Inenfiah kan mamawh takzet

Zirtawpni kalta zana VC Hall-a Kumpuan -cum- Member thar lawm inkhawm neih tum khan kan Branch dinhmun thui tak a tarlang a, Central YMA hruaitu kha hun min hmanpuitu leh a rawn tawiawmtu te leh vengchhung pa he hun ngaipawimawha min telpuitu te an zahawm hle.

Branch Executive Member 60% vel kha hunah khan kan kal a, kumin 2011 atana YMA member-a mahni thu ngata inpe mi 1,150 atangin mi 40 tling lo hret chauh kan kal erawh a percentage-a chhut ngam loh khawpin a zahthlak! Eng kan ti zo ta nge ni le?

Kum khatah hian YMA-in zan lam hun pawimawh a neih a tam lo hle a, hruaitu inthlan zan te, YMA Day zan te, Kumpuan hawn zan te tih bak zan 2/3 YMA hminga punkhawm a awm ngaih meuh lo (khawhar lenpui tel lovin). Heng zan na na na hi chu member-ten kan ngaihpawimawh a tha hle a, kohhran leh tlawmngai pawi dang te pawhin vengchhung inlungrual zawk nan YMA hminga zan lama punkhawm hi tun aia kan ngaihpawimawh leh zahder a ngai hle.

YMA leh kohhran, YMA leh kohhran thalai, YMA leh NGO dang te inkar tha lo piang thei kan ven a pawimawh hle, chuti a nih loh chuan he veng hi veng nuam a ni ngai hauh lovang. Veng nuam apiangah pawl hrang hrang inngaihpawimawh leh inzahdertawnna a thuk a; veng nuam lo/inlungrual lo kan tih apiang te erawh pawl hrang hrang inkar awm a ni thin tih kan hriat a pawimawh khawp mai.

Tuna kan kalphungah chuan kohhran thalai, YMA member ni ve thote hian YMA hmalakna leh YMA hminga punkhawmna te kan kohhran thalai hminga punkhawmna te aiin kan ngainep tih a lang. “YMA-a inhmang tawk” tih tawngkam te, “YMA chu khawvel thil” riaua hriatna te kan nei palh hlauh ang tih a hlauhawm takzet. Kan zui Lal Isuan hian a ngaihdan sawi ta se engtinnge a ngaih ang tih ngaihtuah chunga, “Eng hi nge rawngbawlna dik?” tih inzawt ang u. Rawngbawl nia kan inngaih lai hian kan lawmman he leiah kan lo la zo ve der mai zawk palh ange. Biak In leh a chhehvel piah hret, kawtthler leh dai, kawmkarah kan mihringpui rawngbawlsak mamawh em em an awm ve tho tih i hria ang u.

YMA hian kohhran/kohhran thalai hrang hrang hun leh pawl hun te ngaihtuah ranin hun a hmang ve thin a, a theih chin chinah chuan hun pawimawh tak tak pawh a sawn ve dawr dawr thin tih te leh kohhran/kohhran thalai te leh pawl hrang hrangten kan hriat a tul takmeuh a ni.

He venga kohhran leh pawl vs YMA a pian loh nan leh veng inlungrual kan nih zel theih nan YMA member-ten kan rilru puthmang thlak kan ngaih chuan thlak hreh lo ang u.

Hawh u, Nursery Veng nawm zel zawk nan YMA member-te inenfiah ang u khai.

Leave a Reply