ILO HRE TAWH EM?

– C. Vansangzuala, Mission Veng

Pegasus chu eng nge ni? Eng nge a thawh dan?

Pegasus hi spyware (software – mi enthlakna) Israel cyberarms firm NSO group-ho siam chhuah, phone-a a ruk tea install theih a ni a. He spyware hian mobile phone- ah access tam tak neiin phone message te, call tracking, password enrukna, location tracking, mobile microphone, camera leh a chhunga apps awmte chu a hmuin a spyware control-tute chu a hrilh vek thei a ni.

August, 2016 khan human rights activist pakhat chuan a text message-ah link a dawng a, chu link a dawna a luh atang chuan Pegasus chu a phone-ah chuan a rukin a in- install nghal a. Chu a message dawn chu Citizen Lab, University of Toronto, Canada-ah thawn chhawng in an chhui a, NSO group nen chuan he link a dawn hi an sawi zawm. Hei hi Pegasus attack an hriat hmasak ber chu a ni ta a ni.

NSO Group Technologies (Niv, Shalev leh Omri, company hmuchhuak tute) hian an thil siam chhuah atanga an tum ber chu technology hmanga ram hruaituten an ram a thilsual titute leh ram tana hlauhawm an do theih nana an siam a ni. Mahse a dik lo zawnga hmang chu an tam zawk ni awm tak a ni. August 23, 2020 khan Israel newspaper pakhat Haaretz-a a inziah danah phei chuan NSO Group hian he spyware software hi United Arab Emirates leh Gulf State dangte hnenah Dollar Maktaduai za tel in a lo hralh tawh angin a in ziak a. Heng ramte hian an thil lei chu an ram then awm hruaitute, thu ziak mite enthlak nan an hmang tih a inziak bawk.

Pegasus leh India: India sawrkar hian Pegasus hi a hmang ve tura ngaih a ni a. Phone 300 chuang thuziak mi, opposition leader, constitutional authority, supreme court judge, leh midang dang phone-ah he spyware hi hmuhchhuah a ni. Mahse sawrkar lai mek BJP chuan fake news niin an puang ve thung. BJP opposition lian ber Congress Party Leader Rahul Gandhi pawhin a phone ngeiah he spyware hi an hmuchhuak a ni tiin a sawi a. PM Modi leh Union Home Minister chu ram kal hmang leh din chhan bawhchhiaa puhin, an banna thehlut turin a beisei nghal bawk.

India Sawrkar-in he spyware hi a hmang tehreng a nih chuan kan democracy neih mek tan chuan buaipuiawm tak a ni. Election kal hmang te, national security thlak dang lam hlak thei a ni a. Ram dang, mi dang tuin nge he information spyware atanga an hmuh chhuah hi lo hre ve thei ang tih pawh ngaihtuah tham tak a ni. Chu mai ba kah human rights, Telegraph Act 1882 leh IT Act 2000 dan bawhchhiatna a ni tel bawk. Supreme Court hian he thil dik lo tak hi kan sawrkar laipui atang hian thu dik a haichhuak thei a ngem tih leh NSO nen hian contract a awm reng em tih hi a haichhuak thei a ngem tih chu thu nghahhleh awm tak a ni. Nge ni ang tun hmaa buaina lo awm tawhte angin buaina dang karah a tham ral leh mai mai dawn i lo thlir zel phawt teh ang.

Leave a Reply