IN CHEITHAT HNATLANG NEIH A NI

– Zokunga (Secretary, NYMA)

Branch YMA Executive Committee Meeting-in kumin YMA Platinum Jubilee lawmna denchhenin Mi harsa zawkte In sak/cheithat, a mamawhte tana Thisen pek, Lungphun, Mei det, etc. nise tiin a rel a. Hemi bawhzuina atana lang tham deuh a Nursery Veng Branch YMA-in hma kan lakna hmasa chu In chei that hnatlang tluangtaka kan nei ta hi a ni awm e. Sum leh pai lama kan Branch YMA pachhiat zia chu a hretute kan ni vek hlawm a. Hetiang dinhmuna kan din mek laia sum hmanna tur thil tam tak ruahmanna a awm chu a bik takin hruaitute thlunglu a hai duh hle ang tih chu hriat sa a ni. Inthlahrung tak si leh zah pawh dawn thei bawk si lovin Bialtu MLA zahawm tak leh VCP-te be rawn chungin Branch Executive Committee thurel zahawm tak tih hlawhtlin anih theih nan hruaitu ten hma an han la char char a. Bialtu MLA leh VC ten an lo ngaih pawimawh em avangin suangtuahnaah pawh la awm ngai lo chu a takah a lo chang ta reng mai a. Hei hi Nursery Veng tan thil chhinchhiah tlak leh engtikah mah theihnghilh theih tawh loh tur hmasawnna rahbi pakhat a ni ve ngei ang le.

Midang tana thil tha tih hi chu Chunglam hian a hriatpui ngei a ni tih a takin a lang chiang hle. Khawchin thlirtu ten hnatlang neih ni atana ruahman Ni 27.5.2010 (Ningani)- ah ruah sur ngei tura an report laiin President, NYMA leh a thawhpuite tawngtaina chhana awmin boruak nuam tak hnuaiah tluang taka hnatlang neih a ni. Hnatlangah hian Bialtu MLA Pu Selthuama te, NYMA Adviser Pu K. Zoliana te, Senior Member Pu K. Lalngheta te, Mistiri engemawzat leh Branch YMA Executive Committee Member-te leh Section O/B engemawzat thawh chhuah a ni a, kan zavaiin mi 29-in tumah inphatsan lovin khawthim thak thlengin hna hi thawh a ni.

Hetianga Nursery Veng-in midang tana luanchhuahna hun tha kan neih ve theih nana tha leh zung, ngaihtuahna leh thil dang tam taka NYMA hmalakna thlawptu mi tam tak kan awm a, mimaltin hnenah a mal malin lawmthu sawi vek thei lo mah ila, heng a hnuaia tarlante hnenah hian Nursery Aw kaltlanga lawmthu sawi hi tih makmawh niin a lang a ni:

1) Kan hmalakna turah hian sum leh pai engemawzat mamawh a ni dawn tih hriain Bialtu MLA biak rawn a ni a, a ni’n a MLA Fund atangin sum thahnem tak min ngaihtuah saka, hei hi hna kan thawh theihna bul ber pawh a ni reng a ni.

2) Bialtu MLA-in a Fund atanga min tanpui inhuam viau mah se thil tam tak bawhzui ngai ala awm a, Branch YMA hruaitute hetiang thil han bawhzui turin kan ngawng tlang hle mai si a. Chu kan chak lohna chu hriain kan VCP-in DC Office va dawr leh thil tul dang zawng zawngah YMA hruaitute tel ngai hauh lovin engkim min tih fel sak vek a ni.

3) Hnatlang neih ni-ah hetiangin thilpek dawn a ni :
i) Pu Ropiangliana – Rs 200/-
ii) Pu R.C.Lalzarzova – Rs 200/-
iii) Pu Roneihthanga – Cubic Lung (double) – 2 Nos.
iv) Pu F.Liannguauva – Chini 1 Kg
v) Pi F.Lalbiakzuali – Rangva Perek 1⁄2 Kg

4) Pu Roneihthanga te In-ah hnatlang ei leh in buatsaih anih bakah thingpui tui hnai tak leh hniang hnar takin hnatlangte nilengin min hrai reng a, Pu Rova te chhungkaw inpekna a ropui hle mai.

5) Pu R.Lalhmunsiama’n a tul ang apiangah a Motor-in bungrua min lam khawm sak a, hetiang mi Nursery Vengin kan nei hi a vanneihthlak hle a ni.

6) Pi Lianchhungite chhungkuain engmah sawi hnawk lova hnatlanga thawkchhuakten tul leh tha kan tih ang apiang thawk thei tura an lo inhawn avangin an chungah NYMA-in lawmthu a sawi mawlh mawlh a. Anni hian an In cheithat hi tul an ti lo emaw tul an ti anih pawhin an chhungkhat lainate nena chei that lo duh ta tlat chu nise tun hun hi kan thleng dawn hauh lo a ni.

A tawp berah chuan NYMA-in midang tana kan thil tih ve hi Branch dangte thil lo tih tawh nena khaikhin ralah chuan a ropui teh chiam lo pawh a ni thei. Mahse, hei hi kan bul tannaah ngaiin nasa zawka midang tana luangchhuak ve thei tura inbuatsaih tan nan hmang ila. Mi tana thil tha kan tih ve tlem te hi Chung lamin min hriat sakin a let tam taka min rulh hi a phal em em ani tih i hre mawlh ang u.

Leave a Reply