FAINA KAWNG AH TAN ILA THAR ANG U

Faina lama mipui leh ramin hmasawnna kawng kan zawh zel theihna turin sawrkar chuan kawng chi hrang hrangin inelna a buatsaih thin a, inelna a buatsaih thin zingah hian thingtlang khua leh khawpuite tan pawh faina kawnga inelna hi a hrangin a buasaih thin a, he inelna a buatsaih thin avang hian faina lamah hmasawnna min thlen phah nasa hle niin a lang, a bikin thingtlang khuaah faina lama hmasawnna hi a nasa hle a, khawpui lam hian faina kawnga hmasawnnaah hian kan tluk lo zawk mah niin a hriat a ni.

Mizo-te hian tun hnu ah chuan faina lamah hma kan sawn tawh viau a, kan taksa leh kan inte chu kan vawngfai tawh khawp mai. Amaherawhchu, kan khawlai leh puipunna hmunte erawh faina kawngah hmasawnna tur kan la nei tam hle thung tih a hriat tak zet a ni.

Mi in a ni emaw, khawlai a ni emaw, hmun fai takah chuan bawlhhlawh te reuh te, sweet kawr ringawt pawh paih mai a inthlahrunawm a, hmunfai taka bawlhhlawh paih chu a zahthlak a, mi pangngai chin chuan kan paih mai mai ngai lo. Amaherawhchu, hmun tawp leh bawlhhlawh tamna hmunah chuan bawlhhlawh paih belh mai hi a inthlahrunawm miah loh thung. Chuvangin, hmun thianghlim leh fai reng chu a lo bawlhhlawh deuh hunah pawh tihfai hna a hautak lova, faina hi a kal laklawh tawh chuan a hranpaa buaipui ngai lutuk lovin a kalpui reng theih tih a chiang a ni.

Chuvangin, kan taksa leh kan inchhung chauh faina kan ngaih pawimawh ringawt a, kan khawlai dung leh puipunna hmun faina lam kan ngaih pawimawh si loh chuan faina khingbai a ni tih kan hriat a tul a. Keimahni leh kan in leh a compound chhung chauh ngaihtuah ringawt hi a fuh tawk lo a, kan bawlhhlawhin kan Compound a pelh tawh chuan midang tan leh vantlang tan hnawksak leh bawlhhlawh pawh nise, pawi tih lohna kan rilru ah ala awm chuan kan fai dan chu faina changkang lo leh huatthlala tak a ni ang. Chuvangin, kan in leh kan Compound fai kan duh a, kan ngaih pawimawh ang bawkin kan khawlai dung leh puipunna hmun fai taka enkawl kawngah hian mipui te hian zir tur tam tak kan la nei a a ni.

Fai hi Pathian an teuhna ber a ni tih kan hriat kha, A hnung zuitu kan nih chuan A mah an chu kan duh theuh in a rinawm, keimahni, kan in leh a vel leh khawtlang alo fai theih nan theih tawp in tan la leh ila, miten veng fai leh thianghlim ti a min hriat theihnan Faina hi i ngaizawng thar leh theuh ang u.

Leave a Reply