HLA KUNGPUI MUAL

– R.C. Lalzarzova

Zofate Hnam Rolung Mual an tih mai leh Hla Kungpui Mual an tih hi Khawbung Branch YMA Executive Committee hmalaknain kum 1986 khan Khawbung khaw daiah din a ni a. He hmunah hian zofate zinga thu leh hlaa mi ropui bikte sengluh an ni thin. He hmunah hian tun thlengin thu leh hla lama mi ropui bik thuziak mi – 15, hla phuah mi 21, an vaiin mi 36 seng luh an ni ta. Heng mi ropui bikte hmuna Ni 7 & 8 April, 2016 chhunga sengluh thar pathum zingah kan veng nu ropui Pi Lalsangzuali Sailo a tel ve hi ngawih bopui mai chi niin a lang tlat lo. He hmuna phum turte chu thuziak mi an nih chuan lehkhabu 3-4 tal ziak tawh, an thuziak te chuan thu leh hla atana hmasawnna keng a ni tur a ni a; Hla phuah mi an nih chuan an hla te chuan thu leh hla lamah hlutna nasa tak fun tel a ni bawk tur a ni. Tin, heta sengluh turte chu an thih atangin kum 5 tal a liam phawt a ngai bawk. Chuvangin he hmuna sengluh ni tur hi chuan mi bik, thu leh hla lama Pasaltha nih a ngai tak meuh a ni.

Pi Lalsangzuali Sailo hian lehkhabu – 17 ziak tawhin hla hi 365 vel lai a phuah hman a. A hla phuah thenkhat phei chu tunah hian Class IV atanga Class XII thlengin zir a hlawh mek a ni. A khualzin kawng hi hei ai hian han thui phei se Zofate tan a chhenfakawm lehzual ngei ang. Pathianin mak leh danglam bika a siam a nih miau avangin kum 9 lek anih atangin hla hi a phuah tan reng a. Hringnun zin kawng hi kan thlir liam mai mai lai hian ani chuan chik takin a belbul a, a ngaihtuah a, mit lawng khawpin a bih thin a; chuta a thil hmuh chu keini mi pangngai ten kan hriatthiam theih turin mawl leh fiah em em hian thu leh hla hmangin a rawn puangchhuak ta thin a ni. Hei hian Pi Lalsangzuali Sailo themthiam zia leh hlutzia a tarlang hle a ni.

Hla phuahtu a nihna zawna ka thlir hian Pi Lalsangzuali Sailo hla te hian a hawl kim hle hian ka hre thin. A hla phuah te hian Lengzem Hla(Love Song) te, Hla Lenglawng te, Fakna Hla te, Ram ngaih Hla te, Khawhar Hla te leh hmun bik leh mimal hla chenin a hawl kim vek mai. Chu chuan a nunah hian mi chi hrang hrang leh ze chi hrang hrang te pawh an len vek zia a lantir hle a. Lusun khawhar ten hla phuah tura an rawn ngen changte hian a chang chuan an chanchin a lo ngaihthlak saka a lo tahpui thei hialte hian midang tawrhna te pawh a hriatthiampui zia a lang chiang hle a, mi ngainat pawh a hlawh viau reng a ni. Mitin hian nun hausa leh mite ngainat nih kan duh vekin a lang a; chutiang tak nun chu he miropui hian a nei tel tlat hi entawn atan a va tha em! Chutih rualin Pi Lalsangzuali Sailo hian ram leh hnam hi a vei hle. Sual leh a hmanrua te pawh hi a do nasa viau bawk.

Tunlai kan khawtlangin kan buaipui em em ZU leh DRUGS chungchangte phei hi chu hlaah a phuah hial a – Mihring hmelma lian Pathian hmelma nen; buai, mangan, retheih, tlakranna thlentu; nun ti tawitu, tual thahna nen, hnam mualphona, sual tinreng bul a lo ti hial a. Chutiangin drugs chungchang pawh hla hian a phuah kur liai luai a ni. Chuvangin Pi Lalsangzuali Sailo he hla kungpui muala sengluh an ni ta hi a sulhnu hnutchhiah te han ngaihtuah hian a mak lo hlein a hriat a. A nihna takah chuan Thu a ni emaw Hla a ni emaw pawh nise, he hmuna sengluh ve hi a phu hliah hliah niin ka hria. Thangthar lo la awm zel tur hian a thu leh hla mai piah lamah a chanchinte pawh hi zirlaibu-ah an la zir ngei a rinawm tlat a ni. Heng thu leh hla lama kan Pasaltha te thlarau hi vana arsi-ah te khian chang zel pawh nise U Zualbawihi hi chu a eng pawl tak a niin ka ring e. Hetiang mi ropui Nursery Vengin kan nei hi i chhuangin i chawimawi
zel ang u.

Leave a Reply