HMASAWN TUR CHUAN A MAN PEK A NGAI

– Pu C. Lalrammuana
Finance Secretary, NYMA

Kan thupui hi ‘Hmasawn tur chuan a man pek a ngai’ tih a ni tawl mai a. Hmasawnna hi eng nena tehkhin chi nge ni ta ang?

Vai mistiri kan hmu thin a, sikul naupang kan hmu thin a, anni hi hmasawnna hmel tilangtu pawimawh an ni tih kan chhut ngai em? Han mitthla ta ila, in satu vai mistiri te hian in sang khir eih uaih ho hi thawklehkhata an sak nghal vek emaw, mitdawivaih ang ziazanga an din leh sak a ni hauh lo tih kan hria ang. He’ng in ropui tak takte sa tur hian a bulthumah, a bul ret tak tak atangin bul an tan a. Boruaka in sang tak tak sa tur hian lei an lai phawt a, fit riat a thuk atangte’n in chhawng 10 chuangte an din thin chauh a ni.

In sa tur chuan in satu-in enge a mamawh? In nghet leh tlo din turin foundation mumal taka siam a ngai a, lei laih a ngai phawt! Chumi hnuah ban khur thuk tak taka laih alo ngai leh a, chutianga a tah tawl te te-a awmze neia in sakna hmanrua an remkhawm atang chuan in ropui a lo chhuak chauh thin a ni.

Tehkhin thu dang han sawi leh ta ila. Sikul naupang zingah, Nursery bawhkana MA ni nghal thei an awm lo, a thiang hek lo. “MA ka pass hnu-ah chauh lehkha ka zir ang,” a tih theih loh va, MA ni tur chuan Nursery atangin pawl bul tan a ngai a, vawi engemawzah exam paltlang a ngai bawk tih kan hria ang.

Tichuan, in satu vai mistiri leh sikul naupang atang chuan hmasawnna-in man pek hmasak a phutzia kan hre theiin a rinawm. Khawvel ram ropui tak takte hi an chanchin han zir chian chuan, hmanlaia ram rethei, mi chhe tak tak chen hmasakna emaw, ram ruak emaw te an ni tlangpui. Hnam ropui pawh chutiang tho chu an ni a, tunlai khawvel ram ropui ber, USA pawh khu tun hma American Indian te’n an luah lai chuan ram ropui a ni ngai lo. Nih a hnekin khawvel tlawhpawh loh ram a ni reng zawk a, khatia European hovin an daidar hnu khan khawvelin America ran a lo awm ve reng tih a hre ta chauh a ni. European zuk awm hmasate khan thi leh thau pawlhin nasa takin hna an thawk a. Rel la tlan ngai reng reng lohna hmuna rel tlantir tura rel kawng an han sial laite chuan rethei tak an ni.

Pathian in leilung a din a, a enkawl hna chu bmihringte chan a ni. Pathian hian mihring thluakah hriatna, finna, thiamna leh theihna tam tak a dah a, kan suangtuahna leh ngaihtuahna a taka kan hman theihna turinthahrui min pe a, a thil thlawnpek hi kan hman thiam dan a zir zelin hma kan sawn tawh mai thin a ni.

Eden huan atang khan Pathianin malsawmna chi khat hmangin mihringte hi min tuamhlawm a, chu chu hnathawh a ni. Thlan tui far zawih zawih khawpa thawk apiangte hnenah thawhrim rah man atan hlawhtlinna a pe a. Chumi zawmtu apiang chu vawiin thlengin mi vannei kan ti a nih hi. Kristian an ni emaw ni lo emaw, Hindu leh Muslim pawh nise, eng sakhua pawh nise, Pathian chuan thawkrim apiangte hnenah malsawmna a dah miau a, hmasawnna hi kan duh phawt chuan kan nei theih tih a chiang hle awm e.

Dawr a kan thil lei te hi han ngaihtuah ta ila, kan duh zawng tihpuitlinna tura kan lei te a ni thin. Kan duh zawng chuan engte nge min thlen? Chhungkua in kan mamawh kan leite hian a hma a kan nihna aia sang deuh hret zel emaw, a hma a kan neih loh thil emaw te minpe thin a nih hi. Chutiang ni tur chuan dawrah thil leina man kha kan pek a ngai a ni.

A hma aia sang hreta thu tur chuan tha sen pawh a ngaia, mihring nun hu step chho a kal nen tehkhin ta ila a chiang awm e. Tuman step khatna a tangin a ler an kar pha ngailo. A ler thleng tur chuan thahrui sen alo ngai ta viau a nih pawhin kan tum ram thlenna tur a nih phawt chuan kan pen chho taih taih reng mai tur a ni. Tum ram nei hran lova theu leu mai mai leh zawmthaw em em mai kan nih chuan tlukhlum leh ral chiah kan hmabak awmchhun a ni.

Mizoramah hmasawnna hmel kan hmulo tiin kan iak kan iak fo a, hmasawn turin enge kan tih tul a, engchen nge kan huam tih pawh hi kan chhut tel a ngai ang. Kan sawi tawh a, USA chu lo hausa ve ringawt a ni lova, a michenga te taimakna leh thawhrimna avanga ram hausa a chuang kai an ni. Pathian hian khawvel leilungah hian hausakna chi hrang hrang a dah a, mihring ten chumi hai chhuak tura kan beih dan a inchen lo thin.

Mizoramah hian eng leilung hausakna nge awm ang? Chumi hriat tum chuan kan mithiamte pawh in hma an la mek a, leilung hausakna chu lei chhungril ah lo inphum ru ta teuh sela emaw, ramngaw ah te hian ram hnim hlu tak lo awm teuh ta sela, a chhawr tangkai thei turin kan taima tawk ang em.

Tuna kan nunphung han en hi chuan, thawklehkhata hlawk thut emaw hi kan duhtawk vel viau niin a lang. Hman deuh lawkah pawh a pung awm a pawisa dahpun lamah kan tlan vak a, a tawp ah ka chhiat pui rawp rawp mai a nih kha. Khatiang deuh khan kan nitin nun ah, kan eizawnna ah, kan thil tih na reng reng ah hian vawi lehkhata pawn nghal thur thru hi kan tinzawn deuh tlat mai ni hian a lang a. Kan duh angin han hausa thut ta ang ila kan buai hlum thei mai awm zawk a sin!

Hmasawnna hi sum leh pai ringawt atanga kan teh chuan, kan teh sual khawp ang. Hmasawnna dik chu a muang a, rilru leh hnam nunah rei ve tawk tak a inchhek muk ve hret hrette pawh a ngai a, rilru piangsual kan tam lohna’n a sa kala hmasawnna hi a lo thlen a tul thin. Zirlai tan pawl khat, pawl hnih, pawl thum…. tia chhiar chhoh zel a ngai ang bawk hian, hmasawnna hmel hmu tur chuan theihtawp leh tlem chhuah zel a ngai a. A lera thuai chi a ni lo.

Zalenna nei tur leh vawng nung reng turin sipai te’n an thisen, tha leh zung an seng thin a, zalen tur a an beihna lamah a chang chuan an thih te pawh a tul. Kan thil ngaih hlut leh min siam theitu tur nei tur chuan mawng vawm ba ang seka chet a tul a, kan tum ram thleng tur chuan mutmu tuah hman tak tak theih a ni ngailo.

Khawvel a mi hlawhtling te hi an mu hman meuh lo. Mi ropui te hi an ngaihtuahna a chawl ngai lova, nawmchenna lamah an in hmang meuh lo. Tum bulfuk tak leh nun dan phung pangngai leh ze nghet tak neilo tan invawrh hi a har em em mai a, kan Bible in min zilhna leh vaukhanna pawh ‘I duh chuan mu hlek la, chhing hlek teh: tlakchhamna in sipai angin a rawn nang thut ang che’ tih a ni. Thawhrimna hian engkim a hneh thin a, mahni tih tur dik tak kan tih thuai zel hian hmuh theih loh leh hmuh theih ah pawh hmasawnna hmel a pho lang thin a. Kan entawn leh ngaihsan, sap ho ang ni thei tur chuan taimak leh thawhrim hi kan tih makmawh a ni. He kan ram hi ram hmasawn ni tur a kan duh chuan a man pawh kan pek ve a tul a, thuthluang chungin hma a sawn theih tlat loh avangin ke na chung pawhin kan kal luih hram hram a ngai zawk a ni.

Kan ram ti hmasawn tura kan mamawh chu kan sawi takte atang hian a chiang ta in ka ring. A hmasa ber ah chuan taimak leh thawhrim a nilo thei lo va, chumi rual a pawimawh leh tur chu tum bulfuk neih a ni. Tum bulfuk neilo mihring a ding rei ngai lova, a tlu thuai thin. Eng sawrkar leh eng hun leh kum pawh lo thleng se, mihring, hnam leh ram tana pawimawh em em chu ‘hmasawn turin enge ka tih ang’ tia inzawh hi a ni. Chumi nei thei tur chuan a theihna zawng zawng, a ngaihtuahna zawng zawng a sen a tul thin a, midang tih tura dah mai lovin, engkimah ‘ka mawhphurhna a ni’ tia rilru siam tlat chunga hmabak zel bawh hi kan tihtur (duty) chu a ni.

Sumdawng chuan a hlawk theihna tur leh, a dawr a len zel theihna turin a thluak a vawrhvir reng a, mi aia a thawh hma a ngai a, mi aia a men rei a ngai a, mi aia tha leh zung a sen tam deuh hret zel a ngai bik thin. Hmasawnmna hmel hmu tur paw’n chutiang taka kan beih a, mut mawh hnar mawh bera kan neih chu a hun ta a. Phungpuinu khuaitu thei ang deuh khan, hmasawn tur chuan ‘Tha chu ngai bawk e’ tih a ni vek mai. Chu chu hmasawnna nei tura a man kan pek tura chu a ni.

Ngaiawh hi hnungtawlh tihna a ni a, hmasawn tur chuan hmalam pana kal a ngai a ni.

Leave a Reply