ENGE KAN HLAWH….?

– Lalchhuanawma (Putea)

1. THAWHHONA THA : Nursery vengah Pawl hrang hrang hetiang tak hian a lo thawhho that theih a ni tih Basket Ball Competition huaihawt a nih atang hian a lo lang… I vawng nung zel ang u.

2. MI’N MIN HRE TA : Basket Ball Court Nursery vengah kan neih tak avangin tun tuma veng 43 atanga rawn tel Player leh Coach – 43X15=645 leh an thuihruai (fans) engemawzatin Nursery veng min hriat phah.

3. ZANA COMPETITION HUAIHAWT THEI : Nursery veng hi Mizoramah a veng malah chuan zana Basket Ball Competition huaihawt thei, sulsutu, mi tam takin an sawi rik ve reng tawh tur, mel lung pawimawh tak phuntu kan ni ta hi a
lawmawm.

4. SECTION YMA MAH MAH…: Nursery Veng huang chhunga Section pakhat mai mahin hetiang khawpa Competition huapzo, Er. Benjamin Zaithantluanga Memorial Inter Veng Basket Ball Competition, veng leh khaw hrang 43 lai tel theihna hlawhtling leh zawngchhang tlak taka an huaihawt theih chuan…Branch YMA phei phei chuan…. Ava lawmawm em…!

5. A CHENG NI LO, HLAWH CHHUAH :
a) Member active : A huaihawttu ten mawhphurhna semzai an thiamin an phal a, chu chuan member tangkai tak tak – mitthi lumen tur, Thingpui sem tur, Mitthi buhfai khawn tur, Thlan lai tur, khawhar lenpui a riahpui tur engemawzat a chher chhuak….

b) Tawn hriat : Organising Com.-te hian Basket Ball Dan leh Dun an hre ta vek emaw ni le tih mai turin hma an la…naupang te te an la ni si…mahse mizoram pum huap In-el-na huaihawttu an ni ta tlat a ni. Tha leh zung, rilru, sum leh pai leh hun an seng nasa ang…an dam chhunga an sawi reng tawh tur thil an ti tlat a ni. Mi tuten emaw hetiang lam hawi an huaihawt leh dawn a nih chuan Rawn tlak, an tawn hriat ngei hrilh theitu anni tawh tlat… An tan he intihsiakna hi ava hluin hriat reng tlak ava ni dawn teh lul em…!

c) Fight ngai an fight : An rin leh beisei phak aia thahnem team an rawn luh takah chuan zana khelh a ngai ta si…
An inbuatsaih dan zawng zawng hriatpui ve mah suh ila – Fight ngai an Fight a an hlawhtling tih chu a chiang a ni. Hawh u thil Tha ti tur chuan harsatna pumpelhna zawng lova huaisen taka fight a hlawhtlinpui theih a ni tih hi i zir chhuak ang u.

d) Player Discipline : Jersey an hak hma chuanan sam, mawng lang lek leka fuala kekawr an hak dan leh an tawng dante en chuan Rui Kawi mai mai tur nia ka lo ngaih te kha…Jersey nen Court chhung an han luh meuh chuan Player tha, ruakhau, tharum ngah leh chau har tak tak an lo ni hlawm tlat mai. Ruih chu sawi loh mei zuk tak ngialah pawh an discipline a lo va tha em… Form ha chunga mei zu an hmuh chuan an khelh ve hunah a engahmah hmain Penalty (Free throw) an chawi nghal tawp mai a sin. An in control theihna hi kan veng hian i lo zir chhuak hlauh ang u. (Kekawr mawng tla lek leka hak erawh kha chu a mawi kan ti chuang lo)

NURSERY VENG NIH A NUAM:
i) Basket Ball Court puitling nei thei tlemte zinga mi kan ni ta.

ii) A veng anga Mizoram pum huap ang Competition huaihawt thei leh Zana Intihsiakna hlawhtling taka huaihawt thei kan ni ta bawk.

iii) Veng dang mi lokal te lo chiau-au chungchangah vawiin thleng chuan mualphona lutuk ala thleng lo…JAC te hmalakna leh inpekna ava lawmawm em….

iv) Lirthei an rawn kente pawh lo khawih leh ti hmel hem emaw kan la awm lo niin a lang… kan tanhona ava lawmawm em.

v) He Intihsiakna buatsaih dan leh thiltih danah kan duh loh leh rin loh dana kalpui a awm ang…in sawisel mai lo leh rilru kheuhbeuh pua selna tawngkam chhakchhuak mai lova, phak ang tawk tawka a tha zawnga kan infinchhuah leh kan intawiawm mai hi Veng hmasawn zel tur zia a ni e. A bul tumtu leh Organise-tu, sponsor-tu leh ataka hma laa tha thawhtu zawng zawngte chungah Lawmthu sawi chungin Nursery Veng hi Veng nuam, Inlungrual-a siam turin mahni hmazawn theuhvah tan ila tlang zel ang u.

Leave a Reply