FAI KAN TUM

Faina lamah hma kan sawn hle mai, tunhma Sorkar in a bawlhhlawh paihdan mumal tak siam anih hma kha chuan, vengchhunga Kawrpui lian deuh hlek te kha bawlhhlawh paihna hmun ani mai a, YMA /VC in a tawpah a halral mai thin a ni. Tin, Village Council/Court te pawh khan bawlhhlawh paih dan mumal tak min neih pui thei lem lo a, a awm khawp mai tuihawk a hnawh deuh dawnah Vantlang hnatlang koh a thenfai a halral mai emaw Vengchhung huap hnatlang koh a vengchhung thenfai hnatlang neih a bawlhhlawhte Motor-a paih te kha kan kalphung ani tlangpui.

Sorkar chuan hmathar la chho in, Sanitation Department chu LAD hnuaiah din alo ni ta a, hetah hian bawlhhlawhte phurin khawpui laili deuha bawlhhlawh awmte a paih thin. Sanitation Department chu Directorate hran hlakin alo ding leh ta a, kan changkang chho zel ta a ni. Sorkarin hmathar rawn nei zelin ‘Clean Mizoram’ tiin bul kan han tan tha leh a, tah chuan Midum barrel te semin kan hal ral ta hluah hluah mai anih kha, a hunlai kha chuan tha ve tak a ni. Amaherawhchu Pollution Control Board te alo ding bawk nen ‘Air pollution’ a san em avangin rei kan hmang ta lo.

Sanitation department chuan hmathar dang dapin Bawlhhlawh Motor hmangin vengtin hrutkualin bawlhhlawh a paih ta a, Sanitation point te pawh siam ani nghe nghe, chutihrualin ‘Solid Waste Management Programme’ chu kalpui leh in engnge mawchen chu hma lak a ni a, Dumping ground te felfai tak neih a ni. Mahse, duhkhawp lohna a san tak em avangin leh, a aia hmasawnna rawn piang nghalin ‘Pilot Project Mode (PPMode)’ hmangin bawlhhlawh kan ti ral leh tan ta, a tawih thei leh theilo hmangin bul kan tanna bucket te semin kan bawlhhlawhte chu Garbage bag hmangin kan khung bo tan ta. Aizawl Municipal Council te kan lo nei ta zel a, kan changkang ta hle mai, Sanitation point-ah bawlhhlawh Motor-in a aia changkang zawkin a paih tan ta. Mipuite’n bawlhhlawh paih Motor hman man tlem a zawng kan chawi ve ani. Tawih thei leh Tawih theilo paih dan thlengin kan thiam ta thup mai, Sanitation point-a dingin thinrik/bell thingri in kan bawlhhlawh te kan paih ta zung zung mai a nih hi.

Aizawl veng hrang hrangah veng 5 chiahin Tawih thei leh theilo thliarin bawlhhlawh kan paih a, keini veng pawh kan tel ve a, bawlhhlawh a tawih thei leh theilo thliar hi Aizawl khawpui chhungah chuan veng hrang hrangin hman vek tur ani tho tho dawn a, kan thiam vek ala ngai dawn tho a ni. Solid Waste Management leh PPMode te pawh a that rualin a aia changkang zawkin min hmuak mek a, Solid Waste Resource Management kan thlen hunah phei chuan tawih theilo chu recycle/re-use(hman leh theih) turin, tawih thei leitha siam nan hman a ni ang. He programme hi lo thleng pawh nise, keini veng tan chuan harsatna a awm tawh lo a ni. A lungngawi thlak viau nain tun dinhmunah hi chuan kan Bawlhhlawh Motor tlandan mumal lo, thinrik/bell thingri duh lo, a point-ah ding duh lo, a khat tawh paih theih tawh lo, chhan hriatloh a rawn tlan lo, umzui a paih ngai, nileng a chan ngai, tawih thei paih ni a rawn tlan lo tiin ( a lung nuai nuai hman thin) kan phun hlawm kha a ni a.

Kan khawtlang hruaitute erawhin vawi duai lo thuneitu te an dawr nameuh mai, veng tan tiin thinur leh hmaisa hmel hmuh chungin an sawi lawm lawm a, mahse, beng arawngah an khung duh hauhlo a ni ang chu, hmasawnna min hmuhpui hlei thei lo a ni, kan thin ti ur teuh tu leh beidawng taka min siam thin tu te chu an term alo tawp ta a, engpawhnise, bawlhhlawh paih dan erawh mitin in kan thiam tawh a, tunah kan sawilai mekin bawlhhlawh paih Motor dang hmangin paih tan leh a ni a, tunah erawh thliar chiah loin paih rih a ni. Kan hma a paihtute an phawsawlh lutuk avangin tunah chuan Bawlhhlawh thliar hrang loin engemawchen chu bawlhhlawh kan paih angai rih dawn a ni.

Leave a Reply