HNAM KA LEN NUAM MANG E

– Zokunga
Secretary, NYMA

YMA Platinum Jubilee Lengkhawm Zai Intihsiakna a Nursery Veng Branch YMA aiawha tel tur te leh hla hruaitu tur ten nguntaka ngaihtuahin Hla-chuam atan ‘Hnam ka len nuam mang e’ tih hi thlan a ni a. Laithangpuia’n he hla a phuah chhan leh a rilru a thil awm te chu a hla thu han en hian a zuk hriatthiam ve theih ruai ruai a, a dinhmun atanga thlir chuan hla lungkuai zet anih zia pawh a man thiam theih mai awm e. Mahse, i’n ti leh pek teh ang. Kan hun tawn a zir leh kan dinhmun a zir zel hian kan lungkuaitu thu leh hla te pawh hi a lo danglam thei dawn khawp mai.

Thihna hi a nat dan chu a tuar tawh chhungkuaah a chiang ber fo. Chu thihna rapthlak tak mai chu theih nise chem hriam tak mai a han sah sawk sawk duh lo tur nu leh pa kan vang khawp ang. Chutiang dinhmun rapthlak taka ding te tan chuan Human Rights zah vang ngawt a thihna laka kan phuba lak tum thulh phah emaw, Sawrkar-in dan ang a a chinfel hun nghah emaw chu thil theih loh hulhual a ni ngei ang.

Heti zawng hian kan ngaihtuah ngai em le? Pathian in fanau malsawmna min pe a, nisa leh ruah sur hnuaiah, thi leh thau pawlh tak meuh meuhin an mahni enkawlna atan thawh tur kan hmuh ang ang kan thawk bawrh bawrh a. An tana tha leh zung kan sen hnem poh leh kan hmangaihna a zual ting mai thin zawng anih hi maw! Chutiang taka hmangaihna nena enkawl chhotu nu leh pa tan chuan kan fate hi an hlu a, min tihlim tu ber an ni thin reng a ni.

Chuan, an lo leikang ta a, mi nu leh pa te aia kan sual bik vang emaw kan enkawl dan in a zir loh bik vang emaw pawh ni hauh si lovin, hmangaih taka kan chawilen kan fapa ngei mai chuan ruihhlo leina tur a mamawh tak miau avangin, tharumin a nu pawnfen hnuai a mi pawisa a’n tham chhuak a, a nu in pawisa a lo ah loh phei chuan bungbel te pawh a thiar chhuak ta nghauh nghauh mai thin a ni. Khawiah tak O/D-in va tluhlum ang maw tih ngaihtuahna a pai reng nu leh pa, fapa ruihhlo ngai nei nun khawngaihthlak zia hi kan ngaihtuah pui ngai em? A va rapthlak thin tak em! Kawmthlang a tlangval thawm ring deuh leh Phone rawn ri hlek te chu ‘Zualko’ an nih mai ringin –

“Awmlai lianin hring nun par mawi,
Vul lai a thliak mai ta si a”

tih te rilruah a lang lo thei thin lo. Mi fa tamtak ruihhlo avanga OD-a an thih tawh chuan ka fa, ruihhlo ngai ve tho kha eng vangin nge OD-a a thih theih loh tehlul bik ang ni?

‘A la puitling ve ang a, Sawrkar hna te a thawh ve hunah chuan kan la nuamsa ve deuh ngei ang’ ti a nghakhlel taka lo thlir tu nu leh pa tan chuan a beidawn thlakin rilru a na duh hle ang le! Heng thil raptlak nu leh pa thinlung a “Aw ka zantlai tawnmang lo nise” tih ngawih ngawihna tur kan chhungkaw chunga lo thleng hi tu vang nge? Kan fapa, naupang duhawm tak ni thin, chhungkua tihlimtu ber ni chunga nu leh pa ang chhung a thlamuang taka awm thin kha khawiah nge a awm tak? A lo hawng ang em? Engtin tak rawn hawng leh ang i maw? tih ngaihtuah reng reng a buai thin nu leh pa tan chuan –

“Kim lai chhungkhat kan awm ngai te khanin,
Laikhumah lo zal hmun ila;
Lawm takin hmangaihte’n ka chul leh ang e.”

ti a Laithangpuia’n a fa, thihna kut vawtin a man tak ngai em em chunga duhthu a sam ang tluk zet a thukin, kan fapa, a dam leh thih pawh hriat loh, a awm a buaina, a awm lohna rilru hahna ni lawi bawk si, naupang duhawm tak anih lai mitthla a hmu chunga sak rawng rawng mai awl tak tur a ni. Hetiang taka nasa a chhungkaw tam tak min lo nghaisa tawh tu, thihna ai pawha nep chuang bik hauh lo natna min thlen thin tu RUIHHLO hian Nursery Veng hi rawn lut tawh lo hram se a va duhawm tak em!

Chutianga kan chhungkaw chunga damlai- hremhmun thlen tir thei khawp a thil hlauhawm, Chhungkua mai pawh nilo, vengchhungin in nghahna atana kan hman mek kan nula leh tlangval duhawm tak tak te tichhe vek thei tu, kan hmelma tihbaiawm RUIHHLO ngei mai chu tun thleng pawh hian Nursery vengchhung a rawn kenglut lui thin an la awm ni awm tak a ni. Chutiang mi chuan he thuziak hi i lo chhiar ve mial anih chuan, Nursery Veng hmangaihtu ten hla hmangin ti hian kan chhang che ang a, thu tisa a a lo chang angin, he hla hi thiltih ah a chang tep tawh a ni tih i lo hrereng dawn a nia –

“Lung ka duh par mawi te,
Hringnun par mawi vul lai thliak tur a,
Nursery Veng a RUIHHLO rawn keng luttu,
I thil tih hi i bansan vat lo anih zawngin,
I laka hnam len mai kan nuam palh hlauh dah ang e”.

Leave a Reply