FIMKHUR TAK LEH THU AWIH TAK IN AWM ZEL TUM ANG U

– Michael Lalruatdika, Secretary, Local Council, Nursery Veng

Covid hripui lengin zual lam a pan zel avangin, veng mipui tute pawh kan fimkhur lehzual deuh deuh a pawimawh tak meuh meuh a ni. Tunhnai boruakah kan veng pawhin positive kan nei thar ta neuh neuh mai a, a pawi tak zet zet. Positive contact chhuina kawngah, Tracing Team lam pawhin harsatna eng eng emaw kan tawk ta fo mai, in report duh lo, in contact reng si, in contact lo ang a insawi tlat te, report dik lo pe tawk te kan la awm tlat mai hian rilru a tibuaiin, harsatna min thlen thin a ni tih kan hriat a pawimawh. Vanduai thil thua positive kan lo awm palh thut a nih pawhin, awlsam zawka tracing tih zung zung a nih theihna turin, Local Level Task Force (LLTF) te thu awih ila, LLTF te thâ tichak thar leh theuh teh ang u khai.

Mithiamten an sawi dan phei chuan, Covid hripui thawhthumna (3rd wave) hi kan hmachhawn leh ngei dawn niin a lang a, chumi inbuatsaihna atan chuan mitinte kan pawimawh hle mai; thuawih leh fimkhur hi kan invenna leh he hri laka kan himna awm chhun a la nih miau avang hian, khawtlang leh veng tana thi leh thau pawlha thawktu LLTF te dodal zawng emaw, an thu awihlo zawng leh, an thâ tizawi zawnga awmlo hram turin veng mipuite kan inngen tak meuh meuh e.

Home Quarantine lai te thuawih taka midang tlawhpawh lova inkhung tlat tura hriattir kan ni a, mipuite pawhin Home Quarantine mêk te tlawh phêt tum emaw, dawr hram tum loh tawp tur a ni, hetiang ti lui kan awma hriatchhuah kan nih chuan, Home Quarantine ve nghal an nih zel tawh dawn bakah, pawisa chawitir thlenga an chungah action lak thin a ni zel tawh ang.

Veng a lo him a, hri laka ralmuang taka kan awm theih nan, LLTF thuawih la, inah tawm tlat la, tul fê ni lovah chuan chhuakvak tam suh ang che. He hri hi i hlau lo a ni maithei, mahse, midangin an hlau thung che a ni tih hria la, a pawng apuiin tumah biak phet emaw, tlawhpawh phet emaw tum suh, chu chu nakina kan lawmna tur zawk a ni tih hre thar leh theuh ang u.

Tanrual hi chakna a ni tih kan hria, he hri kan hneh theihna atan hian veng mipuite kan tanrual a ngai em em a ni. Kawhmawhbawl zawng leh dan leh thupekte pawi sa lo zawnga khawsa lo hram turin veng mipuite kan inngen thar leh tak meuh meuh e.

Leave a Reply