I TI VE THEI

– F. Vanlalhriatrenga (Y-Section)

Chauvin i nguai thin a, “Hei hi chu ka ti ve thei lo ang,” tiin i indawm kûn thin em? Hawh, i’n hawi harh te’ng aw…
Kan hmâa mi-huai kaltate kha, thei sâ-a piang an lo ni bîk hauh lo; harsatna chhûm dum su tlanga kâwl êng en hrâm
hrâm thin mite an ni tih theihnghilh suh la, i thei ve tih inring ngam rawh.
Physicist ropui Albert Einstein-a kha kum 4 mi a nih paw’n a la tawng thei lo a, kum 7 mi a nih paw’n lehkha ala
ziak thiam lo. An zirtirtute chuan, mi pangngai lo angin an en hmiah a; mahse, a thih hnu, vawiin thleng paw’n a theory hmuhchhuah – ‘Theory of Relativity’ chuan thu ala sawi reng a, atom bomb hial an siam theih phah a nih hi!
Lehkhabu ziaktu ropui tam takte hi, an lehkhabu ziah ngaihnawmzia ringawt kan sawi tlawr vak fo thin; eng harsatna nge an paltlang tih kan dâwnpui ngai lêm lo fo. Harsatna leh tawrhchhelna hi hlawhtlinna nena in-unau an ni tih hi lo dâwn ve thin teh. Khai mah aw …

“Harry Potter” : A film chu kan hria. A thawnthu ziaktu JK Rowlings hi nu ropui tak chu a va ni êm! Mahse, a ropui hma hian a harsa ve asin! Heti hian a sawi, “Hlawhchhamna tello chuan khawvêlah hian i nung khawchhuak zo lo ang,” ti ngattu a ni. “Harry Potter” bu hmasa ber kha typewriter-in a chhu tlauh tlauh a, publisher 12 lai-in an hnâwl! Mahse, a beidawng ve duh lo a, vawiinah chuan, British lalnu aiin a hausa tawh zâwk! Thawnthu ziaktu lâr tak, John Grisham hi kan hre âwm e. A thawnthu ziah hmasak ber – “A Time To Kill” phei kha chu publishers 28 zetin an hnâwlsak! Chumi hnuah lo publish sak duhtu a tawng hlauh a, copies maktaduai 250 a hralh thei hial asin!

Amah lo hnâwltute kha chu an inchhîr ve chem chem ang chu! ‘Hlawhchhamna’ kan tih hi, a ‘awmzia’ hrethiam duhlo lui a, beih fan fan nana hmangtu tan chuan chakna thahrui a ni tih a hriat reng mai. Bible tih loha lehkhabu ngaihhlut hlawh berte zinga mi, “The Pilgrim’s Progress” (Mizo tawnga “Kristiana Vanram Kawngzawh” pawh kha, tân in ipik luttuk, Bedford jail chhunga John Bunyan-a ziah a ni. Mizo zingah pawh James Dokhuma khan, Mizo thawnthu chul tawh lo tur, “Thlahlei Nga Zan” kha jail-a a tân laia a ziah tho a ni bawk.

Khawvêl lehkhabu rotling ni reng tawh tur, a lehkhabu ziah avanga ‘Sir’ nihna an pêk hial, Sir Walter Raleight
lehkhabu ziah – “History of the World” pawh kha, kum 13 chhung lung ina a tân laia a ziah tho asin! Tunlai khawvêl zaithiam kan tih te, celebrity kan tihte hi, pâr an chhuan hnu (an hlawhtlin hnu) chauh thlîrin kan awt a, kan ngaisâng a. Mahse, an tuar ang hi kan tuar ve ngam ang em aw … ka ti thin. Movie hlawhtling êm êm mai, US dollar billion 2.788 hlawhchhuak thei “Avatar” duangtu, James Cameron khan, kha film kha, a film hlawhtling tak “Titanic” (1996) a siam hma, kum 1994-a a ngaihtuah chhuah daih tawh a ni a, a hun laiin a duan ang kha technology-in a la pha si lo a nih kha!

Kum 2014 – a Academy Awards (Oscars)-a Best Actor dawngtu Matthew Mc Coughney khan, a film chan, “Dallas Buyers Club”-ah khan AIDS vei lema a chan a ngai dawn si a; intihchêr a ngai nasa mai si a. A’n bei tak tak a, film an chan tan meuh kha chuan pound 47 (kg 21) hloh thei khawpin a bei asin! Kha movie avang vêka Best Supporting Actor dawngtu Jared Leto – 30 Seconds to Mars band-a an vocalist, an band-in tour an neih mêk laia AIDS vei, tuai lem leh drugs addict-a chang tura an koh Jared Leto pawh khan pound 114 (kg 52) hloh thei tur khawpin a bei ve bawk! “Engmah ka ei ngai lo!” a ti tawp!

A hma kum, 2014- a “Li nc ol n” movi e vanga Oscar Awards-a Best Actor dawngtu Daniel Day Lewis pawh khan kum khat chhungin movie hrang hranga chang tura sâwmna a hnar fai vek. A character tur, Abraham Lincoln-a chanchin ziahna lehkhabu 1000 chuang chhiar nan hun a hmang hmiah! Sum hi an lo ngai pawimawh ber lêm lo! An hna leh mawhphurhna hlen hi an thupui ber fo zâwk thin – kan inang lo teh e maw!

Nang ve le! “Ka tithei lovang, ka nêp si, ka zakzum si, ka zei si lo, kan rethei si … blah blah blah…” tih kha bansan rawh. Thawhchhuah pawh nei loa ina awm mai mai chunga phone a Facebook leh WhatsApp khawih reng chung khan ram ropui thlen inring suh! Khati ringawt kha chuan engtin nge khawvêlah hian hming i chher theih ang? Vawi khat khawvêlah hian i rawn piang ve a, i piang nawn leh dawn tawh lo tih inhre kar rawh. Thian hnaivaite chauhin tunge i ni tih an hria ang maw? Chutiang ringawt tur chuan i inphal em ni? A tha zawngin i hmelhriat loh te paw’n i hming hi hre ve se la. Katy Perry hian min hre lo, Taylor Swift paw’n min hre hek lo; mahse, kei chuan ka hria. Khati ang kha i ni ve thei tih inpawm la. Phone khawih a, mi bâwl kual mai mai ringawt chung khan ram leh hnam i humhalh theih inring suh. I ram leh kan vêng tan hian hnuhma chhuanawm tak neih theih inring la, rawn tho chhuak ve tawh rawh le.

Khawvela lâr chhuak turin kan beisei êm êm hran lo che, India ram pum huap paw’n. Mahse, vêng leh khawtlâng tan tal paw’n – “Ka thei ve lo ang,” i tihzêl chuan i inup hlum mai dawn a, i tan nun hian eng nge awmzia a neih tâk ang le? A chunga kan sawi mi hlawhtlinghote pawh khi, a tîrah chuan tu-khaw-kha hriat an ni bîk hauh lo. Mahse, an bei tang tang a, “Hlawhchhamna” leh “Hnâwl”-a an awmna te hi “Hlawhtlinna damdawi”-ah an hmang hlauh a, chu chuan ram ropui a thlentir mai a ni. I ti VE thei a ni tih hi inpawm thiam la, insit duh lêm suh. Nang aia zei lo leh thiam lo hi, he khawvel, a maka maka tam mihring maktaduai tam tak zingah hian an tam êm mai! “I tling a ni,” tih inpawm thiam mai rawh. Bei la, thawk la; i hlawhtling lo a nih paw’n bei leh la, thawk nawn leh rawh. I ram tan, kan vêng tan, i thenawm tan,i chhûngkaw tan, nang hi i tha ber tih inhria la, inpawm ngam rawh. Mi paw’n an tum a, an bei a, an theih mai theihna khawvêlah hian – “I TI VE THEI”

Leave a Reply