HRINGNUN LEH KHAWTLANG NUN

– F. Lalhmangaihsanga (Y-Section)

Khawvel hmasawnna hi, hmalam pana chak taka pen mek a nih avangin hnung lam an lehhawina hun pawh awm lovin, thil thar, nun dan thar, hmasawnna thar zawngin hnamtin mai hi kan phe suau suau mai zawng a nih hi.

A tisa apiang, a duham leh thiltithei apaiang an dingchang a, khawvel hi tharum tel lovin an hneh thin. He khawvel intlansiaknaah hian Zofate pawh kan bang chuang lo va, kan thlen chin erawh chuan duhthu a sam lo hle mai. Zofate hian Hnunglam paiha hma lam um aiin, Nunhlui ngaiin kan her, hmanlai kan ti vawng vawng tiin hnuchhawn ram ngaiin kan lung a leng leh thin. Hei hi kan pi leh pute atanga kan chhawm tlat niin a lang. Kan pi leh pute nuna bet tlat, Tlawmngaihna, tanpui ngaite tanpui, thenawm khawvengte nena pheikhai rual taka kan nun ho kha chu kan tihtur leh kan chhawm nun zel tur chu a ni takmeuh mai. Mahse pi leh pute nun hlui ngaia kur reng leh lunglen zia kha chu hmalam pana ke kan pen a tithuanawp tlat thin hi khua rel a ni fo thin. Tumah indem thei pawh kan ni lo, Pathian anpuia siam mihringte hi hlim thei, lungngai theia siam kan ni a, chu chu thil dang zawngaia kan chungnunna chu a ni

Suangtuahna nen duhthusam ramah Rinna thla zarin kan leng der der thin. kan nun hluite hi theihnghilh duh thin mah ila theihnghilh phgal loh nun hlui a lo awm si thin. Mihringte nunah midangte tana malsawmna hlut zia leh lunglenthlak tur zia te kan hre thar leh thin. Amaherawh chu hnung lama thil awmte theihnghilh a hma lam um hi khawvel finna leh changkan zelah kan tih makmawh a ni, chutah chuan hlawhtlinna a awm thin a ni.

Hlawhtlinna nei tur chuan taima taka bei talh talh a ngai a, hlawhtlinna nei tur chuan midang tana atthlak emaw midang tana nuihzatthlak pawh ni mahse dik leh thaa kan hriat chuan huaisen taka kan beih talh talh chuan hlawhtlina a awm nge nge thin. Amaherawh chu hlawhtlinna kawnga kan beihnaah thli thawtna lam hawia kan thlek kual mai mai chuan hlawhtlinna hmuh a har thin. Hlawhtlinna kan beihna kawnga midang nek ran leh mahni kuang lo nawr erawh a dik hauh lovang. Hlawhtlinna nei turin theihna i nei tih inring tawk la, harsatna lo thleng mahse huaisen takin hmachhawn la, a tawpah hlawhtlinna a awm nge nge thin.

Tin, tunlai khawvelah induhsakna leh inlak bikna te a nasa em em a, lamtang zawnna, sorkar atanga hamthatna lo kal hmu awm tak tak ten an hmuh leh dawn loh laiin hmu awm lo pui pui te leh chhungkaw hung leh sorkar hotute laka thiltithei tak tak ten an hmu leh mai thin niin a lang thin. Kan khawtlang hruaitute hian chhut chiang ngamin hma la ngam ta ila a va tha dawn em. Kan khawtlang hi khua leh tui tha ni tur chuan a chhunga cheng te kan pawimawh vek a. Kan khuain mualphona a neih chuan kan vaiin kan tuar thei tih i hria ang u.Kan khawtlang hruaitute VC leh NGO hrang hrang hruaitute dem mai lovin, kan khawtlang tana tha leh dik nia kan hriat chu thurawn peka hlilh hriat hi kan mawhphurhna a ni tih i hre thar leh ang u. Kan khawtlang hruaitute hi mihring ve tho an ni a, kan khawtlang tana hmasawnna, paih ngai leh thil tha lo ti ve thei tho an ni tih hriain khawtlang mipuite tangrualin kan hotute i tawiawm thiam ang u.

Hmanlaiin Mizote hi Lal neiin kan khawsa ho thin a, Lal rorelna hnuaiah awmin kan khawsa ho thin a, mirethei leh hmeithai rethei, awmthei leh thaawkmawh chhungkua te tan angkhat vekin ro an rel thin. Tunlai khawvel finna, changkanna leh hmasawnna sang chho zelah hian rethei chhumchhiate rah beh leh nek chepna a pung zel dawn em ni tih tur a awm zeuh zeuh thin niin a lang. Heng vang hi em ni ang “Nun hlui ngaiin hmanlai kan ti vawng vawng” te an lo tih hial le tih te min ngaihtuahtir vawng vawng thin.

Kan khawtlang siam thaa khua leh tui tha ni turin kan theihna te tlem hle mahse, hnung lama thilawmte theihnghilhin kan hmalam hun thlir zel chungin huaisen takin hma thar zawh turin mitin te hian theihna kan nei theuh a chu theihna chu hmang theuh turin mitin te ka sawmin ka ngen takmeuh che u a ni.

Kan khawtlang hmasawnna turin kawngpui tha siam a ngai a nih pawhin thawktute harsatna siam lova lo tawiawm hi hnathawktu tan a phurawm thin. Kan khaw changkanna turin hmalakna a lo la kal zel anga, khawtlang mipuite hi hmasawnna tithuanawp zawng leh harsatna siam zawnga awm lo turin kan tanrual a pawimawh hle ang. Hawh u khua leh tui tha ni turin mitinte i inbuatsaih zel ang u.

Leave a Reply