ENG KAN TI NGE LUSEI HNAMTE HI?

– Hranghminga

Lusei Lal ten thlang an tlak hma a ta tawh khua leh khua, hnam leh hnam an indo’vin an mahni aia khawte zawk leh khaw lian zawkte huat vangte, Pasaltha leh pasalthate tualthu chhiat vang te leh khual thuthang an hriat a, a dik a dawk pawh thluk loh vang ten khua leh khua, hnam leh hnamte an lo in chemhar ta mai thin kha ani awma. He mi phena kan sawihmaih hauh loh tur zingah, Pa nei lo, hmeithai chunga hleilenna te, falak (Hnam chawm) te hring nun chep ziate kha hmu ve lo mah ila, Zofate thinlungah leh ngaih-tuahna hi chu a la luah ve reng awm a sin. Mizo-te hi kan chawrchhuahna in a zir lo nge, kan chhehvela cheng te hian an zir lo zawk nge ni anga, hetiang em em a ‘Nun nghet leh tlo’ Rinawmna hi kan neih reng theih mai thin loh le.

Hun tam a liama, kum tam a liam hnuah meuh chuan, Lusei lal ten, khua leh khua in runa in hmelmak renga awm kha duh lovin, an thenawm khuate nen Sa’uitan (inremna thuthlung) te nei in lungrual takin phei lai an khai a. Tlangval ral lu la thei ngaihsanna te chu sirah hnawlin, Sa la thei leh buh leh bala chhungkua chawm thei nih in chuhin turnisen sa do dai in kawla ni chhuak chhiarin sadai ek an hampherh a, khaw khata buh leh bal ngah ber nih te, thangchhuahpa nih a, thanhawl pa nih tumin an hun leh nite an lo hmanhlel thei em em kha a ni a. Chutianga kum za nufa meuh a lo her chhuah leh chuan, Tupuiral nula leh tlangval ten Duhlian ho saltanna (Thing bul Lung bul biakna) laka ta min rawn chhhanchhuak a nih kha.

A mah Pu Rokunga’n hla thu hmang in a auchhuahpui hial a.
“Hmanah pi pu, lasi, khuavang leng tin kaiin,
Doral hlau reng renga ram tuan nilenna;
Thinlai lungmawl vanga tlang tin rau tin zawlin,
Tunah erawh thimnate’n zamual an liam zo ta.
Tunah zet zawng, kan thinlai lung mawl vang em mawni chu”

tih hi kan chhuanlam thei tawh lovang. Bible chhunga thuin ziak zawng zawngte pawh hi tuibur hmuam da lekah kan phan chhuak thei leh zel si a. Kan rinpui ber leh kan ngaih pawimawh em em Pathian thu, tu tu ten emaw to thli tleh ang maiin an rawn auchhuahpui thuta, veng khata parawn leh nu fel bera kan ngaih te thleng in kan lo che leh dawrh dawrh thin te. Politics thilah lah ni se kan bang chuang lo, a sawi hnuhnung ber thu hi a tha ta thut emaw kan ti a, kawihher in kan awm leh hluai thin zawng a nih hi. Zirtirna mak tak tak ten Zofate min han nuai vel a, kan In leh lo te chan pawh kan huam leh ang lawi bawk a.

Zofate hi keimahni chauha kan khawsak lai kha chuan kan hlima, kan tlei tawk viau niin a lang. Mahse kan chhehvela chengte leh hnam fing zawkte che zia leh hlimthla te, an silh leh fen, an sakhming te nen kan han sengluh meuh chinah zawng, Vanapa hming leh nungchang aiin America President chevel in kan thinglung a hneh ta hi kei zawng ka pal dai thei ngang lo a ni.

Thangthar nun ning Thasiama khan eng tin ngai ang maw?

Leave a Reply