpui ngaite tanpui hi kan chanchin kan ziah dan ni thei se la a duhawm hle.

YMA hian chutiang hun tha chu min chhawp sak a sin.


03 June 2018

Kan pi leh pute hun ah khan hmeichhia hi an ngainep viau thin niin ngaihdan a awm fo a, ‘hmeichhia leh palchhia chu thlak ngai alawm’ tih te, ‘hmeichhe fin in tuikhur ral a kai lo’ tih tawngkamte chu tun thlenga kan hriat lar tawngkam tlemte zing a mi a la ni.

Kan pi leh pu-te khan hmeichhia leh mipa hna hi fel takin an lo then hrang a, hmeichhia chuan in lam hna zawng zawng an khawih a, thing tuah lak, tuichawi, buh den leh eirawng bawlte chu hmeichhe kuta awm a ni. Ram lam hna ah thu an nei ngailo. Chuvang chuan tuikhur piah lam, ram lam hna chung changah an inrawlh ve a thianglo a, eng anga hmeichhe fel leh fing pawh nise an finna kha tuikhur pelin an hmang thei lo a ni. Chuvang chuan ‘hmeichhe finin tuikhur ral a kai lo’ tih tawngkam hi hmeichhe ngaihnepna niin a lang lo. ‘Hmeichhia leh pal chhia chu thlak ngai a lawm’ han tih pawh hian chhungkua a hmeichhe pawimawhna a ti lang hle zawk in a lang. Hmeichhe thalo chu chhungkaw tan tur ang a ni a, chutiang awmna inchhung ah chuan naupang thatakin an sei lian ngailo.

Hetiang hmeichhia kawl reng ai chuan a aia tha a thlak mai kha kan pi pute ngaihdan niin a lang. Hmanlai nun ah mipat hmeichhiatna zalen viau anga ngaihdan a awm fo bawk thin. Mipa in nula thianghlim pathum emaw, hmeichhia hrim hrim pasarih tal a ngaih chuan pawla sai pumpelh turin an ngai thin an ti a, nula tan Pawla sai pumpelh turin mipa ngaihloh leh thianghlim taka nun a ngai thung. Chuvang chuan mipa tan nula ngaih chu thangchhuah tluk zeta harsa leh, a ti thei chhunte tan uan pui tham a ni thin. Kan pipute nunah khan ‘sex’ hi a zalen lo a, an lo invawng fimkhur em em zawk a lo ni.

Kan pipute dan tha kha chhawm nung a, kan nun pui tlat hi chhungkua, ram leh hnam tan himna tur a lo ni. Thlahtute an hmusit ngailo e.


27 May 2018

Thluak awl-thawng chu Setana hnathawhna hmun an lo ti thin a.Tunlai thalai zingah tihtur neihloh leh tihpeih neihloh vanga sual rawngbawl tamtak kan awm ta. A pawi hle mai.

Kan thluak mai niloin kan taksa pawh hi a awlthawng ta lutuk em tih hi ngaihtuah tham tak a ni. Ke in kan kal tlem a, kan thlan a chhuak ta manglo a, zanah thil tul ti ni silo in rei tak tak kan meng a, zingah rei tak tak kan mu leh a, mut kan kham chuang hleilo a. Mut khamlo tan chuan taima taka hnathawh hi a har khawp mai.

Mi taima chu kan ngaisang a, entawn kan tum lem hleilo a, an mahni anga taima a hlawhtling turin kan taksa kan enkawl peihlo a, zunthlum, thisen sang nei naupang te te ah kan tam ta hle a ni.

Taimakna pawimawhzia kan hria, taima thei tura mahni inthunun erawh kan peihlo fo. thalai zingah thatchhia kan pung a nih chuan kan ram leh hnam tan hian thil pawi tak a la ni dawn. thalaite hian eng hna pawh thawk hrehlo tura kan in lak ‘fit’ reng hi a tul hle mai. Kan rilru leh ngaihtuahna tat hriam ila, kan taksa i enkawl uluk ang u.


20 May 2018

Kan veng atangin zirna lama rahbi pakhat zo a, rahbi thar rap tur thahnem tak kan han nei thar a, a lawmawm takzet. Theirah hmin thatak lo turin a kak pui atanga a zar te lama lawn zel a ngai angin, heng kan zirlai duhawm taktakte hian zirna kakpui lawn chhuakin, a zar te lam panin an lawn tan dawn a ni a, an lawnna tur zar hi an thlan thiam a pawimawh hle dawn a ni.

Kan naute lawnna ‘zirna kungpui’ ah hian a zar tinah a rah lawh tur a awm a, a rah lo tur hian harsatna tam tak hneh ngai a awm. thenkhat awlsam taka an lawn theihna ah thenkhat chu dawm kan ngai, nawr luih ngai leh tanpui ngai an awm ang. A pawimawh ber chu a rah lo tura hmalam pan hi a ni.

He zirna kungpui ler ah hian hriatna, thiamna leh finna chu mi taima, tumruh leh huaisente tan lawh turin mawi takin a rah a, chumi rah lo tute chuan an thiamna leh finna rah chu an ei a, midangte tan malsawmna an pe chhuak thin.

He finna leh thiamna rah lo tura beitute zingah hian rahbi han pelh te, a tang hnawkin a dal avanga han bahlah deuhte engemaw zat an awm thin. Heng mite pawh hian an rahbi an siam thar a, an mahni daltu thing tangte an vai kian hnu chuan rah duhawm tak seng turin hmalam an pan thei thin.

Kan nauten he zirna kungpui a thiamna leh finna rah lo tura an beihna kawngah hian an hnung lam atanga kan lo dawm te, an rahbi kan lo siamsakte, kan lo nawr kan leh kan lo pawh chhoh a, kan fuih phur a ngai fo thin. Chutiang ti thei tur chuan an nu leh pa, an chhungte hian kan fate/naute kal kawnga daltu awm leh, an harsatna hre tura taimak kan chhuah fo a tul hle a ni. An dinhmun kan mitmei reng a, kan venpui reng loh chuan an tla palh mai ang.


13 May 2018

YMA flag rawng pathum – a sen, a var leh a dumte hi Mizo in kan rawng neih hmasakte an ni, an ti a. Hemi mai bakah hian heng rawng pathumte hian awmze thuk tak a nei a ni.

Rawng sen hian YMA chu pawl lar tak a ni tih a entir a, hei hi a dik hle. YMA aia pawl lar hi Mizoramah a awm lo a, YMA tello chuan kan khawtlang nun pawh hi a kal theilo a ni ber e. A bik takin Chhiat ni ah YMA tello chuan kan che theilo a, YMA memberte inpekna avangin kan mualphona tur tamtak kan pumpelh thin.

Rawng var hian YMA chu pawl thianghlim, politics rawng kailo, mitin huapzo a nihna a entir. ‘Mitin Huapzo’ han tih hian member atan mi zawng zawng a huapzo tih lam erawh a kawklo a, YMA hian mitin tan, thlei bik neilo in hna a thawk a ni tih a kawk zawk.

Mizo hnam leh ram tan thlei bik neilo in huai takin a kal a, a inkaihhruaina ah hian politics kaih luh a remlo tih hi kan hriat nawn fo a tha a, YMA hmalakna leh politics lo suih zawm phet kan tum a nih chuan YMA nih phung hi kan hre tawklo a ni ang.

Rawng dum ve thung hi chuan YMA chu mi chan haite leh lusunte thian a nihna a entir thung. YMA hian mi lungngaihna a tawrh pui a, tanpui ngaite a tanpui thin. Mizo nunmawi tlawmngaihna lantir in pachhiate a chawi kang a, lusun faten an thlamuanna ber pakhat a ni.

Heng YMA Flag rawng pathum te hian YMA nihphung leh zia chiang takin a tar lang a, heng rawng pathumahte hian YMA chu a in nghat a ni. YMA hmalakna sawisel a, thlei bik nei leh politics hmanrua a hman tum thinte hian YMA nihna an man chianglo a ni. YMA member te hian YMA Flag rawng awmzia hi kan hriat reng a, kan nunpui tlat hi YMA tan leh kan hnam tan thil tul tawp khawk a ni e.


06 May 2018

Khawvel changkanna leh hmasawnna avang hian kan hnam nun leh tih dan phung tamtak a inthlak tawh a, a la inthlak zel dawn ni pawhin a lang. Kan hnam nunze mawi tamtak chu kan kalsan hret hret a nih hi.
Kan hnam nunze pawimawh tak leh hnam dang aia danglama min siamtu, mizo nihna pho langtu ber ni thin chu kan inneih dan, mitthi kan sawng bawl dan leh chhiatni/thatni a kan in buaipui dan hi a ni. Hengah hian thil tamtak kan kalsan tawh a, kan la kalsan zel pawhin a rinawm.
Amaherawh chu kan hnam nunze siamtu, la vawn nun reng theih si hi kan kalsan palh angem, tih hi kan ngaihtuah a tha khawp mai. Tunlaiin Aizawl veng thenkhatah ah chuan hlawhfa in thlan an laih tir tawh a, tlangvalten lusun khawhar an riahpui tawh lo a, nula tlangvalten chhiatni /thatni ah tihtur an nei tlem sawt ta hle mai.

Kan vengah erawh chuan YMA member tlangval leh val upaten thlan kan la lai a, nula leh tleirawlten mitthi buhfai kan khawn a, khawhar inah thingpui lumin kan len pui a, kan theih tawkin mizo nun zemawi kan la lantir thei a, kan hnam nunze mawi tak chu kan la vawng nung thei zel a ni.

He’ng kan chin than (thlan laih,etc) nunze mawi tak hi kan ban san a, a thlakna tur thil dang kan zawng a nih chuan kan hnam nunphung tha tak chu kan hloh dawn a, YMA hlutna pawh a tlahniam ngei ang.

Thlan lai thinte, mitthi buhfai khawn thin nula/tleirawlte, khawhar ina thingpui lum thin leh khawhar lenpui thin nula/tlangvalte avang hian kan hnam nun mawi tak chu vawn himin a la awm a, YMA pawhin hlutna a la nei a nih hi. He nun mawi tak hi a theih chhung chu kan vawn tlat a duhawm hle mai. Chu chu mizo hnam tan a ni a, YMA tan a ni bawk.


29 April 2018

April ni 26 khan Tlabung leh Chawngte ah CYMA kumpuan ‘Ram leh Hnam Humhalh’ hawngin CYMA leh Sub-Headquarters hruaitute an kal a, chakma chung chang kan buaipui em em laia hetianga Chakma tamna hmuna programme kan hruaituten an hmang hi Chakma kara khawsa kan unaute tan chuan a thlamuan thlak anga, ram leh hnam humhalh boruak chhem alhna tha tak mai a ni ngei ang.

CYMA hian Chakma te hi ram leilung fa ah a pawm ngailo a, hei hi anni chuan theih tawpa bei letin a theih ang angin tan an la a, mizote chen peih lohna ah cheng in an pung chak hle a, an chheh vela kan unaute chu thiam takin an nek chep hret hret a, zirna lamah nasa taka tan la in mithiam tak tak an rawn chhuak ta phuk phuk mai. Kan chanvo hial min chuh pui ta. Hei hi mut mawh hnar mawha kan neih a hun ta.

Chakmate hian ram mumal an neih loh avangin a nek nuam ber mizote min nek in, kan ram chhungah ngei tan an khawh a, an mahni do zawnga kan hmalaknate chu min tih mualpho nan an hmang zung zung mai. An lak atang hian kan ram leh hnam hian humhalh a ngai ta a nih hi.

Chakmate hian an hamthat nan hmanraw thlan an thiam hle a, keini lah awmze neilo in kan che leh buan buan mai thin a, fing tak leh remhre taka kan chet ve a hun ta niin a lang. Hemi kawngah hian CYMA hian tum fel tak, hlawhtlin pui theih ngei tur a neih a, a hlawhtlinna tura ruahmanna thatak a siam a ngai khawp mai.

YMA tha ti chak tur hian Chakma chhehvela cheng kan unau, Lai leh Mara thalaite pawh kan thawhpui thiam a tul hle ang. Chakma avanga Mizoram hi then hran a nih loh nan YMA hmalakna hi kan thlawp theuh a pawimawh takzet a ni.


22 April 2018

Branch YMA in ‘Kumpuan Hawn’ programme a lo duan tawh chu kohhran hrang hranga thalaite programme thlir a nih hnuin April 24 zan dar 7:00 a neih turin sawn a ni a, ruahmanna rei tak lo kal pui tawh sawn hi thil awlsam a ni lo a, chanvo nei tura ruatte phei chu an zahawm hle a ni.
YMA hian kohhran leh pawldang nena remtaka kal hi a duhthusam a ni a, memberte kohhran leh pawl danga an inhmanna dal zawnga hma lak hi a duh ngailo a ni.

YMA memberte’n kohhrana an rawngbawlna leh YMA a an tihturte rem taka an kal dun pui theihna a nih beiseiin Kumpuan hawn programme pawh hi sawn a ni ta a, heihi memberte pawhin hrethiam a, YMA progrramme hi kan ngaihpawimawh a duhawm hle.

Kumpuan hawn programme hi CYMA pawhin a ngai pawimawh hle a, ram leh hnam humhalh tur chuan kan ram leh hnam humhalh a ngaihzia te, ram leh hnam hmangaihna rilru thalaite leh thang lo thar zel tur te hnena tuh hi a kan hna hmasa ber a ni. Chumi atana kan inbuatsaihna pakhat chu he kumpuan hawn programme hi ani.

Kan ram leh hnam hmangaihtu hi mi tamtak an awm. Chu’ng mite zai khata luan tir a, lungrual taka ke pen tirtu chu YMA hi a ni. Ngaihdan leh duh dan hrang hrang neite min phuar khawm a, ram leh hnam hmangaihna thinlung thalaite zingah a chawk tho mek ani.

Kan ram leh hnam tana kan tih theih hi te lua a awmlo a, a taka pen chhuak a thawktute thlawp zawnga rilru kan lo pek te, thu kan lo sawi ve te hi a tangkai em em ani.

Kan thlah lo la awm turte hmakhua chu kan kutah hian a awm mek a ni. An tan khawvel dinsak hi kan mawhphurhna a ni a, Mizo hnam hmakhua chu kan kutah a awm e.


15 April 2018

April ni 20 zan hian Kum Puan hawnna leh member thar lawmna hun kan hmang dawn a, he hun hi YMA member-te chuan kan ngaih pawimawh a tha hle mai.
YMA member hi kumtin membership fee khawnin lak thar a ni thin a, member tamtak hi chuan fee kan pek leh pek lohte, member atan ziahluh kan nih leh nihlohte hi kan bengkhawn lemlo in a lang. Kan chhungte hian YMA member atan minlo ziaklut lo in, kan kutah dah ta se la, member nilo tur hi kan awm fur awm a sin.

Thalaite’n YMA member ni sa a kan inngai ringawt pawh hi a ropui a, member atana ziah luh kan nih leh nihloh pawh ngaihtuahlo a ‘YMA member ka ni’ kan han ti vek duhte hian he pawl hi pawl ropui, mi zawng zawng huapzo a nih zia hi a tar lang zawk a ni.

YMA hi kan ram leh hnam, kan khawtlang tan a ding a, midang tana thil tha tih hi a thiltum leh innghahna a ni. Mi zawng zawng tan thian a ni a, mizo nun ze mawi leh nundan tha kan zirna hmun a ni. Chuti ang pawl ropuia member nih hi inchhuanna tham a ni a, member nih ringawt pawh hi a thlamuan thlak a ni.

YMA hi a member ni kherlo pawhin an thlamuanpui a. Amaherawh chu chuti ang pawl ni reng tur chuan chak taka a awm reng a tul a, chumi atan chuan kan intih phur tawn a, kan infuih thar fo a tul thin.

YMA member nih vanga thlamuang taka awm ringawt hi a tawklo a, a chetvelna leh hmalakna kan ngaihven a, kan phak tawk ang zela tel ve hi kan tihtur a ni. Chu chuan member dangte leh hruaitute tan phurna a thlen a, pawl chakna bul a lo ni thin.

Chu vang chuan Kum Puan hawnna ah i kal vek ang u aw..


08 April 2018

Mother Teresa tawngkam hian rilru a hneh hle mai. ‘Pathian hian hlawhtling turin min ko lo a, rinawm turin a ni min koh ni’ a ti. A hmaa tihtur awm chu rinawm takin a ti mai a, mi tamtak ngaihdanah chuan nu hlawhtling a ni a ni tho mai.

Hlawhtlinna hi kan duh vek a, hlawhtlinna chu retheihna pumpelhna leh kalsanna niin kan ngai a, mi hlawhtling kan tihte hi an thilneih ah kan teh a, hlawhtlinna kawng nia kan hriat kan zawh suau suau a, rinawmna pen bo san thak khawpin hlawhtlinna kawng nia kan hriat chu kan zawh hrehlo fo thin.

Hlawhtlinna hi rinawm taka thawh chhuah tur a ni tih hi kan pawm loh chuan kan chhiatpui ngei ang. Rukru in a thil ruk dan tur ruahmanna a siam anga a tih theih avangin ‘mi hlawhtling’ tia chhiar chi a ni lo ang. Ruk ruk vanga sum ngah tak tak khawvelah mi tamtak an awm. A tawpah he’ng mite hi mi hlawhtling anga kan chhiar leh si a nih chuan an mahni ang lek kan ni tihna a ni.

Hlawhtlinna chu thawhrimna piahah a awm a, he thawhrimna hi rinawmna nen a ni tur a ni. Thil thalo ti tura thawkrim takte hian rinawmna an tlachham fo a, hetiang mi hian sum leh pai ngahin nuamsa hle mahse mi hlawhtling huanga khung an remlo. Mother Teresa vek hian ‘Pathian hian hlawhtling turin min phut lo a, theihtawp chhuah tur erawh chuan min phut a ni’ a ti. A maherawh chu rinawm taka theihtawp chhuah thinte hi an hlawhtling nge nge thin.

Hlawhtlinna hi thil neiha teh ngawt theih a nilo a, kan neih dan atanga teh fo hi kan inzirtir dan ni zawk se la, rinawmna chu kan fate leh thangthar zel te hnenah kan tuh thei ang. Ngaihhlut tur diktak hi i inzirtir nawn fo ang u.


01 April 2018

Kan khawtlang nun tibuai a, harsatna thlentu zingah zu leh ruihhlo hi sawi hlawh ber zing ami a ni awm e. A kaihhnawih thil tamtak avang hian vantlang nun ti ralmuanglo tu lian ber a lo ni ta.

Zu leh ruihhlo avanga thil thalo lo thleng thin hi ‘chhungkaw mal buaina’ mai ni tawhlo in ‘vantlang buaina/harsatna’ a ni tih hi kan pawm a hun takzet a ni.

He harsatna hi kan thlir dan erawh a dang thei viau mai. Thenkhat chuan an chhungkua a nghawngloh avangin an ngai pawimawh viau lo thei a, thenkhat chuan khawvel thang zelin a ken tel, a tireh tura beih chu tha sen thlawnna mai nia ngai an awm bawk. |henkhat, vei em em si, a tihreh dan hre mai silo a awm theih bawk.

Chutih laiin mahni phak ang tawk tawka vei a, thawk an awm mek bawk. Khawtlang nuna thil thalo siamtha a, ti reh tur chuan kan ngaihdan leh pawm dan, ngaihhlut zawng leh kan nunphungte thlak a ngai thin. Amaherawh chu ‘inthlak’ hi thil harsa tak mai a ni. Chumi avang ngawt chuan khawtlang tana thil thalo kan dona kawngah tha kan thlah hi a thianglo a ni.

Khawtlang nuna harsatna leh buaina thlentu hi kan tirem thei rihlo a nih pawhin kan ti tlem thei a ni tih hi i pawm ang u.

Khawtlanga sualna leh harsatna tamtak punlun zel hi mitha leh fel ten an vei loh vang leh, a do zawnga ke an pen loh vang a ni ve fo tih hi kan hriat tel a tul hle mai.

Vawiin hi Easter Sunday a ni a. Lal Isua thawhlehna, mitthi khaw kulh hneha nunna kawngkhar a hawnna, kan tan nunna khua lo var ta lawma kan hlim hle lai hian nunna a luh dan tur hrelo tam tak an awm tih i hre nawn fo ang u.

Kan thawhloh vang hian kan vel ah mi tamtak an boral mek a ni.


18 March 2018

Mipa tihtur pawimawh tak leh tih makmawh chu a chhungkua, khawtlang leh ram venhim a ni.

Kan khawtlang leh chhungkua a lo him a, kan fate’n kawng diklo an zawhlohna turin pawl hrang hrangin hma kan la a, heng kan hmalakna hi zai khata kan kalpui theih nan Joint Action Committee (JAC) kan din a, he Committee hi sual dona leh kawngdik inkawh hmuhna tura pawl hrang hrang hmalaknate khaikhawmtu a ni.

Kan duhzawngte tih hlawhtlinna tura pawl han din mai chu a harsa lo. Amaherawh chu kan duhzawngte ti hlawhtling tura ruahmanna siam leh thawh hi thil awlsam a nilo. |anrual a ngai a, in pek a ngai a, in tih phur tawn a ngai fo thin. Eng pawl mai pawh hi mi hrang hrang, duh leh tum thuhmun nei ten, an thiltum leh duhzawng tih hlawhtlinna atana an siam a ni a, chumi atan chuan pawl chuan ruahmanna siamin hna a thawk thin. Amaherawh chu an tanrual leh si loh chuan an hlawhtling ngailo ang.

Kan khawtlanga sualna hrang hrang do tur leh, khawtlang muanna atana hna thawk a, kawng dik min zirtir tura kan pawl din JAC ngei pawh hi a thil tumte hlawhtling tura kan duh a nih chuan kan tanrual a, hmalakna tur a chhawp chhuahte ti hlawhtling tura theih tawp kan chhuah tlan a ngai hle. Naktip maiah hian JAC hruaitu tur kan thlang dawn a, tlem lutuk avanga inthlan theihloh khan phurna aiin hnualna a siam a, kan thlan chhuahte tan pawh mi tlemte thlan nih ai chuan, mi tamtak ten an thlan nih chu phurna leh huaisenna siamtu a ni ngei ang.

He inthlanna a kan kal hian ringawt pawh midangte phurna a pe thei. Sual dona leh khawtlang tana kan beihna kawngah kan tel ve a ni tih lantir nan JAC inthlan hi i ngai pawimawh ang u. Chu chu kan tihtur pawh a ni e.


11 March 2018

Hmasawnna hrang hrang vanga kan nunphung leh khawsak a danglam chhoh zelna ah hian inbiak pawhna hmanrua thang chak lutuk avanga kan chhungkua, khawtlang leh hnam nun danglamna hi a nasa ber hial awm e.

Hmasawnna in a ken tel zinga pakhat ‘Social Media’ thlipuiin min nuai a, a tello in kan awm thiam ta manglo chu a nih hi. Kan hman dan erawh a inanglo hlawm viau lawi si. Thenkhatin mahni hna leh tihtur thulh thak khawpa social media kan hman laiin thenkhat chuan sumdawn nan, inzir nan leh thil tangkai tak tak atan an lo hmang a, a hmang thiamten an chhawr em em laiin a hmang thiamlo erawh chuan an chhiatpui thin. Social media hi mahni inthup chunga rual pawl nan leh mahni vei zawng sawi chhuah nan kan hmang nasa hle mai. Hmelchhe tak pawh hmeltha taka chhuahtu, mi sual tak pawh fel hmel taka lantirtu, hre tlem tak pawh thil hre ber anga lantir theitu, mi tamtak tan hmaikawr thatak a ni. Hemi a nih vang tak hian a thalo leh dan bawhchhe zawnga hman a awl em em mai a, mi tamtakin mi pawi sawi nan leh mi rilru tihnat nan an lo hmang tawh thin a ni.

Heng kan in biak tawnna hmanruate hi sumdawnna vek a ni a, mi sumdawnna hmanga mi pawi kan sawi emaw, dan kan bawh chhia emaw, thil thalo tih nan kan lo hmang a nih chuan a hmuchhuaktute finna chu kan phalo hle tihna a ni ang a, fing turin kan in zir hle a ngai tihna a ni.

Khawvelah hian thil thar a lo chhuak zel a, a la rawn chhuak zel bawk ang. Heng thil thar, pawm nuam leh atchilh theih tak tak lo chhuak mekte hi chhiatpui lo a, tangkai taka kan hman theihnan mahni lam kan insiam rem fo a tul thin. Mahni kan insiamrem thiamlo a nih chuan kan chhiatpui ngei ang le. Thil thar mila insiam thar zel kan zir hi a pawimawh takzet a ni.


04 March 2018

Chapchar Kut chu hlimtakin kan hmang zo ta a, hemi ni kher hi chuan kan mizona rilru a tho a, kan hnam nunphung leh chin thante pho lang thei ang berin kan inchei a, duhsakna kan inhlan tawn a, mizo nih a nuam zel e. Khawvelah hian ram leh hnam tamtak an lo dingchhuakin an lo ral tawh a, hnam tenau ral mai hlauhthawnawma awm engemaw zat an awm mek bawk. Ral mai hlauhawma hnam siamtu chu hnam ze bil (culture) hloh hi a ni.

Kan hnam ze bil hi kan hnamin kan chin than hrang hrang in a siam a ni a, mitthi kan sawngbawl dante, kan inneih dante, kan Pathian biak dante, kan khawtlang nun phung leh tawngte hi hnam ze bil leh nunphung siamtu an ni. Heng zinga pakhat lek pawha danglamna thleng hian culture a nghawng thin.

Hnam changkang zawk leh hnam lian zawkten an hnam nunphung an pu darh chak em em a, hei hi hnam tlem zawkten changkanna-ah ngaiin kan entawn a, kan hnam nun zia kan kalsan hret hret thin. Hmasawnna avanga hnam nunzia tih danglam ngai awm thin mahse tih danglam theihloh ze nghet kan neih tel erawh a tul takzet.

Hnam tin hian danglam bikna kan nei vek a, chumi humhim thiamlo apiang hnam ding chhuak an awm ngailo. Mizo chu Mizo hnama min siamtu a awm a, chutak chu nghet taka kan vawn tlat chuan kan ral ngailo ang. Mizo hnam incheina inbel ringawt hi mizo nihna a nilo a, mizo kan nihna tilangtu chauh a ni zawk.

Incheina chu a hunlai mil zelin a danglam a, Siapsuap ha thin khan bawhtah kawr, kawrchei a lo ha ta a, mizo a nihna a danglam lo. Mizo kan nihna siamtu chu chhungril lama kan duh zawng leh ngaihhlut zawng te hi an ni. He kan mizo rilru hi hnam dang rilru mila kan thlak vaih chuan mizo nihna kan hloh ngei ang le.


25 February 2018

In satu chuan in tha taka a sak puitlin theih nan hmanrua a thlan fimkhur a ngai hle a, hmanraw thlan tur tamtak zingah hmanrua a thlan dikloh chuan a in sak chuan a tuar dawn a ni. Chhungkua pawhin hmasawn kan tumna kawngah hmanraw dik kan hmanglo a nih chuan a tawpah chhungkaw tan a pawi thin.

Mi thenkhat chuan an thiltum tih hlawhtlin nan eng hmanrua pawh hman an pawisa lo a, tualthah, rukruk leh mi pawi sawi pawh an hrehlo fo. Kan thil tum tih hlawhtlinna atana kan hmanraw thlan leh hman chu lo dik pawh ni se a hmangtute’n kan hman thiam a, a hman dan tur diktaka kan hman a la pawimawh ta cheu mai.

Hmanraw dik hmang tur chuan thutlukna dik kan siam a pawimawh a, kan hmanraw hmanin a nghawng turte, a hmangtu tur thiamna leh finna thlengin chhut peih a pawimawh hle. Kan hman thiamloh leh zawh loh tur hmanraw tha ber nia lang thlan ngawt kha a fuhlo thei. Kan tum tih hlawhtlinna atana hmanraw thlan ah hian thutlukna dik kan siam hi hlawhtlinna bul a ni.

YMA pawh hi tum fel tak neia din a ni a, a tum tih hlawhtlinna atana duhthlan tur tamtak kan neih zingah hmanraw dik leh tlo kan thlan thiam a pawimawh hle ang.

Tanpui ngaite kan tanpuina kawngahte, kristian nundan tha chawisan kan tumna ahte, ram leh hnam humhalh kan tumna kawngahte hian kan hmanraw thlan hi a dik em? A hmangtute hian diktakin kanhmang em le? Kan tum tih hlawhtlinna atan hian kawng tamtak a awm thei a, kawngdik kan thlan hi a pawimawh hle.

YMA chuan a thiltumte ti hlawhtling turin ruahmanna leh inkaihhruaina a siam a, heng hmanruate hi diktaka kan hman a, inkaihhruaina leh ruahmanna anga chet leh nun hi YMA memberte tih tur a ni.


18 February 2018

YMA in chhiat tawh thulha khawtlang mipuite rual khai taka kan kal theih nan leh, kan in tanpui tawnna atan kumtin pawisa kan khawn thin a, hei hi chhiat ni bika hman tur a nih avang hian ‘Chhiatni Fund’ tiin kan sawi mai thin.

Chhiatni Fund hi YMA pawisa nilo in mipui ta a ni a, YMA sum vawngtuin a kawl mai a ni. Sum dang nen khawih pawlh lo in, chhiat tawk an awma hman turin a hranpa liau liau a vawn tlat a ni.

Chhiat tawk kan awmin kuang siamna senso, lumentute leh thlan laitute ei leh in atan hian sum a ngai hnem hle a, a kaihhnawih bungrua engemaw a lo ngai bawk a, heng senso-te hi YMA chuan Chhiatni Fund atang hian a pe thin a ni.

Chhiatni Fund hi kumtin khawn a ni thin a, kan vanduai zual tum phei chuan indaihloh chang a awm a, YMA sum pui hman mai emaw, kum laklawha khawn belh mai ngaih chang a awm fo thin.

YMA chu tanpui ngaite tanpuitu a nih angin hetiang pe theilote hi pe turin a phut lui lo a, rethei leh harsa zualte chu a awl fo thin a ni. Chutih laia mi tamtakin bi tuk aia tam kan han pe te hi a ropui a, a mizo a ni. Midangte kan tanpui a ni.

He kan sum thawh khawm hmang hian chhiat tawk kan awmin engkim YMA hian a buaipui a, lusun chhungte senso tur leh tha sen tur tamtak kan lo chhawk a ni.

Chhiatni fund pek hi kan tanrualna leh inhmangaihna lantirtu a ni a, kan chhungkua ah hman ni lo se tih hi kan duhthusam theuh a ni ang. Mahse hman hun a la awm theuh dawn a, chumi hun atana kan lo invenna a ni tih kan hriat a tha hle mai. He fund hi khawn laia lo remchanglo kan awm a nih pawhin inthlahrun tur a ni lo e. Remchan hunah a pek theih reng a ni.


11 February 2018

Zan a rei tulh tulh a, tih mak mawh in min tur tulh tulh a, he column zimte ti khat tur hian thu leh hla kan vai a, hul tlat chang hi tawng thei zet tan pawh hian a lo awm a nih hi.
Ni e, |awng leh a tih a tih hi chu a dang a lo nih hi. |awngkam a thil tha sawi tur hre zet si leh , a taka han tih dawn a thei leh miah si lo hi a lo awm theih dawn a nih hi.

Kan kawt kai a thil thalo leh vantlang tana hnawksak hre thei hle si hian a tih kianna lamah chuan tha hi ka lo thawh mang reng reng hleinem maw le. Tha han thawh tak mai hi ka tan harsatna a lo ni.

Thil tha chu ka hria, mahse mi tih a tan ka khek a, mi hian ka tih atan khek ve ta vek se thil tha ti tur hi kan awm angem le?

Thil tha ti tura siam ni si hian thil thalo ka ngaihtuah a, tha leh thalo chu ka ngaihdan in ka thliar hrang a, mi ngaiha tha ni a ka hriat angin nun ka tum a, hmingthat leh fak hlawh tum reng rengin that ka chhuah a, ka tha leh zung mai bakah ka neih chhun thlengin sen ka huam a, mahni hmasialna mai zawk a lo nih hi.

Tlawmngai ni a ka lo inhriatna hi keimah ka inhmangaih vang vek a lo nih hi. Mite fak leh chawimawi beisei rilru rana ka chetna hi tlawmngaihna nilo in mahni hmasialna a lo ni. Tlawmngaihna nunpuitu chu a tlawm a, mahni hmasialna a neilo a, midang tan a nun hlan a huam a, a rinawm a, a taima thin. A mah avang hian zo nun a mawi a, khawtlang a thlamuang thin.

He nun mawi tak hi zir ka ngai a ni. Mi tlawmngaite tlawmngaihna avang hian ka thla a lo muang a, kan khawtlang a muang a, he nun hi a va mawi em..!

He nunmawi leh tha chawi nungtu, midangte zirtirtu YMA hi awmlo ta se chu mal takin ka khawsa anga, ka khua a har ngawt ang.


04 February 2018

Mizo nunphunga mawi em em mai chu ‘Aia upa zah’ hi a ni. A hming ringawt pawh hi a mawi a, kan pi leh pu te hun lai a an in zirtir nasat ber a ni reng a ni, chuvang chuan naupang zawkte’n aia upate an zah thiam hle reng a ni.

He nun mawitak nei tur hian zawlbuk atangin an bei nasa em em a, naupang chu thingnawi fawm rual a lo nih in zan tin zawlbukah thing an keuh tir a, tlangval ho kaihhruaina hnuaiah thu awih, aia upa zah leh taimak an zir tan a. Thu awihlo chu tlangval hoin an ‘sawi’ hial thin a, tumahin chutiang chu an huat pui ngailo.

Chutiang inzirtirna hnuai selian naupang chu an tlawmngai a, an huaisen a, aia upate an zah thiamin an taima fo thin. An lo seilen hnuin khawtlang muantu an lo ni thin. Hei hi ‘zonun mawi’ kan tih fo chhem alhtu chu a ni.

Ram lama hna thawhna ah te, ei leh in kawngah te, hnatlan nikhua ah te aia upate zai an ngai em em a, tawngkam leh thiltihin an zah zia an lantir thin. Tar chaklote an zah em em a, putar zu khawn haw kal pai tak ngial pawh kawng an kian tawk tawk zawk thin a ni.

Kan pi leh pute hun lai khan mipa naupang chuan nun dan mawi tinreng tlangvalte hnen atangin an zir a, hmeichhe naupang pawhin an u nulate hnen atangin hmeichhe tih tur leh nungchang mawi an zir thin. Nula leh tlangvalte chu naupangte entawn turin an nung a, chu nun mawi tak chu tun hnu ah ‘zonun mawi’ ti a ko in kan au ta lawm lawm mai mai chu a nih hi.

He zonun mawi hi liam lo a vul reng tura kan duh chuan YMA memberte hian naupang zawkte zir tlak a kan nun a ngai a, keimahni atang hian aia upa zah dante, taimak leh tlawmngaihte zir se la, auh auh ngailo in ‘zonun mawi’ chu kan zingah a cham reng mai dawn a ni.


28 January 2018

YMA hian ram leh hnam a vei a, ram leh hnam tan tha a thawhna kawngah chak zawka a thawh theih nan kum puan hmangte in hma a la a, a rah chhuah chu kan tu leh faten an seng dawn a ni.

Ram leh Hnam Humhalh kum kan puang leh a, ‘Humhalh’ awmzia hi kan hrilhfiah dan a inanglo viau maithei a ni. Humhalh ngai chin tawh chu a dinhmun a himlo hle tihna a ni a, chuvang chuan mizo hnam hi a nun khawchhuah nan leh khawvel dang el phak tura venhim a, tih hmasawn hi kan ram leh hnam kan humhalh dan tur chu a nih hmel e.

Dinhmun derthawng atanga kan ram leh hnam khai chhuak tur chuan hetiang dinhmuna dahtu hi kan hriat chian a, kan nek chep a, kan tih bo a ngai. Chu chu ram leh hnam humhalh nana kan hna hmasa ber tur a ni.

Nguntaka ngaihtuah chuan kan ram leh hnam humhalh ngai khawpa siamtu chu keimahni ngei hi niin a lang tlat. Kan duham luat leh dawn tawi vangin kan ramngaw kan ti chereu zo a, kan thawh peihloh thawk turin hnam dang kan chah lut a, sum duh vangin hnam dang lakah kan nihna hralh in kan hmingin ram leh eizawnna an nei a, kan dinhmun hmuh kanin tuipui ral nunzia kan chen a, kan mizo-na chu a dal telh telh ta a nih hi.

He ram leh hnam hian pawn lam mite lak atang ai chuan a fa hrin, mizote ngei lak atang hian humhalh hmasak a ngai a nilo maw? Dan hmangin thatakin ramdang mi leh India mite lak atangin kan in hung a, an ni chimral theiha kan awm a nih chuan kan thiamloh a ni ang.

Ram leh Hnam humhalh nan tia ramdang mi leh vai permit lo dap hi a tha tho e, mahse a ler atanga thuai ang a ni.

Kan rilru put hmang thlak a, dikna nunpui leh taimak kan zir a hun ta. Chu chu kan bul tanna tur a ni.


21 January 2018

Kum thar atan Nursery Veng Branch YMA chuan Chhiatni Fund, Nursery Aw lak man leh YMA Membership Fee a khawn tan leh dawn a, heng hi February thla chawhma lamah section tina khawn fel hman tur a tih a ni a, chhungtinte kan lo inrin lawk a tha khawp mai.

Chhiatni Fund bikah hian kan indaihlo hle mai a, hemi sut kianna a nih beiseiin inthlahrung takin Branch YMA chuan kum dang aiin a khawn tam dawn a, mitinin kan tlin theih tur nia a hriat min tuk a ni. Han intuk san vak hreh si, indaihloh leh hlauhthawnna awm si avangin a san lam bituk neilo in Rs 300/- aia tlemlo a khawn turin a rel ta ringawt mai a ni. Heihi kan hriatthiampui a tul hle a ni.

Chhungkua-ah nu, pa, leh fate an cheng ho angin khawtlangah chhungkaw hrang hrang kan chengho a, chhungkaw lungrual leh hmasawn ni turin nu leh pa leh fate’n tha an thawh theuh a tul angin khawtlang nuam leh hmasawn kan nih theih nan chuan chhungkaw tin hian tihtur kan nei a, khawtlang inrelbawlna ah hian kan tel vek a ni tih kan hriat a tul takzet a ni. Chhungkua leh khawtlang tana kan tih theih chin a inang veklo a, amaherawh chu kan tih theih tawk kan tih theuh hian chhungkaw nuam leh khawtlang nuam a siam thin. Hei hi hmasawnna bul chu a ni.

Tha leh zung khawtlang tana kan thawh hian neitu rilru min put tir a, khawtlangah inthlahrungloin, nuam ti takin kan chen theih phah thin. YMA in fee/fund a khawn kan lo thawh thin hi khawtlang inrelbawlna a kan tel theih dan kawng khat a ni. Tlemte te a kan thawh khawm hmang hian kan in pei zawn tawn a, chu chuan khawtlang nuam a siam thin.

Midangte awih nun ngai nih hi tumlo i la, midangte awi nungtu nih tum theuh ila, kan khawtlang chu a nuam ngawt ang.


14 January 2018

Nursery Veng Branch YMA kaihhruainain kan veng chhunga kohhran hrang hrang hnuaia thalai pawl leh pa pawl hruaitute leh Branch YMA Executive Member-te chu khawtlang tana thil pawimawh chi hrang hrang sawiho in an thukhawm a, he inkawm hona hian veng tan rah tha tak a chhuah ngei i beisei ang u.

Kohhran leh Pawl hrang hrangah awm in, rinna hrang nei mah ila Mizo kan nihna hian min phuar khawm a, thenawmte nen bai insuah tawnin chaw ei-ah kan in sawm tawn a, kan hlim ni leh lungngaih ni kan intawm pui a, hei hian khawtlang nun a ti nuam thin.

Kohhran leh pawl zawnga inmil hauh silo te pawh hi YMA huang chhungah chuan lungrualtakin ke kan pen ho dial dial a, YMA hian Mizo nun phung leh tlawmngaihna hmangin min phuar khawm a, chuchuan khawtlang nunze nghet leh lungrual min neih tir a ni. Hei hi hnam nun ze nghet kan neihna atan thil pawimawh tak a ni.

Lal rorel hun lai chuan khawtlang zia hi lalte mizia leh zawlbuka an in kaihhruai dan in a hril hle a, zawlbuk chu thalaite’n zo nun ze mawi an zirna hmun ber a ni. Zawlbuk kan neih tak loh hnu ah erawh chuan hetiang kan zirna leh kan inhlan chhawnna ber chu YMA hi a lo ni ta a. YMA chuan zo nun ze mawi a keng tlat a, thangtharte hnenah hlan chhawng zelin, mizo hnam nun vawnghimtu leh chhem alhtu a lo ni ta.

Khawvel hmasawnna karah hnam dang nun zia leh tihdan in min nuai a, kan mizo nunphung pawh tamtak a inthlak mek zel a ni. Hetia’ng karah hian kan zonun ze pui hloh loa kan awm theihna chhan chu YMA hi a ni. YMA chu thangtharte tan Zawlbuk a ni a, hetah hian mizo hnam nunzia chu a innghat a ni.

Thalaite chu he zawlbuk-ah hian lawiin khawtlang muantu i ni ang u.


07 January 2018

Kum a lo thar a, mi tamtak chuan kumthar atan an tih tur leh tihloh turte an insiam thar thin a, hetianga kumthar thutiam siam lemlo pawh hi tamtak kan awm tho awm e.

Miin kumthar atan thu tiam a siamna chhan ber chu ‘beiseina’ a neih vang a ni. Chu a beiseina ti hlawhtling tur chuan thu a tiam thin. Kumthar atana atih tur leh tihloh turte siamin beiseina nen hmalam a thlir thin. Thutiam siamlote hian beiseina an neilo tihna erawh zawng a ni kher lo ang.

Kumthar atana thutiam siam hi a tha zawnga nun thlak nan chuan a tha hle mai, amaherawh chu mitamtak chuan thutiam ti puitling zolo in kan bansan thin. Clinical Psychlogist Joseph Luciani chuan heng mite zingah hian 80% zet chuan February thla ah chuan an thutiam hi an bansan der tawh thin niin a sawi.

Miin a thutiam a hlen chhuahloh fo-na chhan pakhat chu tih tak takna a neihloh vang a ni fo. A taka tih theihloh tur atana in tiam ngawt te, tum san lutuk avangte in thutiam puitlin zo ta lo tamtak a awm theih ang.

Kan tihtheih ngei turah chauh in tiam ila, harsa lutuk atanga tan lo in awlsamtea tih theih atangin bul tan ila, mahni inringtawk tak chungin harsatna hmachhawn ngam ila, tumruhna leh beiseina nei chungin kan thutiam chu kan hlen thei ngei ang.

Kumthar atan hian thu kan tiam emaw, tiam lo emaw, hmachhawp leh tum chu kan nei theuh in a rinawm. He’ng kan thiltumte tihlawhtling tur hian kum bul atanga ruahmanna tha tak kan neih hi a pawimawh takzet a ni.

YMA memberte tan chuan khawhar ina kal tam te, mitthi lumenna a tlaivar thinte, thlan lai tura thawh chhuahte, khawhar ina thingpui lumte, leh YMA hmalakna a tun aia tam zawka tel tura intiam hi kan kumthar thutiam ni se la, kan tum tlat chuan tih theihloh a ni lo e.


2017

31 December 2017

Vawiin a Nursery Aw chhuak hi kumin atana a hnuhnung ber a lo ni ta reng maia, hetiang hun kan han thleng thei hi a lawmawmin a lunglenthlak ngawt mai.

Kum 2017 chhung hian a chhutna hmunah power supply an neihloh avangin vawi khat a chhuak theilo a, a dang zawng erawh chu tluangtaka tih chhuah a ni thei hi Pathian malsawmna a ni e. Tluangtaka chanchinbu a kal theihna chhan hi kan zavaia thawhrah a ni a, kan Branch hruaitute, section hruaitute, a enkawltu-te leh press lama lo chhutu-te, an thuziak hlu tak rawn thawhtute leh a semtu mai bakah a chhiartu zawng zawngte thawhhona rah chhuah a ni.

Nursery Aw hi veng chhung chanchin pawimawh tarlanna ber a nih avangin chhungtinte’n kan chhiar hi Branch YMA chuan a duh a, a lak man pe lote pawh a copy hi pek vek an ni. Chuvangin a copy a lo tam ta a, a chhutna man pawh Branch YMA hian kum dang ai chuan a chawi tam ta hle a ni. Kum tharah pawh chhungtin hnenah pek leh tum zel a ni.

Kum thar atan YMA chu a inbuatsaih chho leh mek a, Branch leh Section hruaitute thlan fel tawh niin hmachhawp tamtak kan nei leh dawn a, thataka YMA a kal theih nan YMA tha tichak tur hian kan vaiin kan pawimawh a ni. YMA chakna veng/ khua chu veng nuam tak a ni thin.

He kum lo thar tur hian rilru thar min puttir se la, khawtlang tana tha kan thawhna kawngah kan intih phur tawn a, kan tanrual chhunzawm zel a pawimawh a, inmamawh tawn vek kan ni tih hi hre reng ila, khawtlang leh midangte tan tangkaina nei vek kan ni tih hi i hre reng ang u.

Nursery veng mipuite leh kan chanchinbu chhiartu zawng zawngte Kumthar Chibai kan buk che u a, he kum lo thar tur atan hian duhsakna kan hlan vek a che u.


24 December 2018

Kum tluana kan thlir leh kan nghahfak Krismas chu kan lo thleng dawn ta reng mai. A hun thlen hma hauh pawha kan lung tilengtu hi a her liam leh thuai anga, kan lung tilengtu ah bawk a chang leh dawn si.

He hun lawmawm hi mi tamtak tan chuan nunhlui ngaia tahna, phurrit leh rilru natna hun a ni fo thin. Amaherawh chu he hun hi min tihrehawmtu leh min tina tu tur nilo in kan tan malsawmna ni a ni tih kan hriat reng hi a va duhawm em.

Sual avanga lei leh van inzawmna chat tawh chu Pathian in a fapa nunna meuh thapin min zawm sak leh a, mihring anga lo piangin thi turin he khawvel ah a lo kal a, sual in a tih hran tawh hringfate tan nunna khua a lo var leh ta a ni. Pathian fapa, mihringa a lo chan ni ah hian lei leh van an inrem ta a sin.

Lei leh van kara remna a thlen a, van Lal thutthlenga kan thut theih nan Pathian fapa chuan a Lal puan meuh hlipin ran thlengah a rawn mu a, chu a tlawmna avang chuan nunna kawngkhar chu kan tan hawn a ni ta.

He remna chahchintha hi van mite chuan mihringte pawhin hria se tiin lawm em em in an rawn puang a, lei leh van an inrem tak avang hian mihringte zingah remthu leng tura an duh thu an rawn au pui hial a ni. Lei leh van karah remna a awm theihnan Pathian chu mihringte hmuhah a tlawm hmasa a, he remna hi a taka chang tur chuan kan tlawm ve a hun ta. Tlawmna hmunah remna a awm thin.

He remna ni ropui, krismas hi rilru inngaitlawm takin hmang ila, kan natnate ti dam tur leh, kan nunna tlan tura lo kal chu kan thinlung i hlan ila, remthu i len tir ang u.

He ni ropui hi hlim leh lawm taka hmang theuh turin duhsakna kan hlan a che u.


17 December 2017

Bazar puiah chuan mipui an inhnawh tawt hle tawh a, khaw laia kea veivah ringawt pawh a hahthlak leh tan ta. Mi tam ber chu Edom rimtui leh rangkachak nen Krismas hmuakin kan inbuatsaih tan leh ta a. kan thinlung erawh hriat phak a ni lo.

Naktuk lawk atang chuan zaikhawm khuang rite pawh a lo rang leh deuh tawh ang a, mihlim ho tho thangte pawh a zang leh hle tawh tura ngaih a ni. Laltaia nute ho lam phar velin Bethlehem daite an zuk hawl thuak thuak hunah phei chuan Mas ruaithehna tur rante pawh kan thlung leh ran tawh ang.

Krismas hian Mizote thinlungah hmun a luah thuk em em a, eng hunlai atang chiah khan nge hetianga he hunpui hian min chiah hneh tih leh tunah hian a vawrtwp kan pel ta em tihte pawh ngaihtuah tham a ni. Tun hma chuan favang awllen an hmang thin a, chumi hnuah kum khat thawh rah sengin hlim takin thlawhhmaah buh an la thin. Chutih hunah chuan Mas a lo hnai a, rilru a lo thawven takah chuan damchhung khawsak lungkham buai lutuk lovin hun an lo hmang a, chu chuan Mas hawi zawngte pawhin nasa takin rilru a sentir thei.

Mihring khawsak phung a lo danglam takah hian mahni hma kan lo sial ta telh telh a, midang tan kan hun leh sumte kan pe tlem telh telh a, hei hian nasa takin kan hunpui hmuah mek chung changah pawh hian nghawng a nei a ni. Chutiangte a nih takah chuan kan nun hi ngaihtuah ila. Nawmsak loh hlau reng renga thawk chung si hian nuamsa hman lo hian kan liam a, harsa taka kan khawl khawm bawk hi kan kalsan leh tur chu an ni.

Heng leh thil tam tak ngaihtuah hian lungkham buai reng renga he nun hman hi a pamhmai kan ti a. Nakina nuih ai chuan tuna hlim mai hi kan tih tur a lo ni.

Hlim takin Krismas i hmuak ang u.


10 December 2017

Mahni vengah a huhova kan han chhuah khawm nikhua hian ram leh hnam humhalh chung chang hian sawi a hlawh khat hle, humhalh a tul zia pawh ngaihtuah thlen a har viau mai. Chutih laiin a ram huapa thlirin muang changin kan ramah hian hnam dangte’n pun lam an pan zel a, hriat loh karah kan hnam hi derthawng takin a lo awm thei ngei ang.

Zing karah Khatla kawn atanga Chanmari thleng i kal chuan a ram neitu thalai tam tak khumlaizawla kan la mut laiin vai kan tihte chuan thawh tam hman loh hlauvin hnathawh tur an zawng suau suau a, keini hnathawk tura kan han inpeih ve meuh chuan zing dar 10 a lo hnai a, chutih hunah meuh chuan an pawisa ip a lo puar hman hle tawh thin. Chawlhni tuka Aizawl lamlian dunga sumdawng bungraw thiartu pawh vai bawk.

Bank han dawr ila, Mizo thalai tam takin kan thla khat thawh chhuah aia tam mah hi vai tar te te hian an chhungte hnenah an lo thawn deuh zut reng a, hna van thu kan sawi cham chi laiin kan khawlaiah hnam dangte’n ei an zawng a, chaw nghei thu an sawi lo.

Mizo hnam hi kan la tlem em em a, kan chheh vel vaite nen chuan khaikhin rual kan ni lo. Anni chuan hna in mihring a daih loh huna a manganthlak zia hi an hre tawh a, kan ramah hian pindan chep te te luah mahse hna thawh tur an hmuh dawn phawt chuan hrehawm an pawisa lo. Mamawh an nei tlem a, chu chuan an sum bawm a puntir thung.

Nuamsa taka hlawh chhuah kher kan tum avangin kan ramah hna tam tak kan hnualsuat a, chu’ngte chu hnam dangte tan malsawmna a lo ni ve leh a. Han vau deuh thin mah ila hnathawh tur a awm miau chuan an chhel em em a nih hi.

Kan khawlaia hna vir vel danah hian kan ramin humhalh a ngaih zia chu a lang reng mai, thalaite tan tan lak a va ngai em!


03 December 2017

Zoram pum huap Presbyterian Kohhran khawmpui lian, Synod inkhawmpui chu Bungkawn Presbyterian Kohhranah nghah a ni dawn a, he khawmpui hi veng danga nghah nimahse he hun hi veng dang, khaw dang leh zoram pum huapa kan veng hmel landan hriltu a nih theih avang hian veng mipuiten kan ngaihthah hi a rem chiahlo ang.

He hunah hian kan vengah mikhual engemawzat an thleng dawn a, lirthei tamtak dah a ni dawn bawk a ni. Tin, he khawmpui chhimtura kal te hian kan veng an rawn paltlang vek dawn avangin kan lo inrin lawk a pawimawh khawp mai.

Chuvang chuan in leh a vel vawnfai kawngahte, mikhual biang biak chung changahte leh ruihtheih thil leh a kaihhnawih – khawtlang mualpho theihna chi hrang hrang lakah kan fimkhur a tul hle a ni.

Kohhran mal hmalakna ni mahse kan veng hmingmawina leh hmingchhiat theihna hun a ni tih hriaiin khawtlang anga kan tanrual a ngai hle dawn a ni. Kohhran hrang hrang leh pawl hrang hrangte’n kan khawtlang mawina atana zai khata kan luan a, khawtlang hmangaihna rilru nen he hun hi kan hmachhawn a ngai hle dawn a ni.

Mite’n Nursery veng chu veng tangrual, veng nuam leh veng fai, a mi chengte pawh mi hawihhawm leh fel, khawtlang nun thianghlim tak nia min hriatreng theihna turin he inkhawmpui hi kan tan hun remchang a ni.

Mi pakhat avangin khawtlang a hmingtha hluailo a ni thei e, amaherawh chu mi pakhat avang vekin khawtlang hi awlsamtein a hmingchhe thei tih hre tlang ila, he inkhawmpui hi khawtlang in lungrual lehzualna atan kan hman thiam a duhawm takzet a ni.

Zoram pum mit hmuhah kan inlungrualna, kan khawtlang nun nuam leh mawi tak hi i lantir ang u.


26 November 2017

Thal khua a her liam a, fur khua a lo thleng a, mahse chu pawh liam in favang khaw nuam em em in a rawn thlak a, chu favang khua ngei pawh chu lo liam in thlasik boruak mawi takin rawn thlak in kum sul a lo vei leh dawn ta..!!. He thlasik khaw vawt thiang tak mai hian mi tamtak lunglen rawn kai tho in, thinlai mu hnu lunglen a rawn kai tho thin.

Krismas lo thleng tur leh kum hlui liam mai tur hian lung a ti leng a, nunhlui ngaiin kan kur a, thenkhat chuan kan tahpui a, hrehawm tiin krismas lo thleng tur leh kum liam mai tur chu kan huphurh thin.

Thenkhat chuan lunglen hi hrehawm kan ti a, kan zak a, kan lunglen avangin kan vui thin. Mahse lunglennate, khawharnate hi mihringte tana Pathian thilpek hlu tak a lo ni. Kan hmangaih kaltate kan ngaih vanga kan lunglennate, nunhlui ngaia kan khawharna hian thih hnu ram leh Pathian min ngaih tira, chu chuan beiseina nung min siam sak thin. Lunglen dan a inanglo ang, a then chu mahni nunna hial la duh khawpin an lung a leng a, Pathian leh an mihring puite lakah vuiin an dem a, an tan khawvel hi a thim thin. Heng mite hian lungleng theia an awm hi an vanneih zia an hrelo a ni..!

Lunglenna hi mihringah awm ta lo se chu ramsa pawh kan tluklo ang. Hmangaihna in awmzia a neilo anga, lainatna leh khawngaihna a bo anga, Pathian reng kan ngailo ang. I lung a leng a, i khua a har anih chuan vui suh, Pathian malsawmna a ni e. Kan lunglenna hian hnemtu a ngai a, mihringah kan inhnem zo lo a, chu chuan vanram ngai in min siam a, Pathian kan mamawh thin.

Lunglen hria chuan hmangaihna a nei a ni. Hmangaihna chu Pathian atanga chhuak a ni si a. Pathian malsawmna hi lawm takin pawm ila, lungleng takin krismas hmang ila, kumhlui i thlah ang aw.


19 November 2017

Thenkhatin Mas hman dan tur leh mahni tul dangte an rel mup mup laia YMA hruaitu lo nih hi a khawharthlak ka ring a, mahni in luma phone message hmanga thu awmkhauh pui pui kan sawi laia kuang siama lo buai fo bikte hi a hahthlak fo hian ka ring.

A sur a sa hnuaia veng thatna tura thawk thin, a tul chuan a thim a var thlu lova thawkchhuak mai thinte chu kan hruaitute bawk hi an ni a, khawmpui nikhuaah a langsar ber berah an tang lo pawh a ni thei, a zai ring ber pawh an ni lovang. Kan veng tan chuan an tling tawk a, anni aia zahawm an awm lo.

Veng mi zawng zawng huapa thiam taka rorel hi a har a, lungrual taka hruai phei chu a har lehzual. Mi khirh pui pui leh fing pui pui awmkhawm kan ni a, chutih laiin mi inthlahdah leh tladah, sawngnawi leh ningnawi, buai but leh tuaitut te pawh kan ni. Chu’ng zawng zawngte zai ngai taka zai an han dawh leh rih thinte hi a ropui kan ti.

Ram leh khawtlang rilru sukthlek zawng zawng hi YMA kutah hian a awm ta bik emaw tih tur hian mitin hian YMA hi kan ngaichang thuap a. Khawtlang nun siamtha turin kan beisei a, ram leh hnam humhalh turin kan duh a, diklo taka thuneitute’n dan an siam a nih chuan a khing tura kan hmachhuan chu YMA a ni.

Chutiang pawl ropui taka member kan han ni ve thei ringawt pawh hi lawm tur kan ni a, mahni tan nilo midangte thatna tura bei char chartu pawl hi Kristian tan chuan phatsan a thiang lo.

Chuti chung chung chuan kan hruaitute hi a kum a tluan hian an maltlat a, kan hriat ve laia an thawh aiin kan hmuh loh liama an sulhnu hi a tam zawk a ni. Tul dang pawimawh insiam chawp reng rengin YMA hi kan tlansan a, a aia tha hre chuang si lovin kan changkansan a, mahni kan mualpho leh thin. YMA huang chhungah hian awm ila, chu chu Mizo tan a va tha em!


12 November 2017

Dan hi mipuite himna atan leh ralmuang taka kan nun tlan theihna atana siam a ni a, mipuite hmasawnna atana inrelbawlna fel leh boruak ralmuang tak siam hi dan hian a tum chu a ni.

Ram dan mai bakah hnam dan kan nei theuh a, heng dante hi kan himna tur leh hma kan sawnna tur atan te, thlamuangtaka kan chenho dial dial theihna atana siam an ni. Misual hrem na atan hrim hrima siam a nilo a, khawtlang leh ram himna atan dan chuan misualte a hrem mai thin zawk a ni.

Dan zahlo leh zawmlo an awm avangin chhungkua, khawtlang leh ramin a tuar a, kan buai phah thin. Hei hian kan tanrualna tur a dal a, kan hmasawnna tur tamtak min dal a ni. Midang leh a man theitu awm vang chauh a dan zawm anga lang, hmutu an awmloh avanga dan bawhchhe hreh miah silo te hian dan an ngainep a, mahni hma an sial a, midang an zahlo a ni.

Chhungkua, khawtlang leh ram hmasawnna hi inrelbawlna tha leh tanrualna-ah a innghat a, tangrual tur erawh chuan khawtlang leh ram dan kan zah a, kan zawm tlan a ngai thung si a ni. Dan a lal lohna hmunah chuan inrelbawlna tha leh tanrualna a awm theilo.

Hmasawn kan duh a, ralmuang tak a awm tlan kan duh a nih chuan khawtlang leh ram dan zawm tlang ila, dan hian a bawhchhetu bak hrem a tumlo a, min veng himtu a ni tih hre thar ila, min hmutu an awmlo a nih pawhin zawm theuh ila, chhungkua, khawtlang leh ram tinuamtu kan lo ni mai dawn a ni.

Dan mitah chuan kan intluk tlang vek a, dan chunga leng tumah an awmlo. Dan hnawksak ti tlattu chuan dan leh mipui a zahlo a ni. kan khawtlang leh ram dan hi zahin zawm tlang theuh ila, kan buaina tamtak hi chu a fel duak ngei ang.


05 November 2017

YMA Inkhawmpui Lian chuan Kumpuan atan ‘Ram leh Hnam Humhalh’ a thlang leh ta a, kum engemaw zat chhung chu kumpuan thupui atan hei hi kan lo nei tawh a, he kan kumpuan hi tha zawk leh awmze nei zawka kal pui tur chuan kum liam ta a kan lo kal pui tawh dante kan zir chian a pawimawh hle ang.

A chhunga cheng, a neitute’n ram leh hnam chu humhalh ngai nia kan hria a nih chuan kan ram leh hnam chu a himlo a, dinhmun derthawng takah a awm tihna a ni.

He kumpuan hlawhtlingtaka kalpui tur chuan humhalh ngaia kan ram leh hnam a awm chhan diktak kan hriat a, chumi mila kan thiltum tihlawhtling tura ruahmanna kan siam thiam a tul takzet a ni.

Eng pawl pawh hi thiltum neia din leh thawk an ni a, YMA pawh hi thiltum fel tak neia din leh thawk a ni. He kan thiltum pakhat- ‘Ram leh Hnam Humhalh’ pawh hi kan inkaihhruai dan te, tih hlawhtlin a nihna tura ruahmanna kan siam dan ah thui tak a innghat a ni.

Amaherawh chu kan thiltum leh ruahmanna chu tha eng ang mahse, a hlawhtlinna atana thawktute’n thahnemngai leh tihtakzeta kan thawh si loh chuan a hlawhtlinna chu vana rah ang a ni ang.

Tin, a taka thawktu leh bawh zuitute’n theihtawp chhuah mahsela, mizo mipuite’n kan tuipui a, kan thlawp chuan si loh chuan YMA tha chu a thlawn maiin a luang dawn tihna a ni. Chuvang chuan ram leh hnam hmangaihna rilru hi zofate zingah kan chawh thawh a ngai takzet mai. Amaherawh chu a vung zawng leh inla bing zawnga kan kalpui a nih chuan kan ram leh hnam tan thil pawi tak kan khawih tihna a ni ang.

I ram leh hnamin humhalh a ngai a nih chuan nang leh i chhungkua chu a him tawhlo tihna a ni. I harh tlang i la, i tang tlang teh ang u.


29 October 2017

Vangpui lunglen kan hmang tan dawn chauh emaw kan tih laiin heh a rawn char a, thawmhnaw lum lamte kan han inbel leh takah chuan he khawvelah hian keini ang pa chu kan tlai lek lek reng mai a nih hi tiin a ngaihtuah theih dawn mai.

Kum 1997 October ni 30 zanah khan Nursery Veng Branch YMA hi a lo piang a, naktuk a lo inher chhuah hunah chuan kum 20 kan lo pumhlum ve dawn ta a nih chu. Kan din tirh atanga vawiin kan thlen dan chanchin hi ngaihnawm leh lungleng taka sawi tur a tam hle mai.

Khatia Bungkawn Veng Branch YMA atanga kan lo indan khan fahrah lutuka kan awm lohna’n Bungkawn Branch chuan Rs.1,177/- in min indan a, tlachham deuh thaw rengin inhre thin mah ila tuna kan dinhmunte hi chu a ropui ta hle tih loh rual a ni lo.

Thil tam tak kan tawng a, CYMA te chu ropui taka langin thang thin mahse mahni veng chhunga a sur a sa hnuaia a thim a var thlu lova kawng chhuk leh chho kan lo zawh ve tauh tauhnate hi a YMA lai tak chu a ni si. Kan thiamnate sang lovin kan pawisa bawmte’n tlin loh tam tak nei mahse kan inpekna rilru, thil tiha lo lang chhuak thin hi mi tam tak tan thlamuanna a lo ni thin a ni.

Kum 20 hmel kan lo hmuh dawn takah chuan tun atanga kum 20 dang lo la awm tur hi thlir phak ila. Ram leh hnam kan humhalhna kawngah te, tanpui ngai kan tanpuina kawngahte fimkhur takin kan kal ang a, a hmasa berah chuan Pathianin min pek Mizo kan nihna hi langsar ber zel teh se.

Ram tinah mahni hnama chian tharna a thleng mek zel a, kan chheh vel boruak atangte hian kan inzir ang a, kan hnam tana pawi tur chu sum leh pai itna avang emaw, hmingthan duhna avang emaw pawhin kan ti hauh lovang. Chumi tur chuan Zoram pangpar, YMA hi chelh tlat ila, mahni hmunah i YMA hle zel ang u.


22 October 2017

YMA General Conference chu kan lo hmang zo leh ta, kum 2019 ah chuan Hrangturzo tlang lamah kan chho ang a, Tuichang ral khaw hmingthang North Vanlaiphai lamah kan ti ve thung dawn a ni. A dam kan hauh ang a, kumin aia tam ngei kan Branch atang pawhin kan kal thei ngei turah i ngai teh ang.

Veng chhungin chhiat kan tawk a, zan khata lumen ngai pahnih kan han nei a. Rilruah thil tam tak a rawn lang zut zut a. Hmun hniha tlaivar tham member kan chhuak khawm thei ang em tihte, thlan pahnih lai zo thei tur tlangval chhuak khawm zo tak ang maw tihte kan inzawt a, a tak hmuh hma chuan kan inchhang thei lo.

Kan hruaitute thlaphan rukna zawng zawng chu a hun a rawn thlen meuh chuan a bo zo ta. Kan vengah hian Mizo thalai tam tak, tanpui ngai tanpui tura inpeih reng, a tulna avanga mahni hna pawimawh kalsan ngam, Mizo nun mawi chawi nung thei tam tak kan lo la awm tih a rawn lang chhuak a ni.

YMA a kan hruaitute hi anmahniin an chak em avang leh he mawhphurhna hi chelh an duh tlat avanga hruaitu rawn ni ta an ni lova, tlawmngaih chhuah turin khawtlangin mawhphurhna kan pe a ni ber. Sum leh paiah hruaitu nihna hian hlawkna a keng tel lo mai a ni lova, a nawlpuite’n kan hriatpui hauh loh hian mahni tangka, hun leh ngaihtuahna an seng nasa em em a ni.

Chutih laiin tam takin an hnung kan zui tha peih lova, khawtlanga mawhphurhna zawng zawng an kuta dah kan tum thin.

Chawlhkar liam taa kan hmuhte erawh veng tan an thlamuanpuiawm tak meuh. Thu leh hla an ngah lova, mi hriata an tawng vak vak pawh kan hre lo. A hun takah an lo eng chhuak a, he khawtlang leh YMA hmel hi an rawn timawi leh ta a ni.

Nursery veng nula leh tlangvalte kan va chhuang che u em!


08 October 2017

Tun laiin hmun hrang hrangah mizo nun chu chhe lailet ta der anga sawina a tam hle mai. Kan nula zinga thenkhat an lo awm duhdah deuh avanga mizo nula zawng zawng khawlo anga ngaihna te, kan tlangval thenkhatte awm khawloh avanga khawlo vek ta ang hial a ngaih tlatna hi a awm niin a lang.

Hetiang ngaihdan hi kan sawi darh chak zawng leh kan tih lar chak zawng tak mai a ni bawk si. Mahse hetiang thlirna hian thil a siamtha lo a, mahni hnam hmuhsitna ah bak mi a hruai lut lemlo. Mi tamtak thlirna mitah chuan mi taima aiin mi thatchhia an langsar a, mi tha aiin mi thalo an langsar bawk a, kan mita langsar zawk hi kan sawi chak zawng tak a lo ni leh zel si a.

Thlirtu dang erawh chuan tlangval thlan lai lo aiin thlan lai a hmu a, mi thatchhe lam en loin mi taima lam a en a, mi tha kara mithalo tlem lo awm chu hmuh kan in mitha chu a mitah an langsar zawk a, a tan chuan khawvel hi a mawi a ni.

Kan nun thalo siamtha tur chuan kan thatlohna lai kan sawi chu a ngai ngei mai, mahse chu kan thusawi chuan mi a siamtha ang nge, kan thatlohna nem nghettu atan kan hmang hlauh ang, tih ngaihtuah ngun erawh a ngai khawp mai. Amaherawh chu kan zonun ze mawi hloh zawnga khawsa leh, mi thatchhia, awmtha duhlo kan tam deuh deuh a nih chuan kan chhiat hun chu a thleng ngei ang. Chu chhiatna laka kan hnam vengtu chu kan mamawh takzet a mai.

Hla phuahtuin ‘Zonun Kung’ tia a lo sawi YMA ah hian a tang emaw, a hnah pakhat tal emaw ni theuh ila, chu zonun kung chu a lo duah deuh deuh anga, a zar hliap chin a lo zau zel anga, a sira hnim tenau te chu dip ralin hlim nuam tak a siam anga, chu a zar hliap hnuaiah chuan zofate hi thlamuang takin kan cheng ho thei ang.

He ‘Zonun Kung’ YMA hi rawn bel la, leitha in rawn chawm ta che.


01 October 2017

Tun laiah chuan mi kan changkang tawh a, zan lama mitthi an lo awm pawhin mahni mut hmun atangin ui thu kan sawi zuah zuah fo mai. Hmanhmawh taka chhiat tawhna in lam pana midangte tanpui tum tlatna rilru kha a bo ta deuh niin a lang.

Thenkhat erawh chu tunlai changkanna kawrawng tam tak hian a khawih buai pha lo. Zawngtah bilhbawlawk han tih ringawt pawha lungleng em em rual khat hi veng tinah hian an awm ve tho a, chu’ng ho nena tlaivara zai han vawr chu a lunglen thlakin a kham awmloh thin.

Chhiat ni that nia kan hnam zia hi hnam dangte laka kan danglamna leh hnam dangte pawhin min chung enna thin a ni ve a. Tun thleng hian veng chhunga YMA hmel lanna lian ber pawh chhiat tawk kan awm hian a ni thin.

Chhiat tawk an awm hian thalai tan in lama awm ngawt a mawi lova, tangkaina ka neih ve takin tih rilru pua chhiat tawhna in lam pan hi a Mizo zia a ni. Chhiat tawhna hmuna hman tur YMA bungraw lak khawm, thingpui lum leh thil dang tam tak a nawlpuiin kan hriatpui si loh hna tul hi a awm a, chu chu mi tlemtein tunah hian mahni kovah an la a ni ber.

Ram leh hnam humhalh kan tumna kawngah hian pawn lam atanga min rawn chim ral thei thil lak atangin kan inveng ang a, kan chhung ril lamah kan hnam nun ziate a bo loh nan nasa takin tan kan la bawk tur a ni. Chumi atan chuan nasa taka tlawmngaih a ngaihna hmun chhiat tawhna hmunah hian thalaite hi i inzir mawlh teh ang u. Hranghlui leh rual u zawkte’n Mizo hnam kalsiam hi an thlir a, tlawmngaihna hi vul reng se an ti em em a ni.

Khuangchawi thla chu hlim takin aw!


24 September 2017

Kan ramah hian pawl chi hrang hrang leh Kohhran hrang hrang kan tam hle mai a, pawl thar a la din belh mek zel bawk a. Pawl hrang hrang, tum thuhmun reng si tamtak kan neihna chhan hi duh dan leh ngaihdan in an loh vang a ni fo.

Ram leh hnam kan hmangaih a, khawtlang kan hmangaih a, amaherawh chu khawtlang leh ram tan a kan thawh duh dan a inanglo mai chauh thin zawk a ni. Tu ber hi nge dik a, tu hi nge diklo tih sawi theih pawh a ni lo a, in dem tur pawh kan ni chuang lo.

Hetianga duhdan leh ngaihdan hran kan neihna hian Mizo hnam tanrualna leh lungrualna a dal dawn a nih chuan keimahni thiamloh liau liau a ni ngei ang. Min beitute tan chuan nek kan nuam ngawt ang le. Ngaihdan inanloh vanga thawh ho leh tanrual harsa tih chang nei mah ila vanneihna tak mai kan nei a, chu chu mi zawng zawngte lungrual taka kan thawhho dial dial theihna YMA kan nei hi a ni.

He pawlah chauh hian hmun danga ngaihdan inanglo tak takte pawh lungrual takin an thawkho thei a, he pawl hian Mizo hnam a phuar khawm a, Mizo hnam tan a ding a, mizote tan a bei a, mizo hnam tan eng pawh a huam a ni.

Kan ram leh hnam dinchhuah nan leh hmasawn nan chuan he pawl- YMA hi kan tih chak deuh deuh a ngai takzet mai. Zofate lungrual taka kan thawhho theihna pawl awm chhun hi kan ngaihthah a nih chuan a lo chau anga, hnam inpumkhatna a der thawng anga, kan hnam chu kan chhe rup ngei ang le.

YMA hian zofate tan chak taka awm reng a mamawh. Zofate tan ral ven buk a ni a, a chakna atan leh nghet taka zofate tan a din reng theihna turin kan zavai hian YMA hmalakna leh chet velna ah kan tel zel hi a ngai a ni. Chu chu kan hnam tan a ni.


17 September 2017

Harsatna hian mihring mize dik tak a tarlang thin. Titi phungleng sawi teh ang.

Japan ram leh a chhehvel tuifinriatte khi lirnghing tamna ram a nih avangin lirnghing leh nunphung tibuai vek thei chhiatna rapthlak hmachhawn thei turin mipuite chu zirtir an ni a. Lirnghingin a ken tel tuifinriat tuifawn sang leh na lutuk, thenkhatin tuilet an tih hial Tsunami te chu an hre hlei hlui.

Chuti chung chuan rin phak baka nasaa Tsunami in a khaw puma a nuai chhiat vek tumte pawh an tawng thin. Kum 2011 a Tsunami rapthlak tak an tawrh tum khan hmun ralmuang lama insaseng mek Japan mipuite chu tuihal leh riltama an awm lohna’n Tsunamiin a tihchhiat khuaa eitur leh inturte la mai tura ngen an ni a, mahni ta lo lak leh neih chu harsatna karah pawh hnam rinawm Japan mite chuan an hreh ngat ngat hle.

Tun hnaiah America rama Florida state chu thawngaleivir lian chi Hurricane Irma chuan a nuai ve bawk a. Khawvela news channel rintlak leh tradition nei tha tak BBC meuhin thlalak a han tarlan zinga sawi hlawh deuh chu Negro kan tih mai midum hovin dawr tam tak suasama bungrua an ru chhuak lai hi a ni.

Miin min hmuh miah loh laia kan khawsak phungte, harsatna leh buaina manganthlak tak a lo thlen laia kan nungchangte hi kan chhungril nun dik tak tarlanna a ni fo thin. Thil tha kan tih hian miin min hriatpuia min hmuhsak kher a ngai lova, mahni chauh pawha khawtlang tana tha turah chuan kan din ngam hunah kan ram leh hnam hian kawng dik a zawh ang.

Midang phut tlatna rilru hi a thianghlim lova, tlawmngaihna nen phei chuan a inhlat hle. YMA hminga mahnia lungawi taka ka zai hunah, mahni chauh pawha vui lova ka hnatlan hunah harsatna hi ka nau a ni ang.


10 September 2017

Khawvelah hian ngaihhlut tur thil ropui tam tak a awm a, chu’ng zawng zawng aia la ropui leh hlu zawk chu kan nunna hi a ni. A ropui ang tak hian kan nun hi kan hlutin kan hunte hi kan hmang tha em le?

Mihring dam chhung hi a reilo takzet a, khawvel history a civilisation te chu a sang bi tea chhinchhiah leh hriat reng an nih fo laiin mihring dam chhung erawh rei lotea ral mai thin a ni. Chutiang a nih avang chuan he dam chhung tawite hi thalo leh zahpuiawm taka hman atan chuan a pamhmai kan ti a ni.

Kan la sawi hman loh lawmthute, kan ngaihtuah ngai loh ngaihdamna thute, en renga kan hmuh si loh thilsiam mawinate hi sawi chhuakin hlut thiam ila. Nunna hi reilotea ral mai tur a nih avangin duham hian awmzia a neih loh ziate hriatfiah tum ila, sum tam tak neia dam si loh ai chuan tawnzau tet nena dam ve tlat reng maite hi a that zawk ziate i hre thar zel ang u.

Chutichuan favang khua a lo thiang ang a, boruak thiang tak mai leh chumchi leng cham cham karah chung lam han thlir ila, van sang taka thlasik kawng lang paw chiai chiaite khian hun lawmawm hmuak kan ni tih min lo hriattir leh ang a. Lungkham luat vanga bo thei eng phurrit mah a awm si loh avangin hlim taka awm zel mai hi kan bat a ni tih i hre thar zel ang.

Kan thawhchhuah mil leh kan tharchhuah mila khawsak kan zir ang a, awlsam taka hausate chu kan nunah hian kan hnawl ngam ang. He ramah hian mi thalote’n kawng tinrengin kan chan-ai la bo mahse kan nunna erawh kan ta a ni a, kan duhthlanna thiang tak hmang hian a tha zawk zel kan thlang ang a, kan nunna hi chawimawiin a awm dawn a ni.

Nunna hi kan neih hlu ber a ni a, hlim takin, zalen takin, mawi takin he khawvelah ngei hian par chhuak rawh se.


03 September 2017

Thenkhat chu tlangval laia rorum em em, thu khal pui pui leh ngaihdan phawkphawhraw deuh deuh chhak chhuak thin, nupui neih tak hnua kawngkapui pela ngaihdan leh thahrui thawh chhuahpui tur nei ta reng reng lote an ni thin a. Chutiang chung chung pawha vawiin kan phek hma lam thu leh hla angte hi chuan nun hi an tinuam ngawt mai.

Furpui khaw hnawngah kan zawrin kan hmuar zo mai dawna kan inhriat lai pawhin YMA leh a thil tumte hian tam tak chu nghet taka ding turin a fuih reng a. A tam zawkin kan peih loh san hun a lo thlen pawha la tang fan tur hruaitu tei rei peih tam tak an awm hi kan vanneihna a ni.

Tam tak chuan veng tana mi tangkai nihte pawh hi kan duh lo a ni bik lo, a ngaihna kan hrelo thin zawk niin a lang. Hruaitu leh mipui mawhphurhna hi hetiang kawngah chuan a inchen viau a ni. Chutih laiin tam tak chuan tha thawh hunah midang tih turah engkim dah kan ching thin, mahni kan tel ve loh chuan neitu nihna rilru a piang thei lo.

Zau zawka kan thlirin ramin hmasawn a harsatna thin nia lang chu mahni pawl ni lo midang hmalakna hrim hrim, thil tha pawh nise kan inzahsak lo thin hi a ni. Hetiang hi veng chhungah chuan a lo luh kan phal tur a ni lovang.

Veng hmasawnna tur leh veng nuam siam tur hian mitinte hian chanvo hlen chhuah tur kan nei vek a, pawn lam miin kan veng hi an rawn hmangaih thut dawn loh avangin keimahni hi inlungrual taka kan intelkhawm a ngai a. Veng tana tha turah chuan mimal ngaihdan dah bovin theihtawp i chhuah tlang zel ang u.

Nursery veng mi nih hi inchhuanpui tham ni se kan ti.


20 August 2017

Zoram ka ram, lu chhum ban chhum huama kan pipute sah zau.

Kan ram leilung awmdan hi mak tak maiin a tlang leh mualte hi a inkhawh a, tlang zum tak tak leh kawr thuk tak takte, ngaw dur pui pui leh kham rang ten veng vungte awmna hmun niin hnam dangte han awm rei duhna chi a ni lo. Chutiang kham bak bahai tak tak atanga thli fim lo tlehte, ramngaw hring dup kara nungcha tinreng hram velte chuan he Mizo thinlung hi a hneh em em a, khawvel ram zauvah hian hei aia ram nuam hi a awm kan ring thei lo a ni.

Hnam dangte’n luipui phai kuam lai leh phai zawl lei tha hmunte umin bawh thin mahse keini chuan kan tlang ramah hian kan lungawina tawk kan hmu a. Kan lui dung khawkrawk hmunte leh kan kham rangte pawh Pasalthate tual lenna a ni.

Hmasawnnain min luh chhuah hnuah ramdangte kalin fang thin mah ila kan tlang leh mualte hian rinawm takin min nghak reng tih kan hriat chhung chuan haw leh hun thlirin kan fan ruai ruai thin. Lui tui luang rite, thereng kiu ruai ruaite, zan laia perhpawng khuang chiri thawmte hi kan thisenah a luang tlat a, hei lo chu ram dang kan nei lo.

Kan ram nuam tak maiah hnam dang chim buai loha rei tak kan awm tawh chu tun hnaiah kan hriat loh karah phingphihlip puang ang maiin hnam dangte’n min rawn chim ta.

Mikhual huangtau khawi reng mai chu keimahnia luang kan thlahtute thisen hian a mil lova, kan ram leh hnam humhalh tura pen chhuah a lo tul ta a ni. Mizo nih mai a tawk lova, i chet zia chu ram leh hnam humhalhna’n ni rawh se.


13 August 2017

Naupang pakhat sikul kal tur chuan tlai a hlauh avangin a sana chu darkar chanve in a herh hma a, a inbualsan ta a. A inbual hlan chuan a nu chuan a fapa chu a tlai ang tih hlau in sana chu darkar chanve bawkin a lo herh hma a, chutiang bawk chuan dawhkana sana awm chu a pa chuan an rilru ang tho pu in darkar chanve bawkin a rawn herh hma a, chu naupang sana chu darkar khat leh a chanve zetin a hma ta! An buai phah ta hle a ni.

Hemite chhungkua hian tum thuhmun neiin thil an ti a, tha pawh an thawh theuh mai. Mahse an tangruallo a ni. Chu chuan an zavai atan harsatna leh buaina mai a thlen ta a ni. Kan khawtlangah hian pawl hrang hrang kan awm a, khawtlang hmasawnna leh thianghlimna atan kan thawk theuh mai. Heng kan hnathawhte hi kan inhriatpui tawn a, kan in pawm tlan loh chuan kan thiltumte ti hlawhtlinglo hian kan buai thlawn mai ang tih a hlauhawm hle a ni.

Pawl hrang hrangte hian khawtlang hmasawn kan duh theuh a, chumi atan chuan kawng hrang hrangin hna kan thawk a,kan hnathawh dan phung pawh a inanglo. Amaherawh chu kan tum chu thuhmun a ni.

Tum thuhmun neia kan thawhna kawngah hian kan tihtur chin theuh kan chian a, pawl dang hnathawh kan hriatpui a pawimawh takzet. Kan thiltum hian min khaikhawm se la,chu chuan khawtlang inlungrualna a thlen anga, phurna leh thathona min siam anga, mahni hmazawn theuhah chak leh tha zawkin hna kan thawk thei ang. Pawl hrang hrangte hi kan sana hi inmil tlang rawh se.


06 August 2017

Thawhrimna hi hlawhtlinna bul a ni mai lova, ram leh hnam humhalhna kawng dik tak pakhat a ni. Mahni hna thawh dan mil zela ei hmu tur ni ta ila nutling, patling leh thalai ei hmulo tur hi kan kat nuk dawn hian a lang.

Kan ramah chuan a hminga sorkar hna emaw, hna dang nitina chhuah ngai chi (white collar job) kan han vawn hian hnathawkah kan inngai nghal ringawt a. Hna chu kan thawk tak tak emaw kan awm mai mai pawh nise hna nei kan nih miau avangin kan ngaih a ngam mai thin.

Kan nitin hun hman danah hian hlawhfa ruaitu ni ta ila hlawh pek chakawm khawpin kan thawk em? Thenkhat chuan sorkar hna kan thawh hian sorkar chu tuizem lianpui, kan duh hun huna tui kan va thal chhuah theihna angah hian kan ngai deuh mai ni hian a lang thin. Chu chuan nasa takin kan hnam nun hi a nghawng mek a ni.

Hahdam taka thawh chhuah sum chu awlsam takin kan hmang mai a, sawi tham chhiah kan la chawi loh avang hian sum bawm vawn kawngah pawh rilru kan seng thiam lo. Vai hote chuan an sum lakluh mil zela chhiah an chawi zel avangin an chawi bang sum chu hlut takin an vawng thin.

Hah taka mipuite thawh chhuah atanga chhiah tlingkhawm hi sorkar innghahna pakhat a ni a, chutiang sum lo tihchingpen chu milem be hote chuan an haw em em a ni. Keini chuan sorkar chu a thei tana thal tur sum bawm ni hian kan ngai tlat a, chu chuan kan hnathawh dan phung zawng zawng hi a nghawng a ni.

Chawlhkar tluana hna thawh mumal sawi tur awm si lova weekend ka hmang e lo tih ve ziah a zahthlak zia sawi nan he hmun hi a zim kan ti.


30 July 2017

Khawlum zualpui a reh chho a, zan boruakte pawh tih fuh tum chuan a dai leh ta riai mai. Rei loteah khua a lo hul chho ang a, tlang tin thiang leh fiah kukin a lo lang leh ang. Suihlungleng lo val awm tak ang maw.

Hunbi neiin, khel lovin a kum a tinin sik leh sa te an inher chhuak a, hmana liam tawh kha tunah a lo lang leh thin. Kan nun erawh chutiang a ni si lo. Hlim takin kan nui a, sang tak emaw kan inti a, nei tak emaw kan intih laiin kum khua atan saruak maiin kan herliam thin.

Kan nunah hian duh tawk chin reng hi a awm lova, hlimna hi thutthleng dup leh dup lovah a innghat lova, thinlung taka lawmna hi sa bel len leh tetah a innghat lo. Nunna hi thilthlawnpek a ni tih hrechiang apiangte’n an ngaihlu a, an tawn apiang an hmuh apiang hlimna leh lawmnaah an chantir thin.

Midangte tana tangkaina neih tum tlatte hian nunna hi an chawimawi a, pawisawi hlauh vanga sual ngaizamte erawh chuan phurrit an insiam thin. Mahni awmna hmun apiangah midangte tana tangkai taka kan nun phawt chuan kan khawvel hlui tawh takah hian danglamna kan thlen dawn a ni.

Kan naktuk nawm leh nawm loh chu vawiina naupangte hian an hril dawn a, naupang zawkte chher leh tah hriam kawngah nu leh pate kan harh thar a tul tak meuh e. Zirtirna an dawn loh chuan kan fate hi an tlawmngai viau dawn lova, an hawihhawm viau hek lovang.

Khawtlang hmangaih turin, midangte tana tangkai turin, Mizo dik tak ni turin i fa kha zirtir rawh. Kan naktuk chu a thiang nuam dawn a sin.


23 July 2017

Ramte, thiltihtheihnate, ropuinate hi kan thlakhlelh em avangin tam tak chu kan rilru a fim thei lova, ram leh hnam chu sawi loh mahni tana tha tur pawh kan ngaihtuah thleng thei lo. Thu hnu dawn lova hruaitute’n chet an lak hian a kaihhnawih a tam thin a, tuna ropuina hi nakina buaina zakhua min thlentu a ni fo thin.

Mahni chhungkua pawh rel fel a har laia ram hruaitu emaw, ram pum huap pawl hruaitu emaw nih a harsat tur zia chu a chiang reng mai. Chutiang a nih vang tak chuan fimkhur a ngai lehzual a, hma lam pan dawn pawhin hnung lam en leh zet a ngaih chang a awm ngei ang.

Ram leh hnam kan humhalhna kawngah hian kan hlam hi eng chen chiaha thui nge hriat a har a, a tul phawt chuan ban phak loh kan neih a thiang lovang. Mahni theih ang tawkin mahni tapchhak zawl theuhah lo tang ve mah ila thil tam tak chu a fawng chelhtute’n chet an lak loh chuan a ngaihna awm tawh lote pawh a ni thin.

He’ng hunah hian hruaitu tha chuan ram leh hnam hre rengin a chhe lai siamthat hna a thawk ang a, hma a hruai ang a, mawh a phur ngam tur a ni. Mahni tih dikloh chiang reng chu pawm mai leh a siam tha tura hmalak mai hi a puitling zia a ni.

Khawvel history kan chhiar chuan khawi ram hruaitu mah hi famkim an awm lo. Mahni tih diklohna atanga insiamthaa hma lam pan lui tlatte hi hruaitu hmingthang leh dingchang, hriatreng tlaka khawvelin a ngaih an ni thin.

Chhuan lo la awm zel turte tana ram nuam leh him kan neih theih na’n vawiina kan thutlukna zel hi a va pawimawh em!


16 July 2017

He column zim te hnawh khahna tur thu hi patling a pumpa hian kan pai hlek loh chu le. Rilru in kil tin a’n dap ngial a, thu han phuh chhuah mai tur erawh chu a awm chuang der si lo. Sawi a tul hunah sawi tur a bo duak a, ngawih a hunah tullo thleng thlengin ka sawi leh zuah zuah awm si a. Heti’ang mi tan hi chuan mi pawi sawi te hi awl tak a ni.

Rawn dawn a rawn tlak der si loh, ngaihdan nei tha in ti ve fu si hian mi zingah hre ber awm zia zangin ka dak zuah zuah a, tumah teh tling thei silo hian mi teh erawh chu ka peih phian a, mi hian min teh ve tho angem le? Hetianga engthawl taka ka awm lai hian mi tamtakte ruihhlo bawiha an tang ka hmu a, naupang te te atanga puitling tak tak thlengin ruihhlo zunah an uai a, ruihhlo aia duh an neilo a, an thisen in a mamawh ngawih ngawih avangin ruihhlo chuan a sawisa chau mek a ni. Mahni tha inti em em in ral khat atangin ka thlir mai mai a, kan chhungkua ah a lo lut ve thei a ni tih ngaihtuah nachang pawh hrelo in kut ka kuangkuah san thin.

Amaherawh chu ngun leh zualin ka han en a, heng ruihhlo ngaite hi kei ang bawka na thei, lungngai thei leh khawhar ngawih ngawih in ka hmu a, an natna leh hrehawmna tawmpuitu pawh neilo leh inthlahrung reng reng a nung, ruihhlo an hmuhna a nih phawt chuan eng pawh tih huam leh siin ka hmu a, chhantu leh hmangaihtu an mamawh em em a ni tih chu ka zuk hmu a.

Hetiang khawpa kan thalai leh naupangte sawisatu ‘Ruihhlo’ hi a huattlala mange. Thlei bik nei miahlo in chhungkaw tin luhchilh a tum a, theih tawp chhuaha kan do let a nih loh chuan he khawtlang leh ram hian a chhiatpui zual zel dawn a nih hi.

Min run a, min tih chhiat vek tumtu hi kan beilet a, kan do lo a nih chuan kan chhiat hun a thleng ang. Theihtawp chhuah in i do ang u.


09 July 2017

Branch YMA Library chu hawn a ni ta a, hun reilote chhunga kan library hmasawnna hi a ropuiin a enkawltute an fakawm takzet a ni.

Tunlai khawvel hmasawnna hian lehkhabu hi a kalsan tial tial niin a lang a, internet atangin kan duh zawng awlsam takin kan chhiar thei tawh a, chanchinthar, thawnthu leh thildang tamtak chhiar tur kan hmu thei tawh a, hei vang hian lehkhabu chhiar lamah kan tlak hniam phah hle niin a lang.
Amaherawh chu mizo mipui, internet hmanga lehkha chhiar thin tam zawkte hi chuan thuziak rintlak chhiarlo in social network hrang hranga mi thuziak, a dik leh dikloh pawh finfiah theih miah loh hi kan tuipui zawk niin a lang.

Social network lamah thalai mai bakah nu leh pa thlengin kan tlan nasa em em a, mizo tawng kan kaihlek a, duhdah takin thu kan ziak a, hetianga kan tawng kan hmang uluklo a nih chuan a diklo tih kan hriat reng kha a dik anga hman hun a la awm anga, kan hnam tawng chu zawi zawiin a ral mai dawn a ni. I fate’n mizo tawng thiam se i tih chuan mizo tawnga ziak lehkhabu chhiar thin turin fuih rawh.

Internet hi a tangkai nangiang e, kum 10 kalta a ka pu thlalak kan inchhunga zawn chhuah ai chuan kum 120 chuang kaltaa thi tawh, Abraham Lincoln-a thlalak chu hmuh a awl tawh zawk a, kan hriat duh apiang min hlui a, khawvel lehlamah min chentir daih thei a ni.

Amaherawh chu mahni chenna thlawh khuma tuipuiral mite nun zuk tawmpui chu hmasawnna khingbai a ni a, internet khawvel atanga kan hriatna leh a taka kan nun hi a kalrem loh chuan finna leh hmasawnna tluantling kan nei theilo ang.

Internet avanga lehkhabu chhiar kan ngaihthah a nih chuan kan hriatna tluantling kan nei theilo ang. Hriatna leh finna nei turin kan Library hi i hmang tangkai ang u.


02 July 2017

Tun laia fiamthu lar tak pakhat chu ‘YMA motto chu mu chunga tih hlawhtlin theih vek a lawm’ tih hi zuk ni tlat a.!

Mu chunga kristian nun dan tha ngaisang a, zofate hmasawnna tur ngaihtuah veng veng mai leh hun awl hman that nana mu tlat mai hi a awm theih tak tak mai angem?!

YMA hi a din tirh atang reng in kristianna nen a kal kawp tlat a, kristianna meichher chhi eng a, kristian nun dan tha (christian values) ken kawh leh nun pui chu YMA innghahna leh thuvawn chu a ni.

Kristianna in a ken tel tlat, mahni vengte hmangaih te, thil tha tih leh sual do te, ringtu nun ze mawi en chhuah tir te leh thil dang tamtak hi awm hmun atanga tih chi a ni lo a, pen chhuah a, thawh ngai vek a ni. Chumi tur chuan tawrh a ngai a, in pek a ngai a, taimak a ngai bawk.

Kristianna leh thatchhiatna a inrem lo a, thatchhiatna hi thil sual in tanna a ni. Kristian chu a taima a, entawn tlakin a nung a, hun awl nei hman lek lo in thil tha a ti a, kristian nun zemawi a lan chhuah tir thin. Hei hi hmasawnna bul chu a ni.

Heng hi YMA innghahna leh in zirtirna chu a ni. Kristiante tih tur tih hi YMA in Kristian nun dan tha a ngaihsan dan chu a ni a, hei hian hun awl hman that leh hmasawnna pawh a thlen a ni.

YMA chu mi zawng zawng huap zo ‘Pawl’ a ni a. Kristiante’n kan tih tur kan tih theihna atana remchang min siamsaktu, kristian nun ze mawi kan lan chhuah tirna tur pawl, Kristian nundan chhawm nung tlat tu a ni. Kristian nundan tha leh zemawi hi up beh chi a ni lo a, lan chhuah tir chi a ni. Tha a ngai a, taimak leh in pek a ngai a, hmangaihna a keng tel a, mahni in hlanna a ni.

YMA thuvawn hi mu chunga thawh chi zawng a ni lul lo e.


25 June 2017

Hla phuahthiam Liandala chuan pipute ro thil hlu, rangkachak aia hlu zawk tia a lo sawi ‘aia upate zahthiamna’ hi a tlahniam ta niin mi tamtakin an sawi thin.

Mizote hian inchhuanna deuh kan neih thin chu kan khawtlang nun leh kan hnam nun ze mawi tak takte hi a ni. Hmanlai atanga tawh a kan neih tlawmngaihnate, aia upa zahna te hi kan hnam min ti pumkhattu leh mizo min ti mizo tu an ni.

Amaherawh chu heng tlawmngaihna te, aia upa zahna te hi eng pawl emaw avanga lo awm leh, chu pawlah chauh chuan hmuh turah kan ngai ang tih a hlauhawm hle mai. Heng nun ze mawite hi pawlin a siam ni lo in a chhawm nungtu mai a ni. YMA hi mizo hnam nunphung leh ze mawi siamtu a ni lo a, a chawi nungtu pawl ropui tak pakhat a ni.

Thangtharte rilrua zawhna awm pakhat chu ‘an aia upate hi zah phu in an nung em?’ tih hi a ni. Zah phu leh zah tlak kan tehna a in anglo thei viau awm e. A maherawh kum upa zawkte hian keini aiin tawn hriat an ngah tawh zawk a, he hring nunah hian kan la tawn ngailoh tamtak an lo tawng tawh a, zirna in leh lehkhabu ten an pek theihloh tamtak upa zawkte hnen atang hian kan zir thin a ni.

Kan hnam nun zia leh tih dante hi kum upa zawkte atanga kan inhlan chhawn zel avanga mizo la ni thei kan ni a, aia upa zahna kan hlam chhiah a, ‘ka nun chu ka nun’ kan ti a nih vaih chuan kan mizo-na leh mihring ze pui kan hloh dawn a ni.

Aia upate zahna neilo mi chuan hre teuh mahse finna tak tak a zir chhuak ngailo ang. Finna chu a inngaitlawm a, finna tello hriatna chu a chapo thin. Finna chu aia upate hnen atanga kan zir a ni.

Hmangaihnate, zahawmnate hi phut chhuah chi a ni lo a, a pek a pek chhuah chi a ni. Midangte zahthiam mi chu ‘mi zahawm’ a ni.


18 June 2017

CYMA chuan kumin hi ‘Ram leh Hnam Humhalh’ kumah puangin kawng hrang hrangin hma a la a, he kumpuan hlawhtlin leh hlawhtlinlohna hi chawp leh chilha hmuh mai chi nilovin kan tu leh fate leh kan thlah kal zelte ah hmuh theihin a awm ang.

Changkanna leh hmasawnna in min nuai velna karah hian kan ramrite chu tih danglam nilo mahse kan hnam nunphung leh zia (Culture) tamtak chu sawi danglamin a awm mek a, hei hi khawvel nih phung a ni. Amaherawh chu ram leh hnam humhalh tih chang chawia thiamna leh finna leh hmasawnna dodal zawnga kan ram leh hnam humhalh kan tum a nih chuan min ti ral tu a ni hlauh thei, chutih rualin he hnam tlemte hi a ral loh nan kan humhalh erawh a ngai lawi si a nih hi.

Culture leh tawng hi min phuar khawmtu, pumkhata min siamtu leh hnam siamtu a ni. Kan culture leh tawng danglam mek hi hmasawnna in a ken tel ni bawk mahse mizo hnam nunphung leh tawngte humhim tura tha kan thawh loh chuan kan tu leh fate hi khawvel nunphung intawm (global culture) hian a lem zo anga, reiloteah hnam nun phung leh ze bik neilo, hnama chhiar tlakloh ah kan chhuak palh mai ang tih a hlauhawm hle a ni.

Dan hmangin tha takin in humhalh eng ang mah ila, kan hnam nunphung leh ze mawi kalsan a, hnam changkang zawkte nunphung kan lalut a, kan tawng kan hlamchhiah a nih vaih chuan he hnam hian tangrual turin tha a nei tawhlo a nga, ze nghet phuar khawmtu a awm tawhlo anga, engtik ah mah a ding chhuak tawhlo ang.

Mizo hnam a ral loh nan changkan kan mamawh a, changkanna leh hmasawnna hian kan hnam nunphung leh zia tamtak a thlak thung si. Hmasawnna mila kan zo nun zia hlauh si lo a kan culture kan her rem thiam hi a pawimawh hle mai.


11 June 2017

YMA day a lo her chhuak leh dawn ta. Chhiat ni that ni leh parachute la mitthla kawp tlat, YMA Social sawi apianga Pump khawnvar leh tualtuk tingtang la hrechhuak ve ziahte kha kan awm a. Chu’ng ho tan chuan YMA day hi a va hlimawm bik thin tak em!

Hetiang ni a lo thlen hi chuan hmana YMA kha a ngaihawm leh thin a, nunhlui chul tawh hnu erawh kan la ti phal lo. YMA kha khawtlang awi tleitu a ni a, kan ramin harsatna namenlo a paltlang reng lai pawha kan muanna a ni. |anpui ngaite tanpuitu, mahni aia midang langsar se ti tlattu hruaitute’n an hruai YMA hi tun thleng hian a hluin a Mizo ngawih ngawih a ni.

Hun kal zelah mihring kan lo pung zel a, keini branch te ngei pawhin kum sawmhnih kan lo tlin meuh chuan YMA member pawh kan inhre seng ta hial lo zawk a ni. Chutih laiin kan huhang tawn sang zawng erawh a hranpaa titipui tham a ni ang.

Kan YMA day ah hi chuan zingkarah YMA mi bik Pu Ria leh Puia te khan an ngamtlak zawng apiang kha rawn kaitho chho leh zut zut se, eng vak zawh chian hma khan liam leh ta vut bawk se. Hruaitute khan kawn remchang lai apiangah hnathawh kawr nen member kalkhawmte min lo hui hai sela, kan zingkar boruak atang ngawt pawhin chhun lam chu a nuam dawn tih a chiang leh nghal mai ang.

YMA bela chhum hmin, a ei nuam tawka khawrh chhuah hruaitu leh member nih hi kan tum tur a ni a, YMA hi hna dang min thulhtirtu a ni tur a ni lo. He YMA day kan hman leh tur denchhen hian mahni inbihchiang ila, tuna ka nihna ai hian tlawmngaihna kawngah, aia upa zahna kawngah, hawihhawmna leh taimakna kawngah hma ka sawn ang tiin rilru i siam ang u.

Hmana YMA, tun thlenga kan YMA ah hian puan ang chul hnu kan nun ze mawi kha lo vul leh rawh se.


04 June 2017

Kumin HSSLC result chhuaka ram pum huapa titha berte zingah khan mahni veng YMA activities a mi tangkai tak tak an lo awm thluah mai a, chu chuan nasa takin kei chhuanlam siam liana hi min cho a ni.

Chutih lai mek chuan veng thenkhatah Lecturer leh Doctor te hialin mitthi buhfai an khawn thin tihte han hriat zel phei chuan YMA leh kan Zoram hmabak hi a eng hle hian ka’n hre ve a, a nachang hrelo tam takte pawhin finchhuahtu mi entawntlakte hnung zuiin kawng dik kan zawh ngeiin ka ring a ni.

Kan veng ngeite pawh hi han en ta ila. Veng chhunga hruaitu nihna nei, pawl hrang hranga a fawng chelhtute pawh hi mahni hna leh nitin khawsakna kawnga mi buai tak tak vek an ni. Khawtlang hruai leh rawngbawl hna hi hman bik vanga thawh chi a ni lova, hun chep tak kara tlawmngaih chhuah a ngaihna chi deuh vek a ni.

Mahni inchhung khura mawhphurhna nei lian tak takte hi khawtlang tana mi rintlak leh mi tangkai ber berte an ni fova, mahni zirna kawnga chhuanawm tak, zirlai taima leh nungchang thate bawk hi khawtlang kut leh ke an ni thin.

YMA huang atanga khawtlang rawngbawlna hi tumah a ti tura ruat bik an awm lo. Mitthi an awm changa kuang siama buai thin hote, kan in vui liam leh a hnu lam thlenga min tawiawmtute hi hetiang tura ruat bik an ni lo. Chutih a hnehin mahni hnaa buai leh chhungkuaa mawhphurhna lian tak tak neite an ni zawk a ni.

YMA chu a tha mang e tih tawngkam ringawt hi a tawk ta lova, YMA member kan nih anga mahni ngei hi YMA tihmingthatua kan tan a hun takzet a ni. Midangin lo ti mai se tih rilru hi kan paih a hun a, midangte tana kan inpek nasat ang zelin kan khawtlang a lo mawi ang a, mahni pawhin a hlawkna kan tel ang. YMA in a mamawh che a ni.


28 May 2017

Buai reng reng in kar kan hmang liam a, kan buai dan erawh a in ang lo hlawm narawh e.

Buai theia kan awm te, buaina tur neia kan dam te hi a lawmawm a, kan buai luat avang hian ‘hun awl hman that’ tihte chu rilru ah pawh a lang hman meuh lo chu a ni e.

Kan hun hman mek hi mitkhap kar tinah a liam zel a, a lo kir tawh dawn lo.Hun hi kan hmanraw neih that ber, nakin atan tia kan khek theih miahloh, hman nghal zel ngai a nih avangin a tha thei ang bera kan hman hi a pawimawh hle a ni.

Mi tamtak chu kan buai lutuk a, enge maw atan hun kan nei lo a, kan buaina ah hun kan mawhpuh thin. Hei hi kan hun hman thiamloh rah a ni. Ni khatah darkar 24 a awm a, mi zawng zawng in kan hun neih zat a in ang vek a, kan hman tangkai dan erawh a in ang si lo. Hnathawh nana kan hun hman zat te, thian kawm leh intihhlim nana kan hun hmante, TV en nan leh Phone leh Computer khawih nana kan hun hman zat te, chhungte leh midang tan a kan hun hmante leh mut nana kan hun hman zat te hi kan chhut ngai em le?

Hringnun hian nitin in duhthlan tur min pe a, kan nitin nunah hian kan hlawhtlinna tur leh hlawhchhamna tur kawng chhawp chhuah a ni thin. Kan tih tur leh tihloh turte, kan tih hmasak leh ngaih pawimawh hmasak turte fel taka kan ngaihtuah lawk chuan kan buaina tamtak hi chu pumpelh theih a ni. Buaina pumpelhna kawng thatak chu ‘hun hman tangkai leh hman that’ hi a ni.

‘Hun ka neilo’ kan tih thinna tam tak chu ‘mut hma leh thawh hma’ hian a pumpelh theih a ni. Hun in ang theuh kan neih hi kan hman danah kan hma lam hun a innghat tih hriain hman thiam i zir ang u. Hun hi a va hlu em!


21 May 2017

Tum khat chu chawlhni tlaiah Aizawl Chanmari veng kawtthlerah sawn Salvation Army thalaite’n inkhawm an nei a, hla an han rem dawn chuan Mizoram Presbyterian Kohhran a zaipawl hruaitu tha ber pawl Pu C Vanlalvuana inkhawm bang chu an lo kova, ani hruaina hnuaiah chuan mawi takin fakna hla an rem ta a. A hmu apiang thinlung a khawih a ni. Remna chung chang hi I sawi teh ang.

Mihringte, pawl leh pawlte kan inrem theih thin loh nachhan nia lang chu duhzawng thuhmun loh vangte, tha zawk, lian zawk, mawi zawk emaw nih duh vangte leh chapona avangte a ni ber. Midangte rem thei miahlo mihring kan awm a nih chuan mahni inbihchian kan ngai khawp ang.

Kum 1935 a YLA a lo din atanga vawiin thlenga YMA in Mizo khawtlanga remna leh muanna a awm theih na’na a thawh dante han thlir hian he pawl hi a zahawm ngawih ngawih a, kohhran nena hrui khat vuana hma an lakna zawng zawngte han thlir hian he pawl hi kan damna tur a ni.

Chutihlaiin hun thenkhatah kohhran lama rilru pe deuhte’n YMA hi kan thlauhthla ta fo niin a lang. YMA in kohhran a kalsan aiin kohhran mi thenkhatte’n YMA an thlauh thlakna hi a langsar ta fo mai. Kohhran leh YMA hi a kal dun thin a, YMA hian kohhran hi a mamawh a ni.

Ngun taka thlir chuan kohhran huang chhunga inrem theilote pawh hian YMA changvawnte chu kan sawi rual thei hle si a, midangte nena inremna kawngah hian YMA hi a ban a va sei tak em!

He ramah leh kan veng chhungah hian mitinte zingah inremna hi lo piang zel se, Kristian theuh theuh, vanram kai tum vek he khawvela kan chen ho lai pawh hian midangin keimahnia an rem theih loh laite paih bovin leh mahni pawhin midangte pawm thiamin i khawsa tlang ang u.


14 May 2017

He thu kan buatsaih lai hian zanlaiah boruak uap churh hnuaiah thlifimte an chawl thuap a, chung lama chhum inphan karah thla a rawn lang zauh zauh thin a. Chutih lai chuan mitthi lumenna lam atangin khuang a ri dap dap a, YMA memberte’n theihtawpin lusun chhungte hnem turin zai an vawr a ni. An thawm lo hretu nu leh pa tam tak pawh thlamuang takin an mu siai siai ngei ang.

Hruaitute thahnemngaihna avangin chhiat ni chung changte sawi tam a ni a, chu chuan rah tha chhuah zelin lumenna lamah pawh member kan buk hret hret a, section inthliarna awm lovin thalaite lusun hnem turin kan kal khawm thin a, a hmuh a nuamin a thawm pawh a mawi a ni.

Tun hma veng indan hma chuan chhiat tawk kan awm hian a buaithlak thin hle. Veng chhungah mitthi dar vuaa kal kual a ngai a, mitthi buhfai leh thingfak dahna pawh hla tak a nih chang a awm. Vengthar leh Tlang veng lamah te pawh lumen ngai awm se kan veng lamin a hlat vangin kal an thulh phah lo.

Saizahawla section lam atangte hian val upate’n nula tlangval an rawn chhawm chho ang a, Chawngbawla section lama thiante sawm pahin khawhar lo takin lumen zan hautak zette pawh an va tum tawi thin. Chu’ng mi tlawmngai tam takte chuan tunah chuan nu leh pa chan chang tawhin kan tunlai thalaite nungchang hi min thlir reng a ni.

Khawpui thalaite hawi her hi engemaw hun laia ruihtheihthil leh thil dang vangtea hniam viau lai awm mahse thalaite hian hruaitu tha tak takte avangin Mizo nun mawi hi kan chhawm nung leh mek niin a hriat. Aizawl veng lian leh mi tam takin kan entawn vengahte hian thalaite nungchang a mawi hle a ni. Chung zawng zawngte entawn ni turin Nursery vengah YMA vul zel teh se.


07 May 2017

Khawtlangin chhiat kan han tawh hian hnam dangte ang lo takin a khawtlang buaiin kan buai thin a, thalai leh nu leh pa thlengin tihtur chanpual kan nei theuh mai. Chu chu Mizo kan nih anga khawtlanga kan mawhphurhna leh mi pangngai nihna a ni.

Mitinin khawtlanga kan mawhphurhna theuhte kan hlen zel loh chuan he hnam hian zawi te tein a kalphung a hloh hret hret tihna a ni a, he mawhphurhna hi mi tlemte kutah a tlak chuan Mizo te min ti Mizotu pakhat chu a bo hret hret tihna a ni ang. Kan veng atangin matric pass thar tam tak kan nei leh ta a, muan khat chuan kan muang leh ta. Anni hian ngaihsan tur dik an ngaihsan a, entawn tur dik tak an entawn phawt chuan kan veng hian lawmna tam tak kan la tawng zel dawn a ni.

Zirlai thiam hi a hlu a, zirlaibua inziak ve lo thil tam tak kan hriat ngai si hi khawtlangah zir chhuah tur a awm. Chu’ngte kan zir chhuah thin loh avang chuan lumen zanah mi kan tlem a, thlan laih leh mitthi buhfai khawn chung changahte hruaitute an phang thin. Midangte tana inpekna hi Kristian kan nih anga kan tihtur leh Mizo kan nih anga kan vawn reng tur, a taka kan chet chhuahna tur a ni.

Mitinin kan duh khawtlang muanawm nei tur hian chanvo kan nei theuh mai. Zan lama mahni fate lenna hrelo nu leh pa nih tumlo ila, min tibuaitu ruihhlote a bo theih na’n hetiang tih chingte chu kan entawn lo mai nilovin kan ngaisang lo tih kan tilang ngam ang.

Thlan laih hun laia khawlaia tlangval awm mai maite kan ngaisang lo ang a, mitthi buhfai khawn ngailo nula chu kan chhinchhiah ang. Hruaitute’n entawn tur siam se, Nursery veng hian kan zui zel ang.


23 April 2017

Tlang sang tak chungah nauban vulna ramah thereng kiu ruai ruai hriat tur a awmna ramah kan cheng a, ramngaw dur pui pui leh kham chheng chhia, lui dung khawkrawk hmunte pawh Pasalthate tuallenna a ni. Ruam thuk tak tak atanga thlifim rawn tleh te’n boruak an then faina hmunah hian chen ve chakin mi tam tak chuan phai khaw lum atangin min thlir reng zu nia. Colonial hun lai atanga vawiin thleng hian keini hnam tlem zawkte hi hnam dangin an duh thala min tlawhchhuah theih lohna turin Bengal Frontier Regulation Act hmanga humhalh kan ni a, chu chu sorkar dan a ni.

Ram hmasawnna kal zelah hnam dangte tel lova khawsak reng theih a nih lohna tam tak a lo lang ta a, sorkar dan chu awm mahse Mizo hnam hian chhungril lam atanga mahni inhumhalh kan zir loh chuan kan hmabak chu a thim hle dawn a ni. Chutiang tak chuan YMA in kan ram kan hnam a himna tura inkaihhruaina a siamte hi hriat nawn fo a tul hle mai.

Shillong tlanga i kal chuan Khasi hnam chu nasa taka chim ralin an awm tih i hmu ang, chuti chung chuan rel kawngin a la pawh ve lo lehnghal. Hmana Dorothy te thingpui dawr hmun leh hmate kha hnam dang ngal sang tak takte’n an luah zo ta a, C Thuamluaia te pawh kha zuk kal leh ta se ‘a tlang a mual mah dang si lo’ tih zawng kha an chan tur a ni.

Thenkhat chuan mahni chauh kan ingaihtuah thin avangin pawisak kan nei tlem a, ram leh hnam phei chu kan ngaihtuah thleng pha lo. Lu chhum ban chhum huama kan pi pute’n an lo humhalh he ram hi luah zui tlaka siam hi kan bat a ni a, Ram leh Hnam Humhalh tih hi kan thupui chul thei lo a ni.


16 April 2017

Good Friday rampumin urhsun takin kan hmang zo a, rilru in thawhlehna lam a thlir a, nunna petu meuh nunna a pektur te tana a thih aliama hmangaihna nasa a awm thei dawn em ni.

Thihna hneh tur in nunna petu chu a thi a, mitthi khaw kulh kawngkhar chu sawi chimin nunna kawngkhar chu thawhlehna in a hawng a, chu nunna a lut tur chuan ‘kawng leh thutak leh nunna ka ni’ titu chuan a thawk zo ta. Chu kawngah chuan kalin nunna kawngkhar ah chuan i lut ang u.

Kan nunna tura nunna petu a thi ang hian keini pawh nung tur chuan he kan taksa hi a thih ve a ngai si. Mi tamtak nunna a lut tur in an thi tawh a, an thi mek zel bawk a, chu’ng kaltaten an chhuahsan an taksa ‘thi’ tawh chu la thi ve lo ten ui tak chungin kan thlah liam thin a nih hi.

Heng mitthi te hi keini Mizote chuan kan tlaivar pui a, a phumna tur kan lai a, an chhungte thlamuan turin kan lenpui thin. Hemi atan hian sum leh pai tamtak kan seng a, heng senso atan hian kan vengah pawh kum khat atan chhungtinah Rs 250/- aia tlemlo kan in khawn thin a nih hi.

Heng kan pawisa khawn tling khawm hian mawi takin kan inthlah liam thei thin. Amaherawh- chu kumin atana kan pawisa khawn tlingkhawm chu kan hmangzo a ni deuh ber tawh a, hei hian ngaihtuahna a tithui hle mai.

Hetianga kan inpeizawn dial dial hi a mawi a, kan inhmangaihna lantirtu a ni. Mimal tana hautak em em tur kha YMA hian hautaklo takin min tihsak thin a lo ni. Veng mipuite’n i ngaihtuah tlang ang u.


09 April 2017

Chawlhni zing a lo ni a, khawvar hma hauhin a boruak hi a zalen nghal ni hian a lang a. Thlang lam atanga thlifim rawn thaw heuh heuh chuan thing hnahte a rawn chhem che siau siau a, zan lam hram thiamte an tin rualin khawvar lawmin sava chi hrang hrangte an lo hram a. Ral leh lama thehleite pawhin an thiam ang tawkin an tel ve thu an rawn sawi a.

Hosanna, a va mawi tak em! Boruak thianghlim tak mai duh tawka han hip hnuah zing ni chhuak mawi em em mai khan ralkhat tlang lam a rawn chhun tan ang a, thing hnahte chu an no leh nghual mai dawn a ni. Chung lamah vamur an leng nauh nauh ang a, keini tlak lam vengte chuan khawsak kan rel chho tan ang. He ramah hian nun hi a zalen a, thilsiam reng rengte hi an mawi bik a ni.

Zalenna hlut zia hre tur chuan zalen loh hrehawm zia hriat phawt a ngai awm e. Kan tunlai boruak thlirin keini thangthar zawkte hian he zalenna hi kan hmang thiam lo fo niin a lang. Khawlaia vaka pawi tenau khawih reng mai chite pawh kan awm ve ta reng mai.

Ram zalenah chuan dan leh thupekte tha taka kenkawh a ni thin a, chu chuan nasa takin sualna a nek chep thin. Khawtlang hruaitute pawh zah lem lo, naktukah eng nge ka thawh dawn tih pawh ngaihtuah thleng pha lo, pawisak em em nei chuang silote pawh awm theih a ni. Chutiang mi kan nih chuan insiamthat hle kan ngai.

Pawi khawihna avanga a nih tur anga danin kan chunga ro a rel tawh chuan tal chhuah a har tawh a, eizawnna tur kawng zawn thlengin a nghawng tawh thin. Kan khawtlang hi a zalen a, he zalenna hlu tak hi nuam ti takin, hlut tak leh fimkhur takin kan chen ang a, mahni tana thalo leh midangte pawi khawih lo zawngin i nung ang u.

Chutichuan nun ho a nuam ang a, naupangin hma an sawn ang a, nu leh pa pawh an hlim ang. Kan Hosanna thawm pawh a mawi dawn a sin!


02 April 2017

Mahni tul tula chawlhkar tluana tul tawh hnuah chawlhkar tina thu awmze nei han sawi ve ziah tur chuan taimakna in a tlin lova, thiamna in a pha hek lo. Chuti chung chuan kan dam a nih si chuan mite min beiseina leh kan kova tla chu kan hlen ngei a ngai bawk si, chu chu hringnun zirlai pakhat a ni.

Nupuite pawnfen kar atanga veng chhung hmasawnna rawn ngaihtuah thin te, nau puakpuan nena min lo ngaichang thinte pawh kan tan chuan in hlu a, hringnun zirlai tikimtu in ni e!

He khawvelah hian nunna hi a hlu ber a, kan dam chhung rei loh zia ngaihtuaha thiam taka hringnun hmang tur kan nih laia he zirlai kan thiam theih loh zia leh India sipai tam zia chu keini sawi vanga fiah chi pawh a ni meuh lo.

Mihringte hi a huhova cheng tura siam kan ni a, chu kan chen hona ah chuan mitin hian mawhphurhna leh chanvo kan nei vek. Mahni chanpual kan hlen loh leh kan vawn thiam loh avang hian kan khawtlang a nuam lo fova, kan chhungkua a buai a, kan nun a chhiat phah fo thin.

Nunna chungah hian thu neilo mah ila he dam chhunga midangte tana mi tangkai nih tum tlatte chu he khawvelah hian dam rei lo mahse he hringnunah hian an nung reng thin. Dam chhung reilotea midangte tana hnawksak reng mai mite hi chu an damlai hian kan phum tawh a ni.

Heti zawng hian ngaihtuah teh ang. He khawvelah hian hausakna leh hmingthanna umin kan tlan suau suau a, mi hausate’n chin tawk nei lovin an duh belh zel a, tam tak chu nawm kan tum luatah kan dam rei loh phah bawk.

Chutiang a nih avang chuan tuna kan neihsa hi hlimpui mai ila, kan neih loh leh kan phak lohte’n min bawh beh reng mai chuan he nunah hian kan tho chhuak thei lovang. Hringnun hi hlim taka hman tur a ni.


26 March 2017

Nasa takin ram a insingsa mek a, sorkar laipui pawhin Look East Policy te chak taka kalpui zelin tunah hian India hmarchhak ram lamah hmasawnna ruhrel tam tak din chhoh mek a ni ta. Kan duh emaw duh lo emaw khawchhak ramri depa awm kan nih miau avangin tun atanga reiloteah kan ramah hian kan la hriat ngai loh thil tam tak a lo thlengin kan hmu chho zut dawn a ni.

Sairang lamah Tlawng dung zawha i kal chuan rel kawng lai hovin vung an chhuah terh turh i hmu ang. Reiloteah kan ramah rel a lo lut ang a, chu chuan bungrua tam tak a rawn phurh thlen rualin hnam dang tam tak, sum leh dinhmun tha zawk mamawhte a rawn phur lut ngei ngei dawn a ni.

Thar chhuah mumal neilo Zofate’n a hminga kan thar chhuah vete phurh bo na’n North East Frontier Railway hian thla hnih khat bak an mamawh dawn lo. Ram tha zawk leh mihring taima zawk awmna Burma ram lam atangte khian bungrua a rawn lut thla zut ang a, keini ho hian rilru kan neih loh chuan hlep kan nei lovang. Mahni thut hmuna ram leh hnam humhalh kan lo tum ve ngawtte hian kawngro a su thui tawh dawn lo.

Tun apangin Changsil leh a chheh velahte chuan vai hnathawk an vir mup mup a, haw leh vek tura kan ngaih chuan kan tisual ang. Kan ram hian hmasawnna ek chhia tam tak tawn tur kan nei ngei dawn a, chu chuan kan hnam leh kan sakhua hi a nghawng ngei dawn a ni. Sum mamawh vangin tam takin ram leh hnam an ngaihtuah phak kher lovang.

Chutiang hun a lo thlen hunah chuan hmana Pu Rokunga te’n an lo awih nun, mi tlem te te kuta kan dah deuh tak tuna kan YMA bawk hi kan la mamawh zual dawn a ni. Kan ram kan hnam tana ding thin, kan khawtlang uap lumtu YMA ah hian tunah ngei hian lo tel ve teh.


19 March 2017

Kan ramah sakhaw hlui leh sakhaw thar inbuanin nasa taka khawtlang nun a nghawng lai, Indopui boruak leh lehkha thiamna boruakte’n nunphung a tih phawklek lai takin YMA hi a lo ding a. Mizo khawtlang thuikhawmtu, kan hnam nun mawi humhalhtuah lo tangin YMA hian hun harsa tam tak a lo paltlang tawh a ni.

Chu pawl ropui leh ngaihawm tak YMA chuan kan tunlai boruakah chuan phatsan a hlawh ta fo niin a lang. YMA hnatlang a nih chuan phat a nuam a, committee a nih pawhin phatsan a hlawh ta malh malh viau. Chhuanlam tur hi YMA hmaah chuan a awm zel a, kohhran, zirlai, hna, chhungkua ah hian YMA min phatsan tirtu hi a tam ta a ni.

YMA phat thintu tam berte chuan YMA activities pawimawh chhiat ni that nia buaina hrang hrangte hi YMA awm lo mahse Mizote’n an ti mai ang tiin tawngkam an nei fo thin. YMA hminga thlan kan laih lai pawha lai ngai lo hi chuan mahni thu chuan thlanmual an pan a rinawm loh a, veng chhunga lumen zanah phei chuan an inlar dawn lo. Chuvangin kan hnam nun mawi hrang hrangte humhalh tur chuan YMA aia tha hi a la awm chuang lo a ni.

Kawmthlangpa fel zia sawi dawn chuan kawmchhakpa sual zia han sawi zet hi a ngai thin a! Veng tinah hian thuthmun tualchher Ukil kan kawl deuh vek a, YMA thiltihte pawhin sel leh sawt a tawk fo thin. Chutiang a nih lai pawh chuan YMA thupui nghet taka vuantu, fin loh leh hriat loh ang anga khawtlang leh YMA tana rinawm tlut mai mi tam tak an awm ve bawk.

Chu’ng mite avang chuan kan ram leh hnam hi humhalhin a la awm hram hram a, ruihhlote pawhin min han run mahse kan buzawl an luah thei bik lo. Chutiang mite zarah chuan a ni YMA hi a ropui ni.

Nilen nuam ule.


12 March 2017

Mizote hian hnam dangte chin ve loh dan tha leh mawi kan nei thluah a, chu’ng zinga langsar em em leh hnam dangte’n an awh em em chu chhiat nia khawtlang kan intawiawm dan hi a ni. Hei hi tun thlenga kan hnam nun chawi nungtu a ni.

Chu chhiat nia kan inrelbawl danah chuan felfai zawka thil kalpui a nih theihna’n kan hruaitute’n inkaihhruaina tur kawngte an rawn duang leh ta a, he’ngte hi a taka kan zawm chuan hmasawnna rahbi thar kan kai a ni ang.

Chhiat tawk an awm changa kan intawiawm hian tlawmngaihna kan lantir a ni mai lova, kan Mizo hnam nun mawi kan humhalh zel a ni. Tlawmngaihna chuan phut let neilo mahse YMA hian kan hnam nun mawi humhalh tur chuan Mizo zawng zawngte a phut tlat a ni.

Thlan laihte, mitthi lumen tlaivarte hi hun neih bik vanga tih a ni ngai lova, hman biklo leh buai chung chunga kan zinga mi thenkhatin an lo tih hian tumah phut kher an tum lo. YMA rilruah erawh chuan hetiang nikhuate hian thalaite hi a tam thei ang ber kal ila, mawi takin he Mizo nun hi lo parchhuak se tih a ni.

Zan tin kan tlaivar lovang, thlan laihte phei chu kan khawsak phung inthlak zelah chhunzawm theih loh hun a la thleng ngei dawn. Thawnthu ang maia kan la sawi tur kan hnam chin dante hi tunah chuan an la hlu a, kan thlahthlam thiang lo.

Khawtlang huap thila chet chhuah a ngaih apianga mahni indahthaa midang kuta innghat hmak theite hi an huaisen a, Kristian sakhua vuan reng chung sia midangte tana ni khat pawh pe theilote hi mi ropui an ni. Ngaihsan tlak erawh an ni lo.

He hnam hian hun inthlak tam tak a la paltlang dawn a, tuna kan chin dante pawh hi thlak a la tul leh dawn. Tunah erawh kan tihtur chu kan hria, mahni theuh i penchhuak ang u.


26 February 2017

Hmana min phurpuitute khan min bansan ta vek mai emaw kan tih mek laia thianpa Hriatrenga te’n min rawn hriat rengna hi kan tan chuan a hlu a, a thu ken a that piah lamah a boruak a zangkhai a, mi tam tak cho chhuaktu ni se kan ti hle mai.

Kan tunlai khawvelah changkanna hi engtia teh tur nge tih hi kan ngaihtuah nawn fo a ngai ta hle mai. Hnam changkang zawkte tih dan kan entawn lutukna lamah Zofate hian kawng kan bova, thalaite hian ram ropui kan thleng zo lovang tih a hlauhawm ta.

Thawhrimna hi kan ngaihsan hmasak ber tur a nih laiin a rahchhuahin a ken tel nawmsakna lam kan entawn hmasa thin a, thalai nalh tak tak, hnathawh huna khawlaia leng zuai zuai hmuh tur kan tam ta. Zep nak emaw Chhiatni fund pek harsat chhungkaw zingah thalai hnathawk rual kan awm teuh. Kan kuang man hi chu kan thawkchhuak tur a ni dawn lawm ni.

Kan phone hmaite hlaiin kan instagram thlalakte pawh changkang hle mahse hnathawh kan tum tlat loh chuan kan daih rei dawn lo. Internet lamah chanchin tharlam ber ber chhiarin music leh fashion thar ber ber hmelhriat mah ila thenawmte dam sam loh pawh kan lo hriat leh si loh chuan kan mualpho tho tho dawn.

Exam naa chhuak lo chi thil thar hriat theih viau hi chhawr a har. Chapchar Kut te pawh a lo hnai leh ta. Kolkata khawlaiah khuan Rabindranath Tagore aia Taylor Swift i hriat viau khan an ngaisang lovang che, Tagore a Gitanjali aia Rokunga hlate i hriat bel viau chuan an ngaithiam zawk ang che. Mahni hnam thilah hian chiang ila, kan Chapchar Kut te, kan Ramthar zaite nen hian hma i sawn zel ang u.

Thal romei zam kara Chapchar kut hmang turte kha, fim takin aw, hlim takin aw!


19 February 2017

A thu leh hla hmanga kan chanchinbu luahlum thintu, hawihhawm taka naupang min rawn be thintu Pu Mangkhuma chuan ropuina ramah min lo kalsan leh ta a, a thu leh hla hnuhnungber hmanga thlah liam a ngai ta mai hi a lungchhiatthlak takzet a ni.

Tak ngul reng maia hringnun hman hi thil hahthlak mai a ni a, he dam chhung tawi teah hian thil famkimlo tam tak a awm a, chung zawng zawngte pawh chu pawm thiam a, hlim taka hun hman zel hi kan tihtur niin a lang.

Kan YMA angte phei hi chu khawtlang huap tak meuh a nih avang hian khawilai kilah emawte chuan rim na tak takte pawh an awm dawn tih a chiang reng, chu chu thil tha ber nilo mahse khawtlang tana tha tur zawnga kan dinhmunte kan siamrem thiam zel chuan veng tangrual kan ni ang. Kohhran mi kan nih avanga mi zawng zawng kohhran bel tlut tura beisei tlat te, kan inkhawm thatchhiat deuh avanga inkhawm hote beih chiam zelte thil tha a ni lova. Khawtlang thatna tur chuan kan danglamna zawng zawngte nen zai khata kan luan za a tul a ni.

Chutichuan Pu Manga te lenna vanramte pawh khi heti zawng hian i ngaihtuah teh ang. A kawt hmawrah khan Puia leh amah Pu Ria ngei mai hian min lo huihai sela, kil khatah Pu Mazova te ang ho hian Petera hova an len deng hlawhtlinzia hahipin lo sawi sela. Hla kan rem dawn tiin Pu Jka tui vaklo chung chung hi Pu Chhanmama a te ho rual hian lo sawm chhuah tum bawk se. A mual pawng tha lai deuhah Pu Rova te ho hian tawtawrawt lo ham te vawn vawn mai bawk se.

Chutiangte chu ni mahse Pu BMa te rual ho hi chu a peng thara mi nen Thal awiin lelte pa’n lenbuang a nghak ti bawk khan an la zai hian a nia ka rin. Hringnun hi a va mawi em!


12 February 2017

Van boruak zau takah khian a han hawi vel a, kan la hmuh loh khawpui a han hmu a, a thlir lam apiang chu a mawi em em mai. A zau zia hriat phak loh chu khawpuiah chuan indo buai awm lovin hmangaihnain ro a rel a. Riltam leh retheih reng reng awm lohna Jerusalem ah ngei chuan Pu Sawma chu a lawi ta asin. Vanram chu an zai tui sawt hian ka ring mang e.

Kan chenna khawvel hi a chhunga cheng mihringte hian a ni telin kan tichhe zel a, thu hnu dawn lo leh mahni hmasial taka kan awm thin avangte hian vanduaina kan tih tam takte a lo thleng a, nun dan kan thiam loh rah chu kan dam lai ngei hian kan tel leh fo a nih hi.

Ngun taka ngaihtuah chuan chhiatna kan tih fote pawh hi kan inthlahdah vanga thleng a ni fo. Furpui lo thlen huna leimin laka buai lo tur chuan tun atang hian kan inbuatsaih lawk a ngai a. Kum hnih khat mai thlir lovin thang khat liante hi thlir phak ila chuan hei ai hi chuan kan tuidawn te, kan tui chhe paihnate thleng hian kan ulukin a rinawm. Chu chu thil pakhat a ni.

Chu aia la pawimawh zawk chu chhungril nun tha a ni. Mihringte hian tehna kan insiamchawp a, a lang theiah kan inteh vak vak a, chhungril lama tha vaklo pawh a inthup thiam phawt chuan kan teh tling fo. Tute pawh hian he khawvelah hian damchhan kan nei theuh a, chu chu kan inzahtawn sak a ngai a, chutih laiin midangte zai ngai thiam mi chu belhchian an lo dawl nge nge thin.

Hetiang hian nunphung tha zawk hi sawi fo mah ila kan khawvel leh kan nun hi chu a la tawp tho tho dawn a, chumi tawpna lam pan chuan chak takin kan tlan mek reng a ni. Kan then tak kan thenrual tam takte nen kan la inhmu leh dawn a, thenkhat chu kan hmu kher lovang. Pu Sawma hova han lam vel chu a nawm ka ring.


05 February 2017

Rinna hi thil tih tel lo chuan thi a ni ang deuh hian tlawmngaihnate pawh hi a thawm chauh hriat tur a awm a, a taka chetna hmuh tur a awm si loh chuan a ho der ang. Mahse chutiang nilovin kan veng chhungah hian mi tlawmngai tak tak, midangte tanpui kawnga khalh theih loh mi tam tak, kan hruaitute atanga memberte thlengin kan awm tih kan hria. Kan thla a muangin kan va chhuang che u em!

Thenkhatin khawvel hi tawp mai tawh tur leh tawtawrawt te pawh rawn ri deuh hlut hnaivaia an ngaih laiin thenkhatin Zoramthar lo awm turte an la hmu ve mek bawk a. Chutiang ngaihdan inpersana inhawilo deuh deuh karah chuan nitina hmasawn tum zel hi a sual thei lova, thil tharte pawh a tha lam a nih chuan kan zir zel dawn a ni.

Kan khawvel hun hman mek hi hun danglam tak a ni a, fanghma inchhawlthuai atanga airmail envelope tlang tial hmanga lunglen thu kan inhlan chhawn hun thleng kha chuan thil danglam em em a awm lo.

Hmasawnna hian kan nun hi a thlak danglam ta em em a, hei hian thui tak a tha zawnga min hruai laiin a thalo zawng pawhin min hruai ve bawk. Thalai leh nu leh pa chen hian kan phone hian kan hun hi a la nasa em em a, puipunna a ni emaw, mahnia kan awm lai a ni emaw phone hi kan khal ta deuh reng hlawm mai. Kan gadget changkang tak takte hian kan eizawnna leh kan zirnaah te min pui nasa viau a, mahse chin tawk kan neih loh chuan kan hun tha tam tak min eisak a, midangte tanpui hunah kan che hman lova, thenrual kawm hunah min tlanbopui bawk.

Khawtlang nun tha zawk leh nuam zawk siam tura min kaihruaitute hi kan entawn ang a, hnathawk lova awm hi kan zak ang. Tanpui ngai kan hmuh phawt chuan kan tanpui ang a; Hma kan sawn zel dawn a ni.


29 January 2017

Nun nawm zia leh hriselna hlut zia kan hriat theihna turin bawrhsawmnate’n min han tlakbuak ve thin a. He thu buatsaih tura kan han thawh harh leh meuh chuan sava hram mawite leh naupang hlim nui rite’n chibai min lo buk leh ta. Hringnun hi a mawi mang e.

Chutia sik leh sate’n inthlak zai an rel leh dawn takah chuan kan nun hi i ngaihtuah teh ang. Tun atanga reiloteah hian thing hnah tla chite chu an tla kawlh leh fua hlawm ang a, thal romei a lo zam ang a, ral khat tlanga vaube leh fartuahte kumtin dana an lo vul hunah hnah tharte an lo chawr leh ang.

Tuai thar ve tawh lo tur kan nun erawh vanglai kan pelh tawh chuan a rawih tial tial dawn a ni. He khawvelah hian kum tam awm pawh tum ila kan chhehvel thilsiam dangte nena khaikhin chuan rei tia sawi tur kan awm dawn lo. Chuti chung sia kan nun dan en hian kan zahpuiawm deuh a ni lo’m ni.

History kan chhiar chuan kum te hi a za bi, a sang bi tein kan chhiar a, hnam tam tak an lo chhuakin an lo boral thin a, mi tha apiang an ziktluak nge nge zel a ni. He damchhung rei lo tak mai turah hian duham hian awmzia a nei lova, midangte elrelna’n chuan kan nun hi a pamhmai kan ti a, damlai lung mawi taka phun hi kan tihtur diktak zawk a ni.

A thalo ai chuan a tha zawk zel kan thlang ang a, kan chhungkuaah, kan khawtlangah, kan hnathawhna hmunah, englai pawhin thil tha kan duh tlat chuan he hnam tan hian thil ropui tak a chhuak ngei ang. Chu aia ropui Pulpit a awmlo.

Mizo nih hi a nuam a, kan hnam nun ze pangngai hi kan Kristianna ne’n pawh a inmil em em a ni. Khawtlang tana tangkai lo Kristian chu a suak a ni a, Mizo chu Kristian kan ni. Mizo lawm teh u.


15 January 2017

Tukinah hian he thu hi i lo chhiar ngeiin ka ring a, tun tum chu nangma pual liau liauin titi i han vawrh teh ang.

Khatia mahni khumlaizawla pawnpui lum fahran nena zing khaw vawt hre lo leka i mut bo daih lai khan Dawrpui leh Zarkawt phei velahte chuan i rualpuite chu kawltu chawiin an phe suau suau tawh a. Hnathawh tur a tam em avangin vawt an ti bik reng reng lo.

He khawpuiah hian hnathawh nachang hre em em thalai tam tak an awm. Thianghlim taka an sum thawh chhuah chu him taka vawn an duh avangin thil an chik peih a, an ngaihven a, India ram khawpui dang thalaite ke pen rualin an pen ve tak meuh meuh a ni.

Kan zinga tam tak erawh chutiang kan la ni lo. Pawisa thih leh thih loha buai pha lo, fin vang chu ni chuang si lo, thu tak tak han sawipui dawna nawi tlat, khawlaia nalh zuara leng reng maite pawh kan ni. Khaw khat chhuak theuh theuh pawh hi in ang lo thei tak kan lo ni.

Thenkhat chuan a ram leh a felna ka zawng kan ti a, a van tla dawn kan tum a ni mah zawk. Kan velah hian midangte rawng bawlsak tur an awm reng a, midangte tana tangkai taka nun hi a ram leh a felna kan hmuh thuaina tur kawng khat a ni.

Khawtlang nun siam tha tur chuan thalaite kan pawimawh a, nu leh pa an bang thei hek lo. Kristian vek ni chung sia midangte chunga kan rilru put dan thlir hi chuan “A chawlhni chawhma nun hi chu a entawntlak a nia” tih awm tawk hi chu kan lo ni fur mai.

Chutiang te leh thil dang tam tak rilrua a rawn lan lai chuan ram hla takah chuan thian zaho an lo zai a, “Hmana kan nun hlui a chul tawh hnu, Ka dawnin awmkhua a har ngei e,” an lo ti a. He khawvel hi a lo mawi leh ta em em a.


08 January 2017

Kum lo thar hian min thlak danglam kher dawnlo tih inhriatna hi puitling zia pakhat a ni a, kum a lo thar ruala nunhlui thalo kalsan ngamna hi puitlinna kawng bawk a ni.

Huau huau boruakin tam tak a la bawh beh laiin chanchinbu enkawl tura ruat kan han ni leh a, nuih tur nge tah tur tia kan inkhap mek laiin zirtawpniin min rawn nang nghal a, kan tan chuan zirtawp zan hi thawhtan zan a ni takmeuh mai.

Khatia kumhlui liam tur tam takin ui em ema an auh lai leh tam takin an chhir liam takmeuh meuh lai khan kan hruaitute rilru erawh a chawl ve lo. Khawtlang hian eng boruak pawh hmachhawn dawn ila kan hmatawng turte an nih miau avangin an tan chawlhni a awm ve lo.

Khawtlang huap hna tam zawk hi tlawmngaia thawh chi vek a ni a, chutihlaiin tlawmngai tura midang beisei reng ringawt mai hi kan tih tur a ni lova, mahni ngei kan penchhuah ve hian neitu rilru kan pu a, khawtlang kan tangrual thin.

He kumtharah hian keini tehlul hian eng thuchah thar ropui mah kan pai lo, kan hruaitute hnungzui kawngah erawh thangharh tlang ila a tha ngawtin kan ring.

Kan veng hi a mual leh a thler awm dante’n a zir loh avangin chanchin inhriat tawnte a har khawp mai. Chanchin kan inhriat tawn theihna’n kan chanchinbu angte bawk hi chhawr tangkai ila. Midangte hriat ve atana tha thu leh hla tha tak takte pawh kan chanchinbuah hian lang tam thin se kan duh hle a ni.

Veng chhungah mi chi hrang hrang, hmun hrang hrang atanga kalkhawm, tawnhriat inanglo tak tak kan awm. Kan hriat zawngte leh kan vei zawngte midangte hriattir ve ila, he chanchinbu hmang hian kum 2017 hlimawm tak i hmang ang u.

Kumthar chibai le.


2008

16 November 2008

I ngaihtuah ngai em?
Kan veng chhungah hian han ngaihtuah vang vang hian eng angin nge rual kan el a, engti hawi zawng hian nge midangte(veng dangte) hi kan entawn tih hi i ngaihtuah ngai em. Veng chhung a awm hlun inti tam tak te hian veng tana kan contribution hi han ngaihtuah hian hetiang ang hian kan veng hi kan awm reng hian i ring thin em?

Mi vengte chuan an thalai tam zawkin midangte kan ang phak lovang tih hlau ngawih ngawih in an theihna chin chin ah hna an thawk suau suau a, keini vengah hian kan thalai tam zawk hi kan nu leh pate thawh chhuah sa ring in kan veng chhungah hian kan lo inla pawr ve viau ringawt hian i hre ve thin lo maw? Nu leh pate pawh hian kan fate a tha zawng a hruai tur hian hma kan la tawk lo i ti thin em? Han ngaihtuah vang vang teh le?


30 November 2008

MLA election , kan hnaih tual tual a, retheih vang ni lem lo rinna duap deuhte’n pawisa hmuhna an dap kuala , an in hralh pheng phung mai chu a nih hi. Mihring (vote) leitu nih nge? an lei a hi nih i duh zawk le? Mahse, retheihna avanga intanpui hi chu thil awm ve reng a ni e, party danga inleh avanga suma inhralh kher hi chu Pathian duh zawng ani hauh lovang le, vote leitu nen inang thlap in chunglam ami khian a en ngei ang.

He inthlanpui lo awmtur hi thianghlim leh boruak muanawm zawnga kan kal theih nan MPF hmalakna hi veng mipuite leh party worker te paw’n i zawm hram hram ang u. I tan chauh anilo tuna i rinawmlohna khan i tu leh fate hnenah hlet ala chhuah lovang tih tuman kan sawi thei lo. Chhungkua mai nilo ram in a tuar dawn ani tih hriain ‘Pathian leh Kan Ram tan’ tiin kan rinawmna he hun ni reilo te-ah hian hman theuh i tum ang u.


31 August 2008

Hruaitu nge kan nih Hotu
Hruaitu nge kan nih a, Hotu kan nih tih hi i ngaihtuah ngai em? YMA ah kan theih ang tawk tawkin kan inhmang a, a hmingin Branch OB, Section OB, Sub-Comittee OB, ah te nihna kan chang a. Heng a kan inhmanna ah hian memberte hian hotu angin nge min en a hruaitu angin? YMA ah chuan hotu anga kan awm chuan kan tlawmngaihna te hi midangte tai ran hian a ni duh a.

Amaherawhchu hruaitu anga kan awm chuan, a hreawm lai ber leh mite tih hreh ber lai kha hruaitu chuan a mawhphurhna a ni. Chuvangin kan vengah pawh hian hruaitu tha nge kan nih a, hruaitu ni lovin a hnathawh dawn a in kiltawih tlat, a relna a pawr hle si hi kan lo awm ve reng lo ang maw?


24 August 2008

Election a hnai ta…
Kan hma lawkah hian mipuite aiawh ram roreltu tur thlanna kan nei dawn a, a ni telin kan hnaih hret hretin mahni her zawng Party uchuak tak takin kan fak mawi tan chu anih hi…..Party tinin Sorkarna chan an tum theuhva, chumi atan chuan kan thiam tawk kan hriat leh tha kan tihte mipui hriatin kan puang chur chur a nih hi……..

Engpawhnise, han sawr zim deuh ila, vengchhungah hi chuan kan mizia leh kan duh dan tihtheih tawk kan inhre theuhva, kan tihtheih loh leh kan thiltih tawh tawptak in sawifiah taltumte, engmah nisiloa tih tur tha sawi thiam ringawt, mahni pumpui hmasial,rinawm lote, vengpawh Develop duh chuang siklote bakah sum lak luhna atan chauha hman tumte mitha leh feltakte chu an rawn inlar leh tan dawn a, hei hian Kristian chhungkua dintu inti te tan pawh thil khirh tak a ni thin. Kristian chhungkua din kan nih angin kan rinawmna chu tun hun a tan zel hian i hmang ang u.


17 August 2008

Nursery Veng chhungah hian veng chhung lam pang a awm ho hi kan in enchian chu a ngai tan a ni lo maw! Mizo nunmawi, aia upa zah, Chhiatni thatni ah te hian kan tlansan deuh a ni lo maw. Tunge mawhphur ang le.

Tun hnai kan veng chhungah chhiat kan tawk ta zeuh zeuh a, Tleirawl/Rawlthar (Mipa leh hmeichhia) te hian mi chhiat tawk an awm hian kan tih tur hi kan ti em? Ka han en vang vang leh ka kal ve a ka lo chik hian thutthleng put, mitthi buhfai khawn, thlanlaih,etc te hi a ti ngai a te bawk hian kan thawk thin hian ka hmu ve a. Heng kan mawhphurhna te hi kan hlen zo lo chu a ni tan der mai.

Heng ka sawi ah hian thalaite nge mawhphur a, nu leh pate, kan inenchian a ngai lo maw.? Kan changkang lutuk a, thutthleng put te, mitthi buhfai khawn te, khawhar in a riah te, thlanlaihte hi kan hlamchhiah a ni mai lo maw?

Nu leh pate hian kan fate theuh hi mi chhiat tawk an awmin an tihtur ang thawk tur hian tirh nachang hi i hre thar leh theuh ila a lawmawm hle ang.


03 August 2008

Kan khawtlang a thalai te nunphungah hian hmasawnna hi hmuh tur a awm em? Han ngaihtuah vang vang hian kan tlairawl rual zingah hian rual-elna dik hmang a mi elna hi a awm lo viau lo maw! Chuvangin kan fate theuh hi rual-elna dik midangte phak loh hlauhna hi tuh tum ta ila, kan theih ang tawk ang zel hian zirtir tum ta ila. Veng hmasawn leh mi vengte entawn hi kan ni ve thei lo maw!

Veng nuam leh hmasawn siam tur hian tute mah hi thawk bik tur leh mawhphur bik an awm lova. Kan vaia kan tanrual chuan Aizawl Veng a veng nuam leh hmasawn, veng dangte entawn tlak kan nih theih ngei hi a rinawm tlat a ni. Mizo thufing ah pawh tanrual hi chakna a ni tih a nih kha, kan tanrual chuan Nursery veng hi Veng hmasawn ber ah kan siam thei a ni tih hi i hre thar leh theuh ang u.