HMASAWN TUR CHUAN THAWHRIM A NGAI

– C. Lalrammuana
Treasurer (A-Section)

Khawvel ram ropui tak tak te hi an chanchin kan zirchian chuan hmanlaia ram rethei, mi chhe tak tak te chenna hmasakna emaw ram ruak emaw te a ni tlangpui a. Hnam ropui pawh chutiang tho chu an ni a. Tunlai khawvela ram ropui ber USA pawh khu tunhma American Indian (Red Indian) ten an luah lai chuan ram ropui an ni ngai bik lo. Nih a hnêkin khawvel tlawhpawh/daidarh ngai ram a ni reng zawk. Khatia European hovin an tlawhpawh hnu khan khawvelin America ram a lo awm ve reng a ni tih an hre ve chauh zawk a ni. European awm hmasate khan hna nasa takin an thawk a, rail la tlan ngai lohna hmunah te rail tlan tir turin hna an thawk a. Chutih hun laichuan ram rethei tak an ni ṭhin.

Pathian leilung a din a, a enkawl hna chu mihringte chan a ni a. Pathianin mihringte thluakah hriatna, finna, thiamna lehtheihna tam tak a dah a. Kan suangtuahna leh ngaihtuahna ataka kan hman theihnan thahrui min pe bawk a. A thil thlawn min pek hi kan hman thiam dan a zir zelin hma kan sawn puiinkan sawn pui lo thei a ni.

Eden huan aṭang khan Pathianin malsawmna chi khat hmangin mihringte hi min tuam hlawm a, chu chu hnathawh a ni. Thlantui far zawih zawih khawpa thawk apiang te hnenah thawhrimna, hlawhtlinna/malsawmna a pe a. Chu mi zawmtu apiangte chu vawiin thlenga mi hlawhtling kan tih te hi an ni a. Kristianan ni emaw, Hindu leh Muslim pawh, eng sakhua pawh nise,Pathian chuan a thawkrim apiangte hnenah malsawmna a dah a. Chuvangin kan thawhrim a, kan taihmak phawt chuan he malsawmna hi kan chang thei vek a ni.

Tuna kan dinhmun hi a ṭha kan ti em? Tuna kan dinhmun aia sanga awm tur chuan tha leh zung, rilru pawh kan sen tam angai ang! Mihring nun hi step chhova kal nen tehkhin ta ila achiang mai awm e. Tuman step khatna a ṭangin a tawp an karpha ngai lo. A tawp thleng tur chuan thahrui pawh kan sen tama ngai ang. Chuvangin kan tum ram thleng tur chuan thahruisen tam a ngaih angin rilru pawh sen a ngai. Tum mumal neilova kan theuleu kual mai mai chuan kan hmabak chu a eng lo khawp ang, hma kan sawn lo ang a. Tum bul fuk neiin hnathawk ila, ngaihtuahna seng ila, hma pawh kan sawn ngei ngeiang. A chang chuan hmasawnna hmel kan hmu lo tiin an sawifova, hmasawn turin enge kan tih tur, eng chen nge kan inhuamtih pawh hi chhût tel a ngai ang.

Kan sawi tawh, USA chu a lo hausa ngawt a ni lo. A chhunga cheng te thawhrimna leh inpekna avang a ram ropui a ni. Pathianin khawvel leilungah hian hausakna chi hrang hrang a dah a. Mihringten chumi haichhuak tura kan thawh dan hi a inchen lo thin mai zaw a ni. Chuvangin kan vengin hma kan sawn theihnan thawkrim ila, rilru seng bawk ila, hma kan sawn ngei ang le!

Leave a Reply