INCHEINA

– Matei Pa
Y-Section

Kan Mizo nun hlui han ngaihtuah a rilru mitthlaa han chhui kir chuan tunlai kan incheina chu a danglamin a changkanga, hma pawh kan sawn hle a ni. Amaherawhchu kan changkan dan hian lutuk a awm thei a, kan inbih chian a tulin a hriat. A bikin kan Mizo nulate hian an inchei dan hi inbih chiang deuh sela a duhawm khawp mai.

Hman lai pi pute inchei dan kha i chhawm nung zel ang u ka ti a ni lo a; amaherawhchu, hmeichhia leh mipa inchei dan awm chin hi chu a awm a ni. Tunlai kan nulate inchei dan erawh hi chu hriat thiam a har khawp mai. Sap tlangval bulah ka kal dawn emaw ti ni awm takin a pian nalh leh nalh lo deuh, a mawng chhing leh a mawng fual, chawn ping tha leng lawng pawhin kekawr tawt tak mai an han ha a, a thenin Pathian in min duan sak ka Laipawng hi mi in an hmu lo palh ang tih hlau ni awm fa hranin Laipawng lang kurhin thawmhnaw an han ha a, miten nula sang thlerh thlawrh min ti se ti niawm takin pheikhawk hnuai chhah belbawl leh keartui sang zum vit vet tak an lo bun bawk nen! Chu mai a ni hleinem vaiho tih dan hriain beng an verh a, bengah an khai uai thluah ta mai. A then phei chuan hmun khat mai duh tawk lovin hmun hnih hmun thumah an lo verh bawk. Chu chang a ni lo, hnar thlengin an verh a, hnar bengbeh an beh bawk a, khuavang chhinchhiah insawn thei an nei thluah a, mit hmul an pawt a, an thai dum leh kuau va, a thenin beng lang vahin sam an met bawk a. A mak zozai e mai tih hnu pawhin a la zo lo eng nge la awm ? E..le Punjabi Dress an ti nge? Salwar an ha a, an inti vaitingtang nasa mai maw le!

Kan Bible chuan, “Incheina chu pawnlam incheina, samphiar te, rangkachakthi awrh te, nilovin rilru thuhnuairawlh leh nunnem ni zawk rawh se,” a lo ti a, chuvangin kristian zaa za inti ramah hian ringtute (Hmeichhiate) inchei dan hi chu zir chian a, insiam that a ngai khawp mai. Pawnlang mawina chi hrang hrang hnamdang tih dan incheina ringawt um lovin ringtute inchei dan tur awm taka inchei hi Mizo hmeichhia, nulate hian an zir a ngai ta niin a lang. Chutilo zawng incheina ringawt atang pawh hian Mizote hi chim ralin kan awm mai thei a ni. YMA ten kan hlauh ber pakhat chu hnam dangin min chimral hi a ni si a.

Leave a Reply