IN KANG LEH CURRENT SHORT

– Joseph Lalbiaktluanga
M – Section

Khawvel changkang leh hmasawnna in a ken tel, a tel lova kan awm theih tawh loh zing ami Electric Current hi kan nitin nun leh khawsak phungah eng ang chiaha pawimawh nge sawi tam ngai lovin kan hre mai awm e. Rei lote Power Supply kan hmuh loh pawhin dem tur kan zawng ruai mai thin a nih hi. Kan hnathawhna khawl tamtak hi Current hmanga nung an nih avangin a tello chuan hna a thawh tak tak theih loh a ni.

Thim tihbaiawm tak hnawt bovin, êngah min awmtir a, khaw vâwt tak ata min ti lum tu leh khaw lum lutukah pawh nin ti vâwt thei tu a ni bawk a, kan hna hahthlak min thawhsak tu leh min ti hlimtu a ni a. Renchem tak leh fimkhur taka hman hi kan tihtur a ni ngei ang.

Electric Current hi thil tangkai tak a nih rualin thil hlauhawm tak a ni a, nunna neilo thil ti nung tu leh mihring te nunna hial pawh la thei tu a nih tlat a vang hian kan hman fimkhur a ngai hle.Kan thunun thiam chuan kan hna engkim min thawh sak a, kan thunun thiam loh a, min thunun zawk hlauh erawh chuan kan tân a hlauhawm hle.

In kâng tamtak hi Current kalsual vangah kan puh thin a, tamtak chu dik bawk mahse a dik vek kher lo thei a ni. A chhan chu, Electric Wiring tha tak a siam a nih a, kam hman fimkhur bawk chuan a kang mai theilo, a lo short palh a
nih pawhin a vengtu tha tak a awm thin. Current kalsual vanga In kang thin hi chu wiring dik lo leh fel tawk lo vang te leh a hmangtu tena kan hman fimkhur loh vang te a ni thin.

In kan wiring reng reng in fimkhur takin kan ti thin tur a ni a, kan In leh bungrua te himna kan ngai pawimawh em em tur a ni. Kan In len lh têt a zir te, Load kan lak tur zat a zir te in kan hmanrua kan thlang tur a ni. Wire ringawt pawh chihrang tamtak a awm a, a chhunga thir (Conductor) pawh a inang lo, wire lian a piang a tha kher lova, a te pawh a tha kher lo. Wire hian zawhtawk a nei theuh a, an zawhloh an phurh chuan a short-in a kang thei a, kangmei a chhuah phah thei. Wire hmantur diktak kan hman theihnan kan load kan hrechiang anga, kan chhut chhuah thlap hnuah chauh wire hman tur kan thlang tur a ni. Wire hman tur ringawt pawh fimkhur a ngaih êm avangin a thiam nazawng kan ring tur a ni lo.

Mobile Phone charge nan te, T.V., Frige, Washing Machine, etc. atân 3pin Socket kan hmang thin a, hetah hian Earth a awm ngei ngei tur a ni a, Earth hian Current leak lakah min veng a, kan bungrua ti tlo tu leh himna atan a pawimawh em em a ni. Earth a awm loh chuan Electric Iron (Istiri) in mi a man thei a, Fridge-ah Current a kal thei a, tui lumna chiahchi (Immerson Heater)-ah pawh tuiah Current a kal thei a ni. Heng zawng zawng paih bo tur hian Earth kan mamawh. Amaherawhchu Earth hi Tek danna a ni lo tih kan hriat a tha.

Kan In chu fel takin Circuit kan then thlap tur a ni a, chung circuit tin te chu a mal malin Circuit Breaker in a veng tur a ni. Hei hian current short vanga kangmei chhuak thei lakah min veng dawn a ni. Tunlaiah chuan Miniature Circuit Breaker (MCB) kan hmang nasa tawh a, he khawl hi a fel faiin hna a thawk tha em em a, himna atan a tha hle. MCB hian an mahni circuit theuh chu ngun takin an veng a, an circuit-ah short emaw current sang thut lo awm palh ta se thildang a chhiat hmain rang takin a lo OFF vat thin a ni.

MCB pawh hian chhawm zawhtawk (Rating) a nei theuh a, MCB a nih phawt chuan a tha ti a duh duh hman hi himna a ni chuanglo. Chutiang zel chuan Cut-Out te, Main Switch te pawh Energy Meter thlengin a hmanna tur bik a awm vek a ni.

Mi thenkhat chuan Ar te kan vulh a, Ar note tan light kan chhit sak a, Flaxible wire man tlawm te te emaw, Telephone hrui tan emaw kan pawt peng a, kan duh duh zat light kan chhi tlaivar zaka, hruiin a zo lova kangmei a ti chhuak thei. Tin, In thenkhatah wiring mumal awm lovin Socket pakhat atangin Plug Top kan vit lut teuh a, wire hlang ten kan vit a, hmawlhtê tan kan kam tawt chawp a, a bawr tuai mai thin a, hei pawh hi a hlauhawm thei tih kan hriat a pawimawh a ni.

Heng zawng zawng hi dik taka hmang tur chuan kan Load kan hriatchian angai, eng ang bungrua nge kan neih a, Light eng ang nge kan mamawh, tui lumna engang chi nge kan hman dâwn uluk takin kan chhut tur a ni. Wiring dik leh felfai, fimkhur taka hman chuan hlauhawm a awm lo a, chuvang chuan thiam nazawng ring mai lo ila, kan lo him zawk ngei ang.

Leave a Reply