HMEITHAI IN SIAM

Central YMA atangin Platinum Jubili lawmna chi khat atan mi chanhai leh hmeithai te tanpui lam hna thawk hram hram tura ngenna kan dawn ang leh YMA chu Tanpui ngaite tanpui tih thupui neia ding kan nih angin kan veng chhungah hetiang zawnga hmalakna tur a awm em tiin Executive Committee-ah rel a ni a. Committee chuan Hmeithai, Pi Lianchhungi In, a chung tha lo far nasa leh awn nasa tak, a then lai phei chu rah leh kal ngam loh khawpa mawih leh rinawm tawh lo chu ngaihngam taka a chen zui theih nan siamthat sak nise tiin a rel a.

Sum mamawh turte a theih ang anga ngaihtuahin ni 27.5.2010 khan Bialtu MLA, Pu R.Selthuama hovin Branch Executive Committee Member, Mistiri leh mi thahnemngai mi 60 vel zet hnatlangin siamthat sak a ni ta a ni. A In ding awn tawh chu pawh ngil chi a nih tawh loh avangin Thirzai lian (ring rod) hmangin pawh nghehsak a ni a. Tin, In chung Silpouline hmanga khuh deuh tet tut chu hawkin chum mawih tawhte thing tha hmanga thlakin Rangva thar Bundle khat leh a hlui thenkhat hmangin chih that a ni. Vanrandah mawih leh rah ngam tawh loh chu thiat vekin a thara siam that a ni. Bathroom In chhunga awm chu Varandah chinah rinawm leh tha takin a thar siam a ni. Tui khawihna leh Gas thuk dahna thar siam a ni. Chhuat mawih leh rinawm lo zual lai thlakin phah that a ni bawk. Tukverh frame thar hmangin thlak a ni. Tin, Electric wiring mumal lo tak pawh mumal zawka siam a niin Tube Light thar vuah a ni bawk.

Hnatlanga thawkchhuak zawng zawngte hian nilengin chawlh pawh awm lovin hna an thawk a, tanpui hna thawk an ni bawk a hah leh chauh hre mang lek lovin hlim leh lawm takin an thawk a ni. Tin, anmahni chhungkua leh Pu Roneihthanga te chhungkua in thingpui leh a hmeh hnianghnar takin an pe reng bawk a, a lawmawm hle.

Leave a Reply