I BEIDAWNG LOVANG U AW

Rev. Dr. C Lalhlira, Synod Moderator

Kum 2019 kum tawp lam atanga kan hriat Corona virus, (‘covid 19′ an tih bawk chu) tûn thlengin kan la buaipui ta zêl. Hri kái te, nat phah te, thihpui te pawh an va tam ta êm! Khawvêl ram tinah a darh a, mihring intlawhpawh nasat avàngin khawvêl hmun tin, kil tin a fan chhuak ta. Kan theih tâwpin kan do va, kan thiam ang angin kan fîmkhur a, chuti chungin hri kái an la pung zêl nia. Kan beidawng mai ang tih a hlauhawm ta. Fîmkhur te, insùm te, thu áwih te hi a sâwt chuang lo va ngaiin kan bei a dawng tawh mai lo maw le? Beidawng’ ni ta ila, eng nge kan tih chuan ang le? Khawlaiah chhuak sup sup ila, duh duh tiin, duh duhin khawsa ila, tûn ai hian hripui hian min tibuai zâwk si ang. Khawvêl hi beidawngte hlawhtlinna hmun a ni lo va, beidawngten beiseina an neih thar erawh chuan hlawhtlinna leh damkhawchhuahna an nei thung.

Hripui lêng kârah te, retheihna leh harsatna chi hrang hrang kâra ding chang theite chu beiseina neite an ni. Eng nge an beisei? Dam loten dam leh an inbeisei a, harsatna leh hlawhchhamna tâwkten hun tha thleng tûr leh hlawhtlinna neih an beisei a. Chutiang beiseina chuan an rilru a kaihruai a. An ngaihtuahnain a êng lam, hlawhtlin theihna lam ngawt an thlîr a. Chu chuan hlawhtlinna kawngah a hruai a, dam duhna te, hlim duhna te an lo nei thin a lo ni.

Kristiante hi beidawng lo tûra zirtir kan ni a. Khawvelah Isua avàngin nun awmze neia nun theihna kan nei. Kan taksa hrisèlnain a tlin lo a nih pawhin, he taksa hi lo awngrawpin lo thi ta hial pawh ni ila, chatuana Pathian hnêna chàwl tûr kan ni. Chutiang khawpa nun nghet neite kan ni a, i beidawng lo vang u. Hripui hian kian hun a la nei ang a, nun thar nei angin kan la awm leh dâwn asin!

Leave a Reply