IN CHIM LEH LEIMIN CHHAN LEH VANG

– Dr. Lalrokima Chenkual
Treasurer, NYMA

Kumtin a chhiatna leh buaina kan tawn ziah chu Leimin hi a ni. Chanchinbu hrang hrangah te Leimin chhan mithiam ten an ziak thin nain han ziak ve ila. Kan ram a leiminna chhan tam zawk hi chu a leilung pianto vang (structure & lithology control) lam aimahin a chengate hian kan thlen chawp a ni zawk. Mizote hi ngaihsam angreng tak, thil engngemaw takin emaw min den/nuai loh chuan a invenlawk na leh fimkhurna lam a insenso ngai pawimawh vak lo kan ni emaw chu aw ! a tih theih. Mi ramah chuan Leimin hi Khuarel chhiatna (Natural Hazard/Disaster) anih laiin kan ramah chuan Khuarel leh Mihring thlen chawp inbelhkhawm chhiatna kan ti thei ang. Kan rama leimin chhan tlangpui (Leilung pianto vang tel lovin) han tarlang ila.

1. Kawng laih :- Kawng laih avangin kawng ko a minin, a vung paih te pawhin leimin a thlena, a bul hnaia in a chim zauh zauh tawh.

2. In hmun laih :- Inhmun/ban khur laihin a thenawm te ram leh in a ti min chhe fo bawk. Inhmun laih a min hlauh avanga thenawm te insuan chhuak tihte, a min tak tak tak avanga in tlu leh thiah ngai, hnathawktu a chhilh tih te leh thenawm in khing ta uaih uaih pawh kan awm tak hi. Inhmun laih avanga thenawm te tan a hlauhawm dawn anih chuan laih phalna pek loh nghal emaw a tirah a hlauhawm rin loh avanga phalna pek zet mahse laih hnuah a lo hlauhawm ta anih chuan dan hmang veka laih zawm phal loh leh thenawm In chhe ta te zangnadawmna pek tirna dan siam te hi kan khawsa zia en hian a ngai ta niin a lang.

3. Tuidawn :- In tha deuh deuhin sa amah ila dithlifarfem a tui haw dawnna tur tuidawn kan ngai pawimawh lo tlang hle. Kawt lam a chung hniam lai leh in sir lehlam lehlam hi chu tuidawn kan siam fur a, mahse kawmthlang lam, a sang lai leh tui khawhthla natna lampang hi tuidawn kan siam tha duh tlat lo va, a hau-in lei lawngah a dir ta tluah tluah ta a, chu chuan lei a relhin a chiah hnawng thuk tulh tulh a kawmthlang lam a ti min ta thin a ni.

Pawisa tam tak seng a sak RCC in chung zawla tui tling luan chhuahna tur tui pipe tawite lo lawr ngauh atanga kawng leh thenawm te ram a tui lo far/ dir/ haw to to mai te hi kawng ei chhe tu leh leimin thlen tu an ni a, kawnga kal te tan a ninawm em em bawk. RCC in meuh sa thei chuan an ngaih pawimawh phawt chuan pipe sei zawk an lei thei ngei ang tih a rinawm si. Kan veng ah ngei pawh hian hetiang mi hi kan awm niin a lang ; Kohhran leh khawtlang ah thu tha tak tak sawi thin mah ila, kan khawsa zia hi mi hian an lo en ber zawk a ni tih hriain, zah nachang an hriat a,
hminghmerha insawi hmain siam that vat a va duhawm em.

4. Tui chhe paih leh Tuihawk-luankawr :- Khatia dithlifarfem a tui hawte tuidawn a kan dawh te kha hman atan kan duh chiah lo anih pawhin pipe tha takin tuihawk luankawrah paih tur a ni, mahse in tam takin chu chu kan ti si lo. Mahni ei rawngbawlna leh Bualin/insukna tui paih fimkhur lo, kan Inchhung a pelh chuan duhtawk mai, Pipe sei ngaihtuah lem lovin, Huan/Kawmthlang lama an luanna enzui lo leh kawmtui/tuichhe luanna tur atan tuihawkluankawr thatak siam lo hi kan tam asin. Tichuan tui chu an duh duhna hmun rem lal laiah an luang bo ta vel a, rei loteah leimin an thlen ta thin a ni. Thlanmual min kan tih fo pawh hi a tam zawk chu tuihawk kawngbo kal fuh laklawh hawrh anni chawk.

5. Leivung/hnawl :- Kan inhmun laihzawlna leh bankhur ilo laihna vung paih fai mumal loh inchhekkhawlte, kan hnawl leh bawlhhlawlh paih khawm te kha an lo tling khawm rit tial tiala, an lo ritin ruahin a lo chiah bawka, tawlh thlak mai loh chu an tan chetna tur kawng dang a awm lo a ni.

6. Vawkin :- In tam takin vawk kan vulh a, thenawm te tan a rim chhiat leh chhiat loh ngaihtuah duh lem lo vin. Vawkin thlang lam hi an chaw luangliam leh zun leh ek leh silfai na tui ten an tihnawng rengin vawkin ah tuidawn siam a tuihawkluankawr a luantir a ni ngai mang lova. Heng avang hian vawkin zawn lei hi a tawih hmin nghet lo viau thin a, ruah a lo sur takah phei chuan kawmthlang lam a ti min fo thin tihte hi kan hre/pawm duh tlat thin lova, kumtelin kan min kan min mai chu a nih hi.

7. Ramngaw/Thing kih chereu :– Chuktuah huan leh ramah te hian Thing zung ngah, lei man khawm tha kih remin Mau/Raw hung – zung an kaih thuk lo kan zuah fo maia, mahse heng te hi an rit em em tho si, an rih avang leh zung a kaih thuk loh si avang hian Ruah a lo sur hlekin an che/tawlh duh em em a ni.

8. Septic Tank :- Mizoram ah Septic Tank siam fuh lo kan tam hle mai a, heng Septic Tank leh Soak Pit leak vel hi thenawm khawveng tan a rim chhiat bakah hian an bul vel a leilung an chiah hmin duh em em mai a, ruah lo sur thin nen lei an timin fo thin.

Hengte hi a mal theuh pawh a leimin a thlen theih bakah chhan hrang hrang te hi thawk ho vin leimin an thlen a ni. Kan veng chhunga leimin/inchim thlen tawhna te han chhuichian hian leimin na bawr vela In leh Vawkin te hian Tuidawn an neih loh fo bakah Tuihawkluankawr a awm mumal lo em em zel tlat a ni. Heng chhan langsar zualte hi mi tam tak hian leimin chhan leh vangah kan pawm duh hauh lova, mahse anni tlat si. Tin, sum leh pai seng so tam si lo leh harsa lo tak a siamthat theih te an ni a, tih kan tum bawk si lo va. Heng mi fimkhur lo te avangin kan tuarin leimin leh in chim a lo awm a, khawtlang kan che chhuak leh lo thei si lova, inzirtir a tulin kan fimkhur loh leh
inthlahdah avang a keimahni leh midang tawrhna thleng a ni tih hi a ruh lang a inhrilh dawt dawt tawh mai tur em ni ang?

Leave a Reply