HUNPUI LO THLENG THIN/TUR HI YMA TAK IN AW

– F. Vanlalhriatrenga
Y-Section

Ka va han haw tak em!! Mani lo mah a muttui nak lai a, “chu Baw-Ar mai mai in min thawn thawh le” ti a ngaihtuahna nei reuh reuh chung chuan peihlo tak chung si in ka harh chiang viau mai, ui bauh leh ar khuangri tih loh chu thawm dang vak a awmlo na in, kan in atanga thlir theih chin Mission Vengthlang, Khatla South leh Nursery Veng mawng (chuan hnuai lam), Tlangnuam veng tlem lang pha chin chu a de ve leh hlawm tan tawh. In cheina eng leh Masi Tree cheimawi ngei chu.

Masi a hnai tan tih a hriatreng mai, chutih rual a ka rilru a lo lang ta thut chu, in leh lo nei ve si lo, mi inluah tih chiang reng mai thim thiap chu a ni a, hunpui thleng tur an hre lo a, an chak lo a ni hran lo ang!! Mahse mahni khawsakna tal chu chei an chak ve ang tih ka ngaihtuah lai chuan kan sana lian chu ka en a, zanlai arkhuan hun ti a Upa te sawi thin kha a lo ni tlat.

Mahse maw, en teh kan veng nu, kan chhuan em em leh Zoram rimawi khawvel milar, Nu Zualbawihi (Lalsangzuali Sailo) hla sak ngei mai “Bethlehem arsi eng mawi ber, kawlkil thim ah a lo eng” tih hla ri riai riai te chuan ka lung min len thar leh ta tlat a, keimah ngei hi Kawlkil Thim a Tih En chu ka nih dawn hi a ti a ngaihtuah chung leh tlinglo ni a inhriatna nen chuan mut nawn leh zai chu ka rel ta a.

Zingtian khawvar hma hret a Baw-Ar Lungfing lo pau chuan min thangharh leh ta. Amah thianpa Mapuia (Zephyr) dan tak ah “Mai mai chuan le!! Total Bandh neih chhuanlam a mut rei ve duh nak laiin” tih mai kha a awl viau, kei lah pek chuan zan lama ka khawhawi theih tawk ka sawi bakah khan Ailawng leh Reiek khua, engtiklai pawh a min thlir rengtu ni a ka hriat veng leh khua chu ka va lunglen melh leh a, mahse “Duhaisam mai ka chan tawk, valpui nuar la kallai kham rawh” ti ni awm takin tumah reng chuan min chhang duh lo, min ngaih melh ve lem lo ni ta ber in ka inhria!!

Darzo thingpuife dik tak chu ka va chhuang a, chumi in pah chuan hei te hi ka rilru ah a lo lut tlat pek a, mi thenkhat ten Masi thawmhnaw leh eitur an phak tawk theuh ah ngaihtuah buai ngailo an awm lai ah, thenkhat erawh tu ta nge kan puk rih ang tih ngaihtuah buai ve em em te an awm ngei anga, in leh lo chei nan singbi/sangbi an hman theih lai amahni eitur leh mahni vulh ngei vawk chaw dapchawp ngai kan awm ang a!! tih thlengin Ar khuangri meuh pawn “Hun bik hlimawm” ti mai a khuang ni a ka hriat tlat pek lai hian hun bik hlauhawm te hi a lo ni thei hial mai ang em!!

Ngaihtuahna kawm kual vel a thingpui ka in lai chuan kawmthlang ui ngei mai chuan, “Mawh, mawh” ti hian engemaw min dil leh ni tlat hian ka hria a, thil rimawi, zai mawi leh Music mawi te hi a ngaithlatu ngaihtuahna leh suangtuahna dan a zirin a danglam in a kawh tur a dang mai hian ka hre ta!!

A engapawh chu lo ni se he thinlungin LAL THAR LO PIANG TUR a hmuah dan hi a pawimawh zawk niin ka hre ta, kohhran hrang hrang hman hun a in anglo thei ang. Rilru a riak ta zawk chu HUNPUI, MASI LEH KUMTHAR lo thleng tur hian tu rual mah ti awt lo hram ila, nei velo ni a inhria te thlamuantu leh nel taka siamtu nih tum ta theuh ila, mi harsa leh tanpui ngai puitu thian ho pawl an awm zel bawk niin a lang bawk. YMA ah pawh sub-Committee hrang hrang ten hetiang tih hi Zoram ah an intih hmuh ta zel.

Tun hunpui lo thleng tur na na na hi chu YMA takin, mimal thlei bik awmlo leh Kohhran Bil awm lovin, kan tan a nau lo piang Lal Isua Krista rilru zawk pu chungin DUHSAKNA inhlan tawn leh ang u aw!!

Leave a Reply