HALPUAH, HALMAWI, SKY LANTERN, SILAI LEM (A MU KAP CHHUAK THEI) KHAP CHUNGCHANG INZIRTIRNA

– Lalhmachhuana,
Vice President, CYMA

Thuhmahruai : Kumtinin Krismas leh Kumthar vuakvetah YMA, khawtlang hruaitu leh sawrkar thuneitu ten mipuite himna turin tan lak thar a lo tul leh thin a. Mipui nawlpui, nunau leh tar chak lo te tana harsatna thlen thintu pakhat, halpuah leh halmawi hal leh silai lem khap leh insum tura inngen a lo tul thar leh thin a ni.

Halpuah/Halmawi chu enge : Halpuah/Halmawi hi China hovin BC 206- AD 220 vela thlarau sual hnawhbo nana an lo siam chhuah a ni a. Hun a lo kal zela intihhlimna leh thil thar lawm nante an hal chho ta zel a ni.

Halpuah/Halmawi hi a siam phung a dang thluah a, a siam nan a hman Chemical (Tur) pawh a in ang vek lo, a tlangpuiin Sulphur, Magnesium, Potasium leh Berrylium te hi an telh/pawlh thin tlanglawn te an ni. Halpuah siam nan hian thil chi li (4) pawlh a ni thin a, Oxidiser (Meialh/kang siam turin Oxygen) Fuel (Atui) Colouring Agent (A rawng) leh Binder (A funkhawmtu) Oxidiser atan hian Patassium Perchloride 70% leh Alluminium Peroxide 30% pawlhin siam a ni a, zen a ni ber ang.

Fuel atan hian meihawl (Charcoal) hman a ni a, a rawng/ colouring agent atan hian chemical hrang hrang an pawlh thin, chungte chu – Rawng Chemical
1) A var Alluminium Compound
2) A hring Barium Chloride
3) A pawl Copper

Halpuah/Halmawi halin mihring hriselna a tichhia :
Halpuah/Halmawi hal vanga Chemical (Tur) tha lo boruaka leng vel a lo tam hian Raipuar, Naupang, kum upa leh Damlo chaklo zualte a nghawng zual bik niin hriat a ni a. Hrawk, Hnar leh Mitte hi a khawih pawi a, mihring thawkna dawt khawihin harsatna a thlen thei a ni. Bornchitis, Asthma, Pneumonia te hi boruak tha lo leh thianghlim lovin a ken tel a ni a. Halpuah/Halmawi hal nasat vangin heng natnate hi a zual thei a ni. Halpuah/ Halmawi siam nana Chemical (tur) telh ten mihring hriselna a khawih pawi dan tlem tar lang ila –

Chemical Natna a thlen dan
1) Copper Thawkna dawt a tizain a khawih pawi
2) Cadmium Thisen cancer a thlen thei a, BP a ti sang thei
3) Zinc Vun a ti thakin, luak a tichhuak thei
4) Lead Hriatna thazam a khawih chhia a, chuapte ti chak lovin, naupang ten thluak natna an nei thei
5) Magnesium Hriatna thazam a ti chhia a, vuna a luh chuan bawk a siam thei.
6) Sodium Puak thei a ni a, vun a tikang awlsam.

Tin, heng bakah hian Halpuah halri bengchheng hian Noise Polution siamin, beng ri hriatnate pawh a tichhe thei bawk. Ri bengchheng tehna atanga an tehin hun pangngaia mihringte tana hlauhawm lo chin tawk chu 55 dB a ni a, Krismas leh Kumthar vuakvet laia Halpuah/ Halmawi an hal nasat lai hian ri bengchheng tehnaah pawh mihring tana pawi a thlen thin a, chungte chu tlem han tarlang ila – Krismas/Kumthar laia ri bengchheng tehna (Source – Polution Control Board, Mizoram)

Kum     Ri bengchhen dan    Veng
2018     75.3dB                      Bawngkawn
2019     82.3 dB                     Sikulpuikawn
2020     84.5 dB                     Laipuitlang

Tin, naupang Silai lem hmanga inkah palh avanga mit del leh chhiat phah pawh an awm thin avangin, hei pawh hi kan khuahkhirh a ngai hle a ni.

Halpuah/Halmawi halin Environment a ti chhia : Sawi tam ngai lovin Halpuah/Halmawi hal hian Environment a tichhia tih chu tlang hriat a ni awm e. A tlangpui han tarlang ila –

1) Boruak bawlhhlawh (Air Polution) a thlen – Halpuah hal vangin chung lamah boruak chhia a chhova, ruah a sur mai loh phei chuan chung boruak chhiate chuan rei tak min chenchilhin mihring hriselna a khawih pawi thin a ni.

2) Boruak lum (Global Warming) a thlen – Halpuah hal vangin Greenhouse Gas (Carbon Dioxide) a lo pung a, chu chuan khawvel buaipui boruak lum tual tualna a thlen thei.

3) Bawlhhlawh (Garbage) – Halpuah/Halmawi vangin kawtlai leh kawngpui dungte a ti bawlhhlawh a, tul lova bawlhhlawh insiamna mai a ni.

4) Kangmei a chhuak palh thei (Fire Accident) – Sky Lantern, Halpuah, Halmawi leh Rocket te hian kangmei a ti chhuak fo tawh thin a. Ram kang, In kang, Dawr kang leh Electric hrui kang chhiate a thlen fo tawh thin a ni.

Halpuah/ Halmawi hal leh Economy : Halpuah/ Halmawi hal hi tullova sum khawh ralna mai a ni a. Sum leh pai awmze neilova khawhralna a ni. Kan ram hi a hranpa a thawhchhuah nei tam lo, intodelh tawk lo kan ni a. Halpuah leh halmawi halral nana sum leh pai khawhral thei dinhmunah kan ding em tih pawh inenlet a tha hle mai.

Halpuah/Halmawi hal khapna leh hremna chungchang : Halpuah/Halmawi hal hian boruak chhia a thlen tam avangin, India rama Court sang ber Supreme Court pawhin 2018 khan a lo khap hial tawh a ni a. Kan ramah pawh kum tinin Sawrkar thuneitu, District Magistrate ten Crpc 144 hmangin khapna an lo chhuah thin a, ti lui emaw luhlul chuah a hal lui te pawh Sec 188 IPC hmangin an chungah hremna an lo lekkawh tawh thin a ni. Tin, National Green Tribunal, Principal Bench, New Delhi pawhin 1.12.2020 khan Covid-19 Pandemic len chhung chuan NCR leh India rama khawpui hrang hrangahte Halpuah leh Halmawi zawrh leh hal a lo khap tawh bawk a ni. Sawrkar phalloh, khawtlang hruaitute pawhin an duh loh hi chu tihluih loh hi a tha, insum theih a tha hle thin a ni. S.P Aizawl hnuaia P.S hrang hrang a halpuah/Halmawi/Silai lem avanga Case siamsak tawh dan hetiang hi a ni :

Year       No. of Case Register        No of person involved
2018      11                                     27
2019      11                                     14
2020      5                                        7
2021      17                                      20
Total       44                                     68

Halpuah/Halmawi khap leh YMA : Mizoramah hian Kum 1998 hma lam atang tawh khan, halpuah/ halmawi hal leh zawrh leh silai lem te hi Sawrkarin a lo khap tawh thin a, amaherawhchu, tih tak tak a hmalak a beih chhoh a nih chu Kum 2009 vel atang khan a ni awm e. Central YMA in Mizoram pum a Branch/Group/Sub-Hqrs YMA hrang hrangah halpuah leh halmawi hallo tura ngenna leh mahni huamchhung theuh a hma la turin ngenna Kum 2009 atang khan kumtin a chhuah ta thin a. YMA ngenna ngai pawimawhin kum 2009-2012, Kum 4 chhungvel chu halpuah/halmawi thawmri hrelovin kan reh ta thap a. Mipui tan Free Concert, Sawrkar nena tangkawpin siam a ni ta zawk thin a. Kum 2013 khan Sawrkarin a halna hmun tur siamin a rawn tharthawh leh ta a. Central YMA chuan pawi a tiin, sawrkarah ti tawh lo turin ngenna a siam hial a ni. Kum 2013 hnu lam 2020 Krismas leh Kumthar thleng khan, kum tin , YMA chuan ngenna a la siam ziah a, Sawrkar pawhin khapna a lo siam ziah na chungin khap hleih theih lohin a la puak ri ta reng zel a ni.

TLANGKAWMNA : Boruak tha lo siamchhuak a, tul lova sum khawhralna leh damlo, tar, chak lo leh nunaute tana bengchheng leh ninawm siamtu mai a nih avangin, halpuah/halmawi leh silai lem a mu kapchhuak thei chi zawrh leh hal hi YMA chuan tha a ti ngai lova, thahnem ngai taka hma kan lak a kan lo khap hneh tawh thin a nih angin, theihtawp chhuah a tan la a, mahni area theuh a hma la thar leh turin kan inngen nawn leh a ni. Tin, mipui pawh sawrkar thupek zawma YMA ngenna ngai pawimawh turin kan inbeisei tak zet a ni. Mipui tana tha lo leh him lo do tur hian YMA ten puanven sawichhingin ke i pen thar leh ang u.

YMA vul zel rawh se. Ka lawm e.

Leave a Reply