Edtorial 12.09.2021

He khawvel kan cham chhung reilo te ah hian midangte tana malsawmna thlentu kan nih a pawimawh takzet a ni. Kan Lal Isua kha mihring a chan lai khan thil siam tinrengte tana malsawmna thlentu a ni.

Vawiin ah hian Isua zuitu inti te hi mite tana malsawmna thlen tu nge kan nih a, mite harsatna siamtu. Abrama (Abrahama) kha Pathian in a koh chhuah dawn khan “Nang malsawmna ni ang che..” a ti a ni. Keini vawiin a ringtu intite pawh hi kan Pathian hian mite tana malsawmna thlentu ni turin min duh ngei a rinawm. Tunlai kan boruak avangin sawrkarin veng tin leh khaw tin ah Task Force a rawn din a, anni chuan veng mi te tan an hrehawm pawisa lovin theih tawp tak meuh an chhuah a, mipui tan malsawmna an ni tak meuh a ni.

Hripui leng avangin eizawnna kawngah chhungtin deuh thaw kan buai a, chumi ah chuan mi tam tak chu thenawm leh veng mipui tan malsawmna niin, theih ang ang in an neih rosum leh mamawh ang chi te, midang mamawh zawk tan an hlan te hi ava ropui em. Hengah hian a dawngtu an lawm tluk zet in a pe tu te thinlung pawh a lawm thin a ni. Midang tana malsawmna nih hi in tih hmuh thar zel hi ava tha em.

Hlutna nei mihring ni a, ram leh hnam tana fapa/fanu hrin manawm tak nih theuh tum ila. Khawvel mi ropui tak takte angin hma kan la zau ve nghek thei lo pawh a ni thei e; mahse, kan awmna hmun apiangah kan theih dan sang berin, taima leh thahnemngai tak chungin mite tana malsawmna ni theuh turin ke i pen zel ang u. Chu chu YMA thil tum pawh a ni reng a ni.

Leave a Reply