HARSATNA LEH MIHRINGTE

Pathian thilsiam tinreng hian mahni tawk theuhah hatsatna kan nei vek mai. Nungcha, ramngaw leh thil nung dangte pawh hian an nun khawchhuah nan harsatna tamtak an pal tlang a, mihringte ngei pawh hi kan dang chuang lo. Kan nun khawchhuah a, kan din chhuah theihnan harsatna tamtak kan pal tlang a ngai.

Harsatna kan tawh hian kan hmachhawn dan leh kan dawnsawn dan erawh a inanglo viau thin. Tin, harsatna kan tih pawh hi a inanglo hlawm hle a, harsatna kan tawh a kan rilru put hmang pawh a inang chuanglo.

Harsatna tawklo tura mi thenkhat an tawngtai mawlh mawlh laiin, mi thenkhat erawh chu harsatna hmachhawn thiam turin an tawngtai thung a, harsatna pumpelh tuma kan phet ruai laiin huaisen taka lo hmachhawn an awm thung.

Esopa thawnthu ah khan tlang ram sasaw thing leh phai a sasaw thing chanchin kan hmu a, tlangram sasua chu thli in a nuai reng avangin a fip a, thlipui na tak pawhin a chhem tlu zo lo. Phai ram sasaw thing erawh chu thlipui a tuar ngailo a, a tawrh chhunah tang zo lo in a tlu kar ta mai a ni.

Mihring kan nih chhung hian harsatna hi a bo dawn lo. Tunah harsatna khirh tak tawk lo mah ila, engtik ni ah emaw chuan min la nang ve dawn. Mi, harsatna tawk ngailo chuan a hun a lo thlenin a buai fo thin a, harsatna tawk fo thinte erawh chu an tuar a chhel a, a chinfel dan an hre leh mai thin.

Tunlai khawvelah kan khawsak a lo nuam chho zel a, naupang leh zirlai tamtak chuan mahni in lum atangin chhungte thawh chhuah sa ringin nuamsa takin lehkha kan zir a, retheih awmzia hrelo naupang leh thalai tamtak kan awm ta. Heng kan fate leh thalaite hi harsatna khirh tak an tawh huna chak taka ding thei tur leh hmachhawn ngam turin kan zirtir tawklo ang tih hi thil hlauhawm tak a ni.

Nu leh pa tamtak chuan kan fate hi an tih ve theih reng pawh tih tir phallo in kan duat no a, harsatna engemaw hlek an tawhin hmachhawn ngamlo in a pumpelhna an zawng mai thin. Hei hi kan thalaite zinga zu leh ruihhlo hluar em emna chhan pakhat a ni thei mai angem?

Harsatna hi mi tamtak tan chuan zirtirtu ropui tak a nih laiin mi tamtak tan erawh chuan beidawnna leh lungngaihna thlentu a ni fo thin. Mupui chuan a fate thlawh a zirtirin van sang tak atangin a thlak a, a note chuan theihtawpa thla zap in boruak a thlawh a zir thin a, Lei a thlen hma in a nu chuan a lo dawng leh thin. Harsatna an tawh huna an hmachhawn thiamna turin thalai leh naupangte zirtirna pek hi nu leh pa mawhphurhna a ni a, chu chuan thil sual tamtak lakah pawh a veng dawn a ni.

Harsatna delh beh mihring nilo a, harsatna hnehtu mihring ni thei tura in zirtir hi kan tih makmawh a ni.

Leave a Reply