HNAM INPUMKHATNA

– Lalthantluanga Chawngthu

Khawvelah hian hnam khat ni si, inpumkhat lote chu an ral thuai thin a, hnam inhlawmkhawm thaa inpumkhatte erawh an ding chhuak thin; an aia hnam lian leh chak zawkte lakah pawh an inpumkhat tlatna chuan ngaihsan a hlawhtir thin.

Tunlai hian Zofate pawhin inpumkhatna lam sawi kan uar ta hle mai a, hei hi kan hnam tana thil pawimawh tak a ni. Zofate hi kan inpumkhat loh chuan hnam dangte’n min chim ral thuai dawn a. Kan aia hnam lian leh chak zawkte’n min suat mang vek lo ang; mahse, kan inpumkhat loh chuan hnam te reuh te tea awmin hnam dang lakah kan inzep ral thuai thung dawn a ni.

Zofate’n kan ram tia vuah theih kan neih chhun chu Mizoram chauh hi a ni a, he Mizoram hi kan in pui, Zofate tana kan Jerusalem chu a ni. Chuvangin, inpumkhatna kan sawi pawhin Mizorama chengte hian nasa takin mawhphurna kan nei a. State Boundary leh International Boundary-in Zofate hi min daidang hlawm mah sela, Zofa kan nihna erawh kan chenna hmun apiangah kan vawng nungin unau kan nihna hi hre rengin kan inlungrual tur a ni.

Mizote hi chipeng hrang hrang inhlawmkhawm kan ni a, chung chipeng hrang hrangte inzawmkhawmna chu ‘Mizo’ tih hi a ni. ‘Mizo’ tihah hian lungrual tlat ila, eng chipeng pawh ni ila, kan inpumkhat nan pawh a himin a tha ber a; hming dang vuah hi Mizoram chhunga chengte rilruah ngat phei hi chuan a rem chiah lo. Chuvangin, Mizoram pawn lama Zohnahthlak tam tak la khawsate hian kan inzawm khawmna chu Mizo tih hi kan pawm tlan a ngai. A chibil zawnga inpumkhat tumna hi kan do tlat a tul a, chibil zawnga inlak hran tumna leh invoh tumna hian kan inpumkhatna hi a tichhia tih kan hre tlat tur a ni.

Zohnahthlak chi peng thenkhatin mahni chi peng hnam chawi lar tum a Mizo nihnaa lungawi lohna an neih hian an tan hlawkna tur a awm lo va, kan inpumkhatna tichhetu zawk leh kan chhiatna hnar tur zawk tur a ni. Chipeng hrang hrangte hian Mizo nihnaa lungrual hi kan tih tur a ni a, kan awmna hmun a hran avanga inlak Mizo loh ngawt hi kan tih tur a ni lo. Kan din chhuah theihna tur awm chhun chu Mizo nihna chauh hi a ni.

Zofate’n kan tawng hman lar ber Mizo tawng kan tih Duhlian tawng hi kan zavaiin hmang tlang ila, hei hi kan inpumkhat nan a tha lehzual a ni. Chi peng dang tawng hi tuna kan tawng hman lai mekah hian zawi zawiin seng lut hret hret ila, kan tawng hi a lo hausa lehzual ang a, tawng hmangtu kan thahnem ang a, kan hnam inhumhimna tha tak a ni bawk ang. Heng chi peng, Lai, Mara, Hmar, Paite, etc te hian chi peng tawng an nei theuh a, heng chi peng tawngte hi ral ngawt tur chuan a uiawm a, chuvangin, Mizo tawng hausak lehzual nan Mizo tawnga kan seng luh tial tial hi kan tihmakmawh a ni a. Chu chuan kan hnam min tipumkhat lehzual ang.

Social Media lamah hian chi peng hrang hrangte’n mahni chipeng hnam chawi lara Mizo nihna thlauhthla zawnga thu chhuah reng reng hi kan dodal ngam tur a ni. Hei hian nasa takin a lo chhiartute-ah rah tha lo a chhuah thei tih kan hriat a ngai.

Kan ram hruaitute hian nihna chan leh vote an duh vang ngawtin hnam dang, Mizo ni ve lote ti thain khua leh tuiah an seng lut tur a ni lo; heng hnam dang, kan rama awm sa pawh ni hlei lote hi an tlawn tur a ni hek lo. Mizote min nek a kan chanai tha chan tuma verther taka kan Mizona tichhe theitute an nih avangin an lakah zuamawmin an awm tur a ni lo va; Mizoram hi Mizote tan chauh an ti reng tur a ni zawk.

Leave a Reply