HRIPUI KARAH YMA DAY CHIBAI ULE

– C. Lalchhanhima
President, NYMA

Nursery Veng YMA member zawng zawng te, YMA Day Vawi – 85- na chibai ka bûk a che u. Kum tinin YMA Day hi Zoram hmun tinah leh Zoram pawna YMA Branch dinna tawh phawtah chuan urhsun taka hman a ni thin a. Kan Motto te hre rengin, ram leh khawtlang hmasawnna tur leh tanpui ngai te tanpuiin he kan hunpui hi hlim takin, phûr takin kan hmang thin a. Kum 2020 a lo her chhuah meuh chuan, khawvelin a thlan ngai loh, mipui sang tam tak tahna leh thlabara min siamtu Hripui hlauhawm (Covid-19) chuan khawvel hmundang te ang bawkin min rûn ve mêk a. Ram hmasawnna hnathawh a thuanawp a, zirna school leh kan Pathian biakna Biakbûk te pawh khâr a lo ni ta hial mai.

Keini Branch ngei pawhin, kan tih dan thin ngai tak chungin tih theih chhun tlem te Day hriat reng nan YMA flag (Car flag) chu hnatlangin veng chhungah tar a ni a. YMA Day ni 15 hian function neih theih a nih dawn loh a vangin, Mahni in leh a vel te tifai a hun hman tur a ni, heng bâk hi chu tih theih a tlem rih hle mai. Mipuite hri laka kan him theih nân mahni zawn theuh ah Sorkar tawiawmin, mahni vengah chauh pawh ni lovin, mahni ln lum chhuahsan a ramri veng a fehchhuah te a lo ngai ta a. Hetiang a nih avang hian, kumin YMA Day chu khawtlang huap emaw Member te nên Program hlimawm siam a hman a rem dawn ta lo a, lehlam zawng taka ngaihtuah chuan lung te pawh a tichhe khawp mai.

Thufing : Mi thilphal nunna chu tih thauin a awm a. Tui leih thintu chuan mahni pawh a inleih a ni tih ang khan. Engpawhnise, heng hun harsa, manganthlak tak karah pawh, YMA taka midang tana malsawmna ni thei tura kan ngaihtuahna, kan taksa kan inbuatsaih a hunin a va ngai em. Khawtlang leh ram tan a, chhenfakawm ni tura kan theihna kawng hrang hrangah chêt a ngai dawn ta. Veng, khua, Ram alo him nan, nang leh kei hi kan pawimawh a, thlamuantu kan nih theihna turin YMA member zawng zawng te pawhin kan ngaihtuahna kan siam dik tlan a tul hle mai.

Inthurual a, tangrual a thawk tlang zel turin member zawng zawng te Sawrkar, Ram, khawtlangin a min mamawhna kawng hrang hrangah theih tawp chhuah zel turin kan in ngen nawn leh a ni. Tanrualna, thawhhona tha a tangin kan tân kawl eng hmuh tur a awm thei dawn si a. Lawng hi a chhehvel niloin , A chhung a lût tui a vangin a pil thin tih hi hre rengin in lungrualin kan hma bak hun thim pawh i sukiang zel ang u tiin YMA day vawi 85-na chibai ka bûk che u a.

YMA vul zel rawh se.

Leave a Reply