HRINGNUN

– David Lalrinawma

HUN KAL TAWH ngaia kiu vawng vawng kan awm laiin thenkhat chu hma lam hun thlir chunga lungngaia tap kan lo awm mek bawk a. A mak teh tak e he hringnun hi! a tu zawk hian nge hringnun hlutna chu hailang a sawi fiahzawk? hei zawk hi a ni e han tih nalh theih a ni mai bik si lo.

Khawvel mi chi hrang hrang te hian hringnun chu kan lantir theuh a, kan lantir dan leh kan hman dan a in ang lo mai chauh zawk a lo ni. He hringnunah hian thil chi hrang hrang a inchawhpawlh kual vel a ni ber mai, hlaphuah atchilh tlat maite, thu ziak vei bur chi te, hmangaihna la na thei em em te, sual tawrawt tak te, thatna a mi hneh tlat tum mite leh a ang pawh a la awm nual awm e. Mihring theuh theuh pawh hi duh zawng leh vei zawngte, mawi tih zawng leh tha tih zawng a in ang vek lo a, hei hi Siamtu thil pek ropui ber te zing a mi a ni ngei ang. Pa zaidam leh thinchhe kar tehi inhlat deuh mai a sin, bialnu te’n emaw nupui te’n an tlansan vang a lo inthlak danglam ta te pawh an awm awm e, then lah in ‘Ka hmuh hun chu a chak lo ang chu aw’ ti a, an inhrosak vel lai in, Ngurliana Sailo chuan ti hian a lo ti hnep mai a;

Mi tawnah thlangkhuan dim mah la,
Bahsam vau ang vul hnu pawh in;
Tawh chang in nemten min chhang ang che,
Ti em a ngai che mi hluan in.

He hla zet hi zawng a lo dawngsawngtu tan chuan a huathlala awm lo ngawt ang le. Mi tawn a lungher tawh hnu pawh nise, he hla zet hi chuan a kuai lungher mai awm mang e tih theih hial a ni.

Nupui pasal hmu zo lo kan tih tam tak te hian an hmu zolo tak tak meuh lo, pianphunga rualbanlo leh kawppui neih remlo chu an awm na meuh mai, mahse kan phu tawk te te hi Khuanu hian min lo ruat sak vek mai a, chu chu kan hnar mai chauh thin hi ni. ‘Bawng tar pawn luangno a thlang thin’ tih kuk kuk ringawt a luangno peh phak a hmuh si loh chuan engmah lo mai a lo ni.

Kan lung tilengtu leh kan hlimna te hi a inanglo hlawm thin teh a nih hi le. Nula bula mahni insawi vung zat zat a tawlh hrat hrat nuam ti em em kan awm laiin, tlangram chhengche tak tak leh kham khawk rawk tak takin an lung a len tlat an awm mek bawk a. Tuipui thim tak, van dum pawl, tlai ni tla tur leh zan lalnu te vang pawh a lung leng kan tam awm e. Engtin nge ka lo ropui anga ka lo hausak ang tih ngaihtuah reng reng a Hringnun hlimna hmu hman lo a phe reng an awm laiin, tlai lam ni tla tur chhumzing riai tur ngaihtuah a nui hawk hawk thei thleng hian mihring theuh kan ni si a. Hausa leh rethei inkar, thil tithei leh ti theilo inkar hlatzia ngaihtuah chang in, thenkhat tan chuan Siamtu dem a anchhia hial hlawh te pawh lo awm se, an dem awm hauh lo, Joba ang vek a rinna nei tha kan ni si lo.

Tu pa fa mah hian he kan damchhung kum kan hringnun ah hian eng nge kan tawn kan hre si lo, rethei takin nge hausa nuamsa takin kan awm dawn kan hre si lo. Eng thil pawh lo thleng se eng nge ka nih? Miten tunge a nih an tih tura nun hman hi a tha hle. Kan la thi theuh dawn tihah kan chiang vek a, thih hnuah engtin nge kan nun miten an rawn sawi dawn? Ni hnih thum lek hi an sawi dawn nge? Nge chhuanawm takin kan kal dawn, kan hringnun hman mekah hian a innghat a ni.

Hringnun awmze nei a phuarkhawmtu pawimawh ber chu hmangaihna hi a lo ni. Hmangaihna chuan veng te a rem a, a chhungkhat laina leh thenrual te a ko khawm thin. Chuvangin Hringnun zirlai zir zawh theih si loh ah hian hmangaihna a remkhawm a than tir a nih loh chuan boralna lamtluang zawh mai loh chu hmabak a awm mawlh si lo! Hmangaihna hi hmangaih hlawhna a nih miau a vangin tumah inhawisan mai thei kan ni lo, tumah tha famkim reng kan awm si lova.

He Hringnun damchhung tawite hi mahni tan chauha vuiliam mai loin Siamtu lung dum tur a malsawmna insiam tawn hi mihring ten kan tih tur a lo ni. kan tana ruat sa Hringnun hi kan duhthlanna a vanga danglam mai thin chauh a lo ni.

Leave a Reply