HRISELNA LEH FAINA KAWNGA INKAIHRUAINA

YMA khawmpui Lian, 64th General Conference, 2009 chuan ‘Faina Chung Changah Chak Zawka Hmalak Ni Rawh Se’ tiin a rel a. Hriselna leh Faina/ Thianghlimna (Health & Sanitation) inzirtima hi thil inkawp tlat, laiphir ang an nih avangin amala hmerdun an ni. Inzirtirna leh inhriattirna tha, dinhmun inhriattawnna neih a, kan theihna tih phuisuia, tihhmasawn zel chu a tum ber a ni.Rualkhai taka hmalak a nih theih nan kaihhruaina siam hi behchhana bawhzui nise.

HRISELNA (HEALTH)
Hriselna, saptawnga “Health ” tihin a kawh chu taksa, rilru, nun hrisel leh hmantlakna a ni a, mi hrisel chu hnathawh kawngah a hmantlak bawk tur a ni. Khawtlang mipui mimir leh vantlang nun a lo hriselna tur chuan mimal atanga bul tanin chhungkua-a hmalak ho-a khawtlang mipui zawng zawng theihtawp a thawh hova, tlakchham lai-te dapchhuak zela hmalam pana tan lak zel chu a kalkawng leh a tihdan tur a ni. Heng dinhmun luah tur chuan “Tihdam aiin inven a tha zawk” tih thufing hi vawn reng a pawimawh.

FAINA (SANITATION)
Faina/thianghlimna saptawnga Sanitation tihin a sawi tum ber chu tuichhia, thli leh bawlhhlawh sakhat-te fel taka thianfaia, mitin, chhungtin leh vantlang hriselna vawnhima, chhawmnun leh tihhmasawn hi a ni. Mihring khawsak a lo changkan chhohna hian mamawh a titam a, bawlhlawh pangngai leh bawlhhlawh hlauhawm pawh a lo pun chhoh phah ve zel thin. He thil hi kan pumpelh dawn Ioh avangin bawlhhlawhte hi hringnun tibuai tawh lo tura mumal taka senghawi leh tihral vat zel dan neih hi a tul tak zet a ni.

Bawlhhlawhte hi an hnawk mai piah lamah natna hrik pianna hmun, tho leh thosi, ran-nungte pianna leh awmna hmun an chang thuai thin. Kan bawlhhlawh paih ten kan ram leilung, kawr leh lui-te an ti bawlhhlawhin an tituihnai lo nasa ta hle mai. Hengte thianfaia, zotui thiang ei-in tur, tlan tur kan neih reng theih nante, kan ram leilung a lo tuia, a lo that lehzual zel nante phak ang tawk tawk a, a mipui mimir ten hriatthiamna nen heng bawlhhlawhte hi kan ram, kan environment tibuai lo tura senghawi tuma tan kan laka kut kan thawh hi mitin tih makmawh a ni ta.

Bawlhhlawh chu bawlhhlawh sakhat (Solid waste) ah leh bawlhhlawh tuiril/thli (sewage) ah a then theih anga, bawlhhlawh sakhatte chu tawih thei Ieh tawih theilo-ah a then leh theih bawk ang.

NUNPHUNG HRISEL LEHFAI NEI TURA TAN LAK:
Taksa, rilru leh nun hrisel nei tura thuvawn pawimawh tak chu “Engkim a hun takah ti la, engkim a hmun takah dah rawh” tih hi a ni. Hnathawh hunte, infiam hunte, lehkha chhiar hunte, thenrual kawm hunte, ei-in hunte, programme pawimawh leh tangkai entur leh ngaithla tura TV leh Radio belh hunte intuk fel tur a ni. Infiamna tello, intihhlimna tello, hnathawh ringawt chuan nun a tizuai a, phurna a hmet mit thin. Chhungkua-a nun hmanho tlemna hian inkhawpkhamlohna a thlen a, inzirtima leh inkaihhruaina tha a awm thei lova, chhungkaw nun a hrisel thei thin lo, hetiang hnuaiah hian taksa leh riru lam hrisellohna, hysteria ang te, a bikin tleirawl ten an nei thuai thin. Chhungkaw nun hrisellohna chuan vantlang nun pawh a nghawng nghal thuai thin a ni.

Kan taksa pumpui mai leh a tuamtu thawmhnawte a fai in a thianghlim tur a ni. Nitin vawi khat emaw inbual a tha. Kan hmanrim ber kutte phei chu Sahbawn a silfai fo tur a ni. Hei hi a pawimawh zia inzirtir nan kum 2008 October ni 15 kha ‘Khawvel kutsil ni (Global washing day) ‘- a hman a ni nghe nghe a ni. Kan chenna In leh a vel, kan khawlalte kan punkhawmna hmun Biak Inte, zima inte, hall leh khelmualte, bazarte fai tak leh thianghlim taka enkawla vawn tur a ni. Hengah hian mipui, a hmangtu zawng zawngten mawh kan phur vek a, tihtur emaw tihloh tur emaw kan nei theuh ani.

Chhungtinten kan hriat reng tur chu bawlhhlawh sakhat leh thli kan siam/ tharchhuahte kan enkawl fel dan leh felloh dan hian kan thenawm khawvengte nena kan inkarah, nun kan hman hona kawngah thu tamtak a sawi thin tih hi. Mite tana harsatna thlentu nilova, malsawmna ni turin mahni inchinfel a, invawnfel theuh tur ani.

Mizoten hriselna leh faina kan neih a, kan nunpuia, mimal leh khawtlang a lo thianghlim zual zel nan, heng a hnuaia mite hi vawn leh hlenchhuah theih nise:

1. In-ah emaw, vantlang-ah emaw, nun-dan leh khawsak dan hrisel leh thianghlim zawk turn inzirtir uar a, hriselna, faina leh thianghlimna in mipui mimir nuna hmun pawimawh tak luah tira, hmasawnna thupui sawi hlawh tak a siam.

2. Kan Lui tuite, kawrte leh tui tlanlaite. kan chenna leh ram leilung a lo thianghlim zual zel nan nasa leh zualin humhalh tlat ila.

3. Bawlhhlawh siam tlemte hmanraw hman nawn leh emaw, thildanga hman emaw inzirtir nise..

4. Khaw tin leh Veng tinah a remchan dan ang zelin bawlhhlawh tawih thei leh tawih theilo a hranga paihna hmun emaw hal ralna hmun emaw, incinerator siam nise.

5. Bawlhhlawh leh tuichhiate sengbona tura sorkarin ruahmanna a siamte ngaichangin.

6. In tinin bawlhhlawh bawm neih theuh nise. A theih chuan tawih thei leh tawih theilo bawm a hrangin nei thei ila,

7. Faina leh thianghlimna tluantling nei tura dan siam nise, chung dan-te chu chak taka kenkawh anih nan sorkar thuneitute tha takin tawiawm ila Dept hrang hrangte, entir nan, Health Dept.-te, PHE Dept.-te, LAD- te, UD & PA, Polution Control Board te. Etc. Hnathawh dan leh kalhmangte, an hna thawh a, an thawhloh dante zir a hriatchian leh enpuia hman tangkai.

8. Natna tlanglawn deuhte lehharsatna kan hmachhawnte hriata inven leh pum-pelh dan leh enkawl dante inzirtir uar a,mithiamte rawn a, a huho a sawihona neih thin,

9. Ei leh In tur thlan danah, eiindanahte, zuk leh hmuam chungchangahte inzirtir uar deuh deuh.

10. In leh a velte, puipunna hmun, zirna inte, hall te, field leh Biakinte, vantlang kawng dinhmun hriat a, fel leh thianghlim taka vawn leh enkawl tur a ni.

11. Bawlhhlawh tuiril leh tuichhiate mahni leh thenawmte tana hnawkzui lo tura deh ral tur a ni. Khur laih a, a chhin neia siama bawlhhlawh tawihthei thenkhat paih nan pawh a hman theih anga, leitha-a a chan hnuah pawh a hman zui theih ang.

12.Bawlhhlawh sakhat tawih theite chu khurlai paihkhawm a tha, damdawi/bawlhlo (EM. 1) nen awlsam takin leitha-ah a siamtheih a ni. Amaherawhchu tho leh thosi, rannung leh sazu te puanna leh awmna a ni thei tih hriata ven theih nise, lei a chhilh a tha ang.

13. Bawlhhlawh sakhat tawihtheilo chi chu khuar leh ruam remchang hnawhkhah (Sanitary land-fill) nan a hman theiha, chutiang a remchang lo a nih chuan kangral thei te chu paihkhawmna hmunah emaw halna hmunah fimkhur tak leh pawikhawih lo zawnga halral ni mai se.

14. Ran talhna hmun bik neih nise, Sa nawi leh hnawm te chu phumbo a tha ber.

15. Vantlang bawlhhlawh dahna tur “Bawm “khawlai hmun renchangah awm thei se. Bawlhhlawh hlauhawm chu paihna hmun bik emaw, tihralna hmun bik awm thei se.

16. Mihring ek leh Ran ek te hi leitha-ah a chang thei a, thil chhumna gas (methane gas) a siamchhuak thei bawk. Zun (hmun nga-a thena hmun khat tuipawlh hnu) hi thlai tan chaw tha tak a ni. Mihring leh Ran atanga chhuak bawlhhlawhte hi tangkai zawnga hman leh theih dan (recycle) kawng zawn ni thin se.

Leave a Reply