INNER LINE PERMIT CHUNGCHANG

Home department chuan Inner Line Permit (ILP) hmang tur sponsor chungchangah mipuite hriat tur a puang a; mipuite chu ILP-ah dan zawm theuh turin a ngen. ILP kaihhruaina dan hi The Bengal Eastern Frontier Regulation, 1873 paragraph 2-in state sorkar thuneihna a pek anga siam a ni a; Home department chuan a hnuaia mi ang hian ILP chi hrang hrang a sawifiah.

1. Temporary ILP: Hei hi ni sarih chhung a nung a, state pawn mi, Mizorama lut turte’n Mizoram House hrang hrang atangin an dil thei a. SDO (Civil) Vairengte leh Ngopa te, Lengpui Airport-a deputy Superintendent of Police te, Bairabi ADC te, border police outpost – N. Kawnpui, Saiphai, Phaisen leh Kanhmun Police Station-ahte dil theih a ni. Temporary ILP hi sumdawnna atan dil theih a ni lo a, zin veivahna atan chauh a tih a ni. Permit thih dawnah Mizorama chàm hun pawhsei dil theih a ni.

2. Regular ILP: Hei hi thla ruk aia rei lo a nung a, vawi hnih aia tam pawhsei theih a ni lo. Kut hnathawk/labour works atana mimalin a dil theih a ni a, sumdawnna atan dil theih a ni lo.

3. Two years ILP: Heihi sorkar hnathawk nghet leh nghet lo, state páwn miin amah leh in khata a chenpui chhungkaw member-te’n an dil thei a, Mizorama hna an thawh hun chhung rei zawng ang zela pawhsei theih a ni. Two years ILP hi trading licence neite leh Mizoram hmasawnnain a mamawhna avanga private leh public sector company-a thawkte’n an dil thei a; armed forces canteen neitu leh hnathawkte’n an dil thei bawk.

Hriat tur tul dangte :

  • ILP chi hrang hrang diltu sponsor turte’n ILP kaihhruaina dan a hre fiah hle tur a ni a, hnam dangin pawi a khawih a, Bengal Eastern Frontier Regulation 1873 a bawhchhiat chuan sponsor-tuin mawh a phur ang.
  • Hnam dang chu hna tula chhawr tawh loh chuan ILP thih hma pawhin a sponsor-tu chuan ama ILP copy chu DC hnenah a pe kîr (surrender) tur a ni. ILP thih hun atanga ni sarih chhunga DC hnena a pe kir lo a nih a, amah pawh a thawn haw lo a nih chuan mi pakhat zelah Rs. 1,000 a chawi zel ang.
  • Sorkar department thila contractor, company hna thawkte sorkar official-in a sponsor chu a chhawr tawh loh chuan ILP copy DC-ah a pe kîr tur a ni a, dan bawhchhiatah mi pakhat zelah Rs. 2,000 a chawi thei bawk.
  • Hemi dan kenkawh a nih theih nan hian tun hnaiah sorkarin thuchhuah a siam angin, ILP dilna thehluh a nih rualin Security Deposit Rs. 1,000 emaw, Rs. 2,000 (ILP dila zirin) emaw DC office-ah thehluh nghal tur a ni a. Security deposit hi Mizoram chhung bank hrang hrangte atanga call deposit (DCR) anga thehluh tur niin, dan bawhchhiat a nih chuan sponsor-tuin security deposit a chán ang.
  • Dan zawm loh a nih chuan an ILP cancel anga ngaih tur a ni a, kum hnih chhung chu mi dang tumah an sponsor thei lo ang.
  • ILP renew loh emaw extend loh emawa awm, thla khat ral hmaa renew emaw extension dilna thehlutte chu ILP thih atanga dilna dawn leh ni inkarah ni khat zelah Rs. 10 chawitir an ni ang. Mizoram leilung fa tumahin ILP atan mi 10 aia tam an sponsor thei lo a, ram leilung fa ni lo, sumdawng leh dawrkai tumahin an dawr nghaktu leh tirhchhiah/hnathawktu an sponsor thei lo.
  • Armed force-a head of department emaw, commandant-te’n canteen hawngtu proprietor leh an dawr nghak leh hnathawk panga aia tam an sponsor thei lo.
  • Mizoram state hmasawnna hna thawktu public sector company-te leh private sector company hotu lian, manager etc., ILP nung neite chuan an labour-te leh hnathawktu mi 100 aia tam lo an sponsor thei thung.

One Comment on INNER LINE PERMIT CHUNGCHANG

Leave a Reply